Agrokeshendi nesıelendirý alǵa basty

Elimizdegi aýyl sharýashylyǵy salasynyń ókilderi memleket tarapynan kórsetiletin qoldaýdyń jyldan-jylǵa artyp kele jatqanyna rızashylyqtaryn bildirip otyr. Jýyrda Glýbokoe aýdanyndaǵy kóktemgi egis jumystarymen tanysqan edik. Bystrýha aýylynyń irgesindegi erte egilgen egistik kógerip ósip tursa, Kishi Úbi aýyly janyndaǵy alqapta jap-jańa traktorlar jap-jańa tuqymsepkish qurylǵylaryn súıretip, kúnbaǵys tuqymyn seýip júr. Atalǵan atyzdar «Shyǵys bıdaı» aýyldyq tutyný kooperatıviniń enshisinde eken. «Shyǵys bıdaı» kooperatıvi ótken jyly «Bystrýshınskoe» jáne «Vesna 2011» JShS-larynyń qosylýy nátıjesinde qurylǵan bolatyn. Keıingi jyldary «Agrarlyq nesıe korporasııasy» AQ arqyly 30 mıllıon teńgeden astam jeńildetilgen nesıe alyp jumys istep jatqan kooperatıv jetekshilerimen sóılesken edik. – Osyǵan deıin qolda bar  mate­rıaldyq-tehnıkalyq qural-jab­dyqtarymyz eski bolǵandyqtan tıimdi nesıe alýǵa qolymyz jetpeı júrdi. Sharýashylyǵymyzdy keńeıtýdiń túrli joldaryn qaras­tyryp júrgende «Agrarlyq nesıe korporasııasy» AQ týraly bilip, nesıe alý jóninde ótinish bildirdik. Olar bizge aýyldyq tutyný koope­ratıvin qurýdy usyndy. Osylaısha, «Bystrýshınskoe» jáne «Vesna 2011» JShS-leri birikken edik. «Shyǵys bıdaı» aýyldyq tutyný kooperatıvi arqyly qol jetkizgen nesıe bizdiń eski materıaldyq-teh­nıkalyq bazamyzdy jańalaýǵa, sapaly tyńaıtqyshtar satyp alýǵa múmkindik berdi. Korporasııanyń aýyl sharýashylyǵy taýar óndi­rýshilerin qoldaýy jumysty jańa qarqynmen, ónimdi atqarýǵa jeteledi. Jeńildikpen alynǵan nesıe aýyl sharýashylyǵynda eńbek etetin biz úshin úlken kómek, – dedi «Shyǵys bıdaı» aýyldyq tutyný kooperatıviniń tóraǵasy, «Bys­trýshınskoe» JShS dırektory Ivan Selıvanov. Ivan Mıhaılovıchtiń aıtýynsha, kooperatıv byltyr nesıeniń 8 mıllıon teńgelik alǵashqy bóligin alyp, jıyn-terin maýsymynan soń jaýyp úlgergen. Negizi, 30 mıllıon teńgeden astam qarjyny bes jyl ishin­de qaıtarmaq. 2013 jyldan bastap sharýa­shylyqqa alǵash ret sapaly tyńaıt­qysh qoldanyla bastady. Nátıjesinde, egistik jıyny orta eseppen gektaryna 3-4 sentnerge kóbeıdi. Máselen, buǵan deıin 10-11 sentnerden aspaıtyn kúnbaǵys túsimi byltyr gektaryna 18 sentnerdi qurady. Bystrýha eldi mekeninde orna­lasqan «Shyǵys bıdaı» kooperatıvi qazirgi kezde 40-tan astam aýyl tur­ǵynyn jumyspen qamtyp otyr. Kooperatıvtiń enshisinde 1200 gektardan astam jeri bar. «Agrarlyq nesıe korporasııasy» AQ Shyǵys Qazaqstan oblysy boıynsha  fılıal dırektorynyń orynbasary Nurjan Sadyqovtyń aıtýynsha, memleket tarapynan korporasııa arqyly 2006 jyldan bastap aýyldyq tutyný kooperatıvterin nesıeleý baǵdarlamasy júzege asyrylyp keledi. Bul nesıeniń artyqshylyǵy – birneshe fermerlik sharýashylyqtar men jeke qojalyqtar aýyldyq tutyný kooperatıvine birige otyryp, ózderiniń áleýetin arttyrýǵa múmkindik alady. Atalǵan aýyl sharýashylyǵy taýar óndirýshilerin biriktirip ári qaraı damytý úshin «Agrarlyq nesıe korporasııasy» AQ únemi qoldaý bildirip keledi. Aıtalyq, 2006 jyldan beri respýblıka boıynsha korporasııa tarapynan 147 aýyldyq tutyný kooperatıvi 11 mıllıard 800 mıllıonnan astam teńgege qarjylandyryldy. Iаǵnı, bul kooperatıvter arqyly 6 myńnan astam aýyl sharýashylyǵy taý­aryn óndirýshi birikti. Bul bıýdjettik baǵdar­lama aıasynda Shyǵys Qazaqstan oblysyndaǵy 12 aýyldyq tutyný kooperatıvi nesıelendirilgen. Sońǵy úsh jylda aýyl sharýashylyǵy taýar óndirýshilerine oblys kóleminde 700 mıllıon teńgege jýyq qarjy bólingen. Dýman ANASh, «Egemen Qazaqstan». Shyǵys Qazaqstan oblysy.