Nurlan Ábdirovtiń tóraǵalyǵymen ótken Ortalyq saılaý komıssııasynyń kezekti otyrysynda prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııany qurý, kandıdattyń respýblıkalyq bıýdjet qarajatynan jabylatyn shyǵystarynyń mólsherlerin belgileý týraly máseleler talqylandy.
Sondaı-aq saılaýshylar tizimine qatysty uıymdastyrý jáne prezıdenttikke kandıdattyń saılaý qory týraly sóz boldy.
Ortalyq saılaý komıssııasy tóraǵasynyń orynbasary Konstantın Petrovtyń málimetinshe, 2022 jylǵy 1 shildedegi jaǵdaı boıynsha respýblıkanyń saılaýshylar tizimine belsendi saılaý quqyǵy bar 11 827 277 azamat engen.
Ýaqytsha tirkelgen azamattar, tirkeýi joq azamattar, sondaı-aq saılaýdan keminde otyz kún buryn saılaý kúni óziniń tirkelgen orny boıynsha saılaý ýchaskesine kele almaıtyny belgili bolsa, saılaýshy saılaý taǵaıyndalǵan kezden bastap tıisti jergilikti atqarýshy organda saılaýshy retinde tirkelýge quqyly. Jataqhanalarda turatyn, orta arnaýly jáne joǵary oqý oryndarynda, sondaı-aq joǵary oqý ornynan keıingi bilim berýdiń kásiptik oqý baǵdarlamalary boıynsha kúndizgi oqý nysanynda oqıtyndar saılaýshylardyń tizimine jataqhananyń ornalasqan jeri boıynsha engiziledi. Vahtalyq ádispen jumys isteıtin azamattar da jazbasha ótinishter negizinde saılaýshylar tizimine engizilýi múmkin.
Lıngvıstıkalyq komıssııanyń qurylýy týraly Ortalyq saılaý komıssııasynyń hatshysy Muhtar Erman baıandama jasady. Ol prezıdenttikke kandıdattyń memlekettik tildi erkin meńgergenin anyqtaıtyn bes adamnan turatyn til mamandary men basqa da mamandar kiretin lıngvıstıkalyq komıssııanyń qorytyndysymen anyqtalatynyn habarla- dy.
Ortalyq saılaý komıssııasynyń múshesi Sábıla Mustafınanyń aıtýynsha, memleket prezıdenttikke úmitkerlerdiń buqaralyq aqparat quraldarynda óz baǵdarlamalaryn jarııalaýy úshin qarajattyń teń bólinýine kepildik beredi. Zań boıynsha úmitkerlerge óz baǵdarlamalaryn BAQ-ta nasıhattaýy úshin: teledıdarda – 15 mınýt; radıoda – 10 mınýt; merzimdi baspasóz basylymdarynda nemese jelilik basylymdarda 0,1 baspa tabaqtan aspaıtyn eki maqala jarııalaýǵa qarajat bólinýi kózdelgen. Budan bólek, respýblıkalyq bıýdjet qarajatynan kandıdattardyń saılaý aldyndaǵy jarııa is-sharalardy ótkizýge; úgit materıaldaryn shyǵarýǵa; kólik shyǵyndaryna qarajat qarastyrylǵan. Prezıdenttikke kandıdattyń árqaısynyń shyǵyn mólsheri 10 312 600 teńge kóleminde belgilengen.