Bul kúnde óndiristi aımaqtaǵy qalalar men eldi mekender apta saıyn dúr jańaryp, jaınap salyp júr deýge bolady. Kógildir kóktem nuryn shashqannan bergi ýaqytta úzbeı ótkizilip jatqan senbilikter qorshaǵan ortanyń kórki shyraılanýyn jalǵastyryp jatyr.
Osynaý tamasha sharaǵa jurttyń jappaı belsene atsalysýy úlgili úrdiske aınalǵan. Oblys ákimi Baýyrjan Ábdishevtiń de árdaıym kópshilikpen birge aǵash otyrǵyzyp, qatardan qalyspaýy úırenshikti qalyp.
Kezekti senbiliktiń bir sharýasy Qaraǵandydaǵy Muz aıdyny saraıynyń aınalasyn kóriktendirýge arnaldy. Jan-jaǵy jınalyp, tazartylǵan osy jerde egilgen Alataýdyń 100 shyrshasy ajaryn ashyp, jelkildeı ósip, tamyr jaımaq.
1 sáýirden bastaý alǵan kógaldandyrý is-sharasyna óńir boıynsha 200 myńnan astam adam qatysyp, 18 myń gektar aýmaqty jan jadyratarlyq kelbetke engizdi. Jyldaǵydaı kósheler men aýlalar boıy, saıabaqtar óskin jasyl jelektermen tolyǵyp jaıqaldy. Bıylǵy kóktemde 20 myń aǵash túbi men qylqan japyraqty butalar otyrǵyzyldy. Aldy býsana búrlep, tóńirekti qulpyrta túsip keledi.
Mamyr aıaǵyna deıin senbilikter osymen aıaqtalmaıdy. Egilgen kóshetterdi kútip-baptaýǵa, tazartylǵan aınalany qalpynda ustaýǵa baǵyttalǵan «taza beısenbiler» ótkizip turýmen jalǵasady.
Aıqyn NESIPBAI,
«Egemen Qazaqstan».
QARAǴANDY.