Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Amman qalasynyń meri Akel Beltadjımen kezdesti, dep habarlady osy palatanyń baspasóz qyzmeti.
Iordanııa astanasynyń meri, burynǵy senator Astanaǵa Korol Hýseın ben Talal atyndaǵy kósheniń ashylý saltanatyna qatysý úshin Korol Abdalla II-niń arnaýly ýákili retinde kelgen bolatyn.
«Men 1990 jyldardyń sońynda Korol Hýseınmen júzdesý mártebesine ıe boldym, ári onyń tamasha sózderin, atap aıtqanda, Izraıl premer-mınıstri Iskah Rabınmen qoshtasý rásimindegi tolǵaqty oılaryn estidim. Kóptegen jyldar boıy Iordanııa Taıaý Shyǵystaǵy jaǵdaıdy retteýde erekshe rólge ıe bolyp keledi, óz eliniń aýmaǵyna kórshi elderden júz myńdaǵan bosqyndardy qabyldady», dep atap ótti Q.Toqaev.
Senat Tóraǵasynyń pikirinshe, Prezıdent Nursultan Nazarbaevtyń Ammanda jáne Korol Hýseınniń qurmetine Astanada kóshelerdiń ashylýy ózara túsinistik pen áriptestik rýhynda damyp kele jatqan eki eldiń dostyq qatynastarynyń nyǵaıa túsýiniń kórinisi bolyp tabylady. Ol baýyrlas eki qalanyń arasynda ornaǵan baılanystardyń eki halyqtyń ıgiligi jolynda odan ári damı beretinine senim bildirdi.
Júzdesýshiler Qazaqstan men Iordanııanyń parlamentaralyq baılanystaryn damytý máselelerin talqylady. Iordanııa Senatynyń Tóraǵasy Abd ar-Raýf ar-Raýabdeniń osy jylǵy maýsymǵa josparlanǵan Astanaǵa sapary ekijaqty yntymaqtastyqqa serpin berýi tıis ekeni aıtyldy.