Pandemııaǵa baılanysty eki jyldaı turalap qalǵan týrızm salasynda qazir qarqyndy damý baıqalady. Ishki týrızmniń negizgi kórsetkishteri keıingi eki jyldaǵy statıstıkamen salystyrǵanda bıyl kórsetkish birneshe esege jaqsarǵan. Byltyr Qazaqstanǵa kelgen týrısterdiń sany rekordtyq kórsetkishke jetip, 6,9 mln adamnyń qazaq dalasyna tabany tıgen. Bul – pandemııaǵa deıingi kezeńnen de joǵary kórsetkish bolyp tur. Bul týraly Týrızm ındýstrııasy komıtetiniń tóraǵasy Dastan Rysbekov Ortalyq kommýnıkasııalar qyzmetinde ótken brıfıngte málimdedi.
«2022 jyldyń birinshi jartyjyldyǵynda ishki týrıster sany 3,6 mln-ǵa jetti. Onyń ishinde 2,7 mln týrıst qonaqúılerge jaıǵassa, 300 myń saıahatshy ulttyq parkterge barǵan. Bul kórsetkish byltyrǵy jyldyń sáıkes kezeńimen salystyrǵanda 50% joǵary. 2021 jyldyń alǵashqy jartyjyldyǵynda Qazaqstanǵa 2,4 mln adam kelgen bolatyn. Sondyqtan jyl sońyna qaraı ishki týrıster sany 8 mln adamǵa deıin ósedi degen boljam bar.
Pandemııaǵa deıingi kezeńmen salystyrsaq, ornalastyrý oryndary kórsetetin qyzmet kólemi de ósken. 2019 jyldyń jartyjyldyǵy boıynsha qyzmet kólemi 51 mlrd teńge bolsa, bıyl bul kórsetkish 30%-ǵa artyp, 68 mlrd teńge boldy. Ornalastyrý oryndarynyń tolýy bıylǵy jyldyń 6 aıynyń qorytyndysy boıynsha 28,2% boldy, bul – 2019 jyldyń kórsetkishinen joǵary (27%). Mundaı qarqynmen jyl sońyna deıin kórsetkish 32% bolady dep boljap otyrmyz», deıdi D.Rysbekov.
Indet shekteýleri alynyp tastalǵandyqtan, sheteldik qonaqtardyń kelýi de birte-birte ósip keledi. Osy jyldyń jartyjyldyǵynyń kórsetkishi byltyrǵy jyldyń qorytyndysymen teńesip, 1,3 mln kelýshige jetti. Jyl sońyna qaraı olardyń sany 2,5 mln-ǵa jetýi múmkin.
Bıylǵy 6 aıda qonaqúı qyzmetin paıdalanǵan sheteldik týrıster sany byltyrdyń osy kezeńimen salystyrǵanda 2,5 esege artqan. Máselen, 2022 jyldyń 1 jartyjyldyǵynda 292 myń adam qonaqúıge jaıǵassa, 2021 jyldyń 1 jartyjyldyǵynda olardyń sany 123 myń adam bolǵan edi. Bıyl elimizge 700 myń qonaq keledi dep kútilýde.
«eQonaq júıesiniń taldaý derekterine súıener bolsaq, apta saıyn Qazaqstanǵa kem degende 11 myń sheteldik týrıst keledi. Ornalasýy boıynsha sheteldikterdiń jıi tirkeletin óńirleri: Almaty, Astana jáne Mańǵystaý oblysy. Tamyz aıynyń ózinde aqparattyq júıede 52 myń sheteldik týrıst tirkelgen. Qazirgi kúni eQonaq qamtýy 10 myń ornalastyrý ornyn quraıdy. Epıdemııalyq ahýal men shekaradan ótýge karantındik shekteý sharalary, qańtar oqıǵasy, sondaı-aq álemdegi ekonomıkalyq jáne saıası jaǵdaı shıeleniskendikten syrttan keletin týrısterdiń kórsetkishi pandemııaǵa deıingi kórsetkishke áli jetken joq», deıdi spıker.
UNWTO boljaýynsha, halyqaralyq týrızm 2024 jylǵa qaraı qalpyna keledi. Degenmen álemdik týrızm oıynshylary agressıvti saıasat júrgizip, sheteldik týrıstke degen talas kúsheıip jatyr.
Bıyl 74 eldiń azamattaryna vızasyz rejim qalpyna keltirildi. Qosymsha Úndistan, Qytaı jáne Iran azamattaryna da vızasyz rejim qosyldy. 113 baǵyt boıynsha 28 elmen halyqaralyq áýe qatynasy qalpyna keltirildi.
Sondaı-aq sheteldik týrısterdiń jıi kelýine sebep bolatyn quraldardyń biri – halyqaralyq ataýly is-sharalar ekeni belgili. Máselen, bıyl Astanada áıgili IRONMAN jarysy uıymdastyryldy. Oǵan álemniń 40 elinen 2 myńnan asa qatysýshy keldi. Mamandardyń esebi boıynsha, jarysqa qatysýshylardyń qonaqúı jaldaý, tamaqtaný, oıyn-saýyq baǵdarlamalary, kádesyı jáne taǵy basqa shyǵyndarynan el bıýdjetine 1 mlrd teńge túsken.
«Týrızmge ınvestısııa tartý jumysy da jalǵasyp jatyr. Sonyń nátıjesinde, jyl basynan beri 20,3 mlrd teńgege 77 joba júzege asyryldy. 2022 jyldyń sońyna deıin qosymsha 107,8 mlrd teńgege 87 joba iske qosylady dep kútilýde. Qonaqúı bıznesi týrıstik salanyń negizgi júıesin quraıdy. Sondaı-aq týrızm nysandary kóptep jumys oryndaryn ashady. Máselen, WYNDHAM GARDEN BURABAY jańa qonaqúıi 120 jańa jumys ornyn, Abaı oblysyndaǵy Alakol Love demalys orny 100 adamdy jumyspen qamtydy», deıdi Týrızm ındýstrııasy komıtetiniń tóraǵasy.
1 maýsymda ótken Úkimet otyrysynda Mádenıet jáne sport mınıstrligine Neo Nomad 2022 aýqymdy aksııasyn ótkizý usynylǵan bolatyn. Jobanyń máni –Qazaqstan ishinde ishki jáne sheteldik týrısterdiń kelýine usynylatyn 20 lokasııanyń tizimin qalyptastyrý bolatyn. Aksııaǵa qatysý úshin týrıster arnaıy sýretke túsip, fotosýretterin #neonomad2022 belgisimen áleýmettik jelilerde ornalastyrýy kerek bolatyn. Is-shara aıasynda Qazaqstannyń 20 óńirindegi tanymal lokasııalarǵa barǵan belsendi týrıster marapattalady. Qazirgi ýaqytta óńirlerdiń týrıstik lokasııalarynda fotojaqtaý (fotoramka) ornatý jumystary júrip jatyr.
Jıyn sońynda Dastan Rysbekov bıyldan bastap júzege asyrylǵan el ishinde balalarǵa tegin áýe saparyn syılaıtyn Kids Go Free baǵdarlamasynyń aralyq qorytyndysyna toqtalyp ótti. «Kúni búginge deıin 1 myńnan asa bala týrıstik paket aıasynda tegin ushyp-qoný múmkindigin paıdalandy. Joba aıasynda týroperatorlar 320 mln teńgeden asa somaǵa týrıstik ónimdi júzege asyrdy. Qazirgi tańda Kids Go Free baǵdarlamasy bar týrlarǵa suranys artyp jatyr. Jyl sońyna deıin kem degende 2 myń balany qamtý josparlanyp otyr», dedi Dastan Rysbekov.