Qazan aıynan bastap Semeıde «Sergek» beınebaqylaý júıesi iske qosylady. Osylaısha, Abaı oblysynyń ortalyǵyndaǵy jol qozǵalysynyń qaýipsizdigi men qoǵamdyq tártipti qadaǵalaý jeńildeı túspekshi.
Bul jobanyń aıasynda ahýal ortalyǵy men málimetterdi óńdeý ortalyǵy qurylǵanyn aıta ketken oryndy. Tutastaı alǵanda, qala boıynsha 1,5 myńdaı beınebaqylaý kamerasy ornatylǵan. Qazir barlyq baqylaý júıesi synaq rejiminde jumys istep jatyr.
«Oblystyq Polısııa departamentimen keńesip, «Sergek» beınebaqylaý júıesin 1 qazannan bastap iske qosýdy uıǵardyq. Qoǵamdyq tártip pen jol qaýipsizdigin qadaǵalaýǵa arnalǵan 1551 kamera ornatyldy. 775 kamera qoǵamdyq qaýipsizdikti jáne 776 beınebaqylaý apparaty jol qaýipsizdigin baqylaıdy.
Beıne materıaldar boıynsha derekterdi saqtaý 30 kúnge, foto-aıyppul bar sýretti 3 aıǵa deıin saqtaý kózdelgen jáne meteoderekter shamamen bir jyldaı saqtalady», dedi «Kórkem telekom» kompanııasynyń Semeıdegi fılıalynyń dırektory Rústem Elýbaev.
Osy jobanyń aıasynda polısııa qyzmetkerlerine «Sergek Qorǵaý» mobıldik qosymshasymen jumys isteý úshin 100 planshet alynypty. Atalǵan mobıldi qosymsha joldaǵy «Sergek» júıesine biriktirilip, jalǵan nómir taqqan, júrgizýshi kýáliginsiz kólik basqarǵandardy, sondaı-aq izdeýdegi kólikterdi anyqtaýdy ońtaılandyra túsedi deıdi quzyrly organ ókilderi.
«Mundaı kólikter jónindegi aqparat operatorǵa jiberilip otyrady. Jedel aldyn alý sharalary kezinde polısııa qyzmetkerleri kólikti toqtatyp, qajetti shara qoldanatyn bolady. Jol erejesiniń buzylýyn tirkeý avtomatty rejimde júzege asady.
Qazaqstandyq mamandar daıyndaǵan baǵdarlama arnaıy algorıtmge sáıkes zań buzýshylyqty anyqtaıdy. Budan keıin polısııa qyzmetkeri tekserý júrgizip, elektrondy sıfrly qoltańba arqyly uıǵarymǵa qol qoıady. Barlyq fakti Bas prokýratýranyń quqyqtyq statıstıka jáne Arnaıy tirkeý komıtetiniń ákimshilik ister boıynsha biryńǵaı reestrine birden tirkeledi», dedi quzyrly organ mamandary.
Aldaǵy ýaqytta Derekterdi óńdeý ortalyǵynyń qyzmeti keńeıedi dep kózdelip otyr. Qala ákiminiń mindetin atqarýshy Dımıtrıı Garıkov aıtqandaı, qazir beınebaqylaý kameralary 88 oqý orny men shahardyń birqatar shaǵyn aýdanynda jumys istep tur.
«Budan basqa, munda taǵy bir qyzmet – Komek 109, ıaǵnı barlyq qalalyq kommýnaldyq kásiporynnyń biryńǵaı apatty qyzmeti ornalasatyn bolady. Qala kóshelerinen túsetin aqparat ortalyq pýltke kelip, keri baılanys ornaıdy. Aldaǵy ýaqytta osy júıe Semeı jáne búkil óńir boıynsha jumys isteıtin 112 qyzmetimen biriktirilmek. Onyń qurylymyna 101, 102, 103 qyzmetteri qosylady», dedi D.Garıkov.
«Sergek» júıesi oqıǵa ornyna jaqyn ornalasqan patrýldik jáne qyzmettik avtokólikterdi anyqtap, olardy habarlandyryp otyrady dep naqtylady ákimdik ókilderi.
Abaı oblysy