Sarbazdarǵa – tegin grant

Qorǵanys mınıstrligi azamattardyń merzimdi áskerı qyzmetin óteýge yntasyn arttyrý maqsatynda jańa joba bas­taýdy kózdep otyr. Ol merzimdi áske­rı qyzmetin ótkergen barlyq azamattar­ǵa Ulttyq biryńǵaı testileýdi esepke almaı, áskerı boryshyn ótegen soń eki jyl ishinde joǵary oqý oryndary­na túsýge múmkindik beredi.

Búginde Qorǵanys mınıstrligi tıisti erejelerge ózgerister engizý jumys­ta­ryn bastap ketti. Jobany iske asyrý bilim berý salasyndaǵy zańnamaǵa óz­gerister engizýdi talap etpeıdi. Bul joba 2023 jyldan bastalady. Mundaı je­ńildikter qazirgi ýaqytta boryshyn ótep júrgen azamattarǵa jáne 2022 jyly áskerge shaqyrylýǵa jatatyn sar­bazdarǵa beriletin bolady. Demek kún­tizbe boıynsha kúzde áskerden kel­gen soń, olardyń oqýǵa túsýge múm­kin­dikteri bar. Burynǵy áskerı qyzmet­shi­ler joǵary oqý oryndarynyń áskerı ka­fedrasynda tegin oqı alady. Jańa jo­bany Ǵylym jáne joǵary bilim mı­nıstrligi de qoldap otyr. Budan bólek, áskerge baryp kelgenderge bir­neshe jeńildik jasalady. Atap aıt­qanda, olar – UBT-ny esepke almaı, áńgimelesý nátıjesi boıynsha eki jyl ishinde aqyly negizde joǵary oqý ornyna túsý, JOO áskerı kafedrasynda tegin oqý jáne áskerı oqý oryndaryna emtıhansyz jáne UBT-syz oqýǵa túsý múmkindikteri.

Joba boıynsha áskerı oqý oryndaryna emtıhansyz túsý jáne azamattyq joǵary oqý oryndarynda oqý grantyn alý kezinde áskerı qyzmetshilerdiń Otan aldyndaǵy boryshyn ótegen azamattarǵa basymdyq beriledi dep otyr. Elimizdiń barlyq óńirindegi qyryqqa jýyq joǵary oqý orny áskerı boryshyn ótegen azamattarǵa bilim alýǵa jeńildikter beretinin rastady.

 – Jeke qasıetterine, úlgili tártibine jáne merzimdi áskerı qyzmetin óteý kezeńinde jaýyngerlik daıarlyqta qol jetkizgen joǵary nátıjelerine qaraı áskerı qyzmetshilerge joǵary oqý ornynyń granty esebinen tegin joǵary bilim alý múmkindigi beriledi. Mundaı jastarǵa Qorǵanys mınıstrliginiń áskerı oqý oryndaryna emtıhansyz jáne UBT-ny esepke almaı-aq oqýǵa túsý múmkindigi usynylady. Áskerı oqý oryndaryna emtıhansyz túsý jáne azamattyq joǵary oqý oryndarynda oqý grantyn alý kezinde áskerı qyzmetshilerdiń Otan aldyndaǵy boryshyn ótegen balalaryna da basymdyq beriledi dep otyr. Jobany iske asyrý bilim berý salasyndaǵy zańnamaǵa ózgerister engizýdi talap etpeıdi, – dep atap ótti Qorǵanys mınıstrligi.

Ázirge bul bastamany 30 ýnıversıtet qoldaǵan. Aldaǵy ýaqytta olardyń sany 50-ge deıin jetýi múmkin. Qazir joǵary oqý oryndary jaýyngerler tegin túse alatyn mamandyqtar tizimin daıyndap jatyr.

Sonymen qatar Qorǵanys mı­nıs­trligi ekinshi deńgeıli bank­ter­men áskerı boryshyn ótep júr­gen­der­ge «nesıelik demalys» berý máse­le­sin pysyqtap jatyr. Sondaı-aq mı­­nıstrlik sarbazdardyń qaýipsizdigi má­selesin de qolǵa almaqshy. Máselen, aǵa ofıserlerdiń jaýapkershiligin art­tyryp, ata-analar komıtetimen ty­­ǵyz baılanys ornatý josparda bar. Psıhologter de jaýyngerlermen jıi­rek kezdesip, moraldyq qoldaý kór­set­pek. Budan bólek, áskerı boryshyn ótegen jáne «Kadet» synybyn bitirgen túlekter ýnıversıtetke grant alý úshin 5 paıyz kvota bólinedi.