Reseı elshisi – Mańǵystaýda

Reseıdiń Qazaqstandaǵy Tótenshe jáne ókiletti elshisi Mıhaıl Bocharnıkov issaparmen Mańǵystaý oblysynda boldy. Bul onyń sońǵy bes jylda kıeli ólkege ekinshi ret qadam basýy eken. Kórshi Reseı elimen qarym-qatynas dostyq baǵytta jalǵasyp keledi. Belarýs elimen birge Qazaqstan jáne Reseı elderi Eýrazııalyq ekonomıkalyq odaq shartyna qol qoıý tabaldyryǵynda tur. Bul keleshekte jasar jumys­tardyń baǵytyn saralap, ózara túsinistik pen kelisssózder aıasyn keńeıtý turǵysynda júzege asady. Mańǵystaýǵa saparynda aımaq basshylyǵymen Qazaqstan men Reseı elderi arasyndaǵy ózara yntymaqtastyq pen onyń keleshegi, ekijaqty áriptestik máselesi talqy­landy, ekonomıkalyq baı­la­nystaǵy Mańǵystaý oblysy­nyń mańyzy jan-jaqty áńgime­lendi. Munaı salasy, qara altyn óndirýdiń úlesin kóbeıtý tásilderi sóz bolǵan kezdesýde M.Bocharnıkov ekijaqty baılanysty aımaqtyń tabıǵı damýy men kólik-logıstıkalyq ortalyǵy josparlaryn damytýǵa baılanysty da órbitýge bolatyndyǵyn jetkizdi. Elshi Kaspıı jaǵalaýyndaǵy bes memleket arasynda tıimdi kelissózder júrgizilip jatqanyn aıtyp, kúz aılarynyń birinde Atyraý qalasynda bes memleket prezıdentteriniń qatysýymen óte­tin sammıt kórshi elder ara­syn­daǵy yntymaqtyń odan ári arta túsýine sep bolatyndyǵyn aıtty. Mańǵystaý oblysynyń ákimi A.Aıdar­baevtyń qabyldaýynda osy máseleler tóńireginde sóz órbitken elshi Aqtaý qalasynyń ákimi E.Jańbyrshınmen de kez­desti. Kezdesýge Reseıdiń Oral qalasyndaǵy bas konsýly Saıd Zabıtov qatysty. Aqtaý qalasy birneshe alys-jaqyn qalalarmen dostyq, baýyrlastyq qarym-qatynas ornatýǵa talpynyp, osy baǵytta biraz áriptester taýyp úlgergen, olarmen áleýmettik turǵyda jaq­sy qatynas qalyptastyra alǵan qala. Qala basshysy kezdesýde Aqtaý qalasy, onyń áleý­mettik-ekonomıkalyq jaǵdaıy men kólik-logıstıkalyq ále­ý­eti, damý perspektıvasy, áleý­mettik nysandardyń qu­ry­lysy, kommýnaldyq sharýa­shylyǵyndaǵy ózekti máse­le­lerdi sheshýdegi alynǵan naqty sharalar, kógaldandyrý baǵytyndaǵy jumystarmen, engizilgen jańa tehnologııa­larmen tanystyryp, Aqtaý jýyrda ǵana músheligine ótken «Birikken qalalar jáne jergilikti bılik» Búkilálemdik uıymy týraly baıandady. Uıym sheńberinde bıyl tamyz aıynda Aqtaý qalasynda ótkizilýi josparlanǵan «Eýrazııa qala­larynyń álemdik murasy» VII halyqaralyq konferensııasy jóninde aıtyp, kórshi eldiń elshisinen qalalar arasyndaǵy baýyrlastyq qatynastardyń tarıhı negizin qalaýshysy ári bul baǵyttaǵy tájirıbesi mol Volgograd qalasymen Aqtaýdyń baýyrlastyq qatynasyn or­natýǵa yqpal etýin surady, sondaı-aq M.Bocharnıkovtyń qurǵaq óńirde halyqty sýmen, jylýmen jáne elektr energııasymen qamtý týraly suraǵyna jaýap berildi. Sapar sońynda Mıhaıl Bocharnıkov Reseı-Qazaqstan arasyndaǵy áriptestik qatynas­tary jaıynda sóz qozǵaı kele, Aqtaý qalasynda Reseı memle­ketiniń konsýldyq ókildigin ashý jóninde máseleniń ózektiligin alǵa tartty. – Qazirgi tańda Qazaqstannyń batys aımaǵynda Reseıdiń konsýldyǵy bar. Alaıda, ekijaqty qatynastardyń nyq ekenin eskere otyryp, qazirge teorııa negizinde Mańǵystaý óńirinde konsýldyq ókildiktiń bolǵanyn qup sanaımyz. Aqtaý qalasy jan-jaqty damý qarqynymen, tartymdy ın­vestısııalyq áleýetimen Qazaqstandaǵy qalalardyń aldyń­ǵy sapynda keledi. Biz eki el men onyń qalalarynyń dostyǵy úshin qýanamyz. О́ndiristi Mańǵystaý óńiri reseılik kásipkerlerdiń qyzyǵýshylyǵyna ıe, bolashaqta áriptestik baılanystarymyz damı beredi dep senemin, – dedi ol. Qazaqtyń qanynda bar qasıet qoı, dostyq teńiziniń jaǵasyndaǵy mańǵaz Mańǵystaý, aqmarjan Aqtaý dostyq peıilden eshqashan bas tartqan emes. Dos bolamyn degenge qashanda kóńili darqan, tóri keń. Gúlaıym ShYNTEMIRQYZY, «Egemen Qazaqstan». AQTAÝ.