Aıtýly kúnniń aýqymdy sharasy

Elordada «Túrki jazýy kúni» atty halyqaralyq forým ótkizilýde. Túrki akademııasy uıymdastyryp otyrǵan úlken ǵylymı jıynǵa Túrkııa, Ázerbaıjan, Qyrǵyzstan, Reseı jáne ózge de túrkitektes elderden kórnekti ǵalymdar men qoǵam qaıratkerleri, depýtattar men dıplomattar qatysýda.

Byltyr Májilistiń Áleýmettik-mádenı damý komıtetiniń tóraıymy Darıǵa Nazarbaevanyń tóraǵalyǵymen komıtettiń kóshpeli otyrysy ótip, onda 18-shi mamyrdy túrki jazýy kúni retinde belgileý týraly usynys jan-jaqty qaralǵan bolatyn. Nátıjesinde Májilis maquldaǵan usynysty, Úkimet qoshtap, 18-shi mamyr «Túrki jazýynyń kúni» retinde belgilendi. Endigi jerde bul kún elimizdiń ataýly merekeleriniń qatarynan oryn almaq. Soǵan oraı bıyl tuńǵysh ret halyqaralyq aýqymda jıyn ótkizilýde. Premer-Mınıstrdiń orynbasary G.Ábdi­halyqova qatysyp, sóz sóılegen jıynnyń plenarlyq májilisinen soń ǵalymdar «Túrki jazýy: ótkeni, búgini jáne bolashaǵy», sonymen qatar, «Ortaq tarıh: teorııalyq-metodologııalyq máseleleri» atty seksııalar boıynsha baıandamalar jasap, pikir alysty. Forým jumysy búgin de jalǵasady. Búgin Túrki akademııasy, Reseı Ǵylym akademııasy Ýfa ǵylymı ortalyǵymen memorandýmǵa qol qoımaq. Sondaı-aq, jıyn sheńberinde Túrki akademııasynyń shyǵarǵan eńbekteriniń tanystyrylymyn ótkizý de josparlanyp otyr. Aıgúl SEIILOVA, «Egemen Qazaqstan».