Qazaqstan jáne KSRO halyq ártisi, Halyq qaharmany Roza Baǵlanovanyń 100 jyldyǵyna baılanysty is-sharalar legi dáýir únine aınalǵan ánshiniń týǵan jeri Qazaly aýdanynda jalǵasty. Ǵajap talanttyń ǵasyrlyq toıyn laıyqty atap ótý jóninde Memleket basshysynyń tapsyrmasynan keıin jyl basynan beri elimiz ben shetelderde mádenı keshter, konsertter men kórmeler uıymdastyrylyp keledi. Álemdegi elýden astam memleket sahnasynda án shyrqap, qazaq óneriniń óresin tanytqan talanttyń júzjyldyq toıy IýNESKO sheńberinde uıymdastyrylatyny da ult mádenıeti úshin maqtanysh.
Syrda da uly ánshini ulyqtaý byltyrdan bastaý alǵan. Qazalydaǵy barlyq mádenı is-shara kirispesi Baǵlanovamen baılanystyryla bastalyp, jas ánshiler arasyndaǵy «Ińkárim-aı» konkýrsy qolǵa alyndy. Al buryn aýdanda ótip, talaı ánshini tanytqan «Aqmańdaılym» baıqaýy bıyl oblys ortalyǵynda uıymdastyrylyp, kóktemde Baǵlanova bolmysyn kórsetetin asqaq eskertkish tuǵyrǵa qondy. Osylaısha, Syr sandýǵashy ózin erkeletken eline eskertkish bolyp oraldy.
«Seniki, meniki» dep bólmeı jaqsy istiń basyna jumyla ketetin Qazaly jurty osy joly da uıymshyldyq tanytty. Júzjyldyqqa arnalǵan sharalar legi Qazaly marathon-2022 atty marafonnan bastaý aldy. Osy kúni Baǵlanova shyrqaǵan ánder kent kóshesin kernep turdy. Toǵyz shaqyrymǵa júgirgen 14-28 jas aralyǵyndaǵy jastar oblystyń ár túkpirinen jıylǵan jelaqtar. Aýdandyq jastar resýrstyq ortalyǵynyń uıymdastyrýymen ótken jarystyń jeńimpazy aldyna qara salmaı kelgen araldyq Tursyn Kerimberdıev boldy. Ekinshi oryndy qarmaqshylyq Danııar Ábilahatov ıelense, qola júlde Qyzylorda qalasynan kelgen Kúmisbek Qońqabaevqa buıyrdy. Jeńimpazdar men júldegerlerdi aýdan ákimi Muhtar Orazbaev quttyqtap, qarjylaı syı tabys etti.
Bir aıta keterligi, jelaıaqtar júldesi aýdan ortalyǵynda jańadan ashylyp jatqan Jastar úıiniń aldynda tabystaldy. Shyǵys jastarynyń kósemi atanǵan Ǵanı Muratbaevtyń izbasarlary aımaqtyń ósip-órkendeýi úshin aıanbaı eńbek etip keledi. Jańa nysan jastardyń basyn biriktirip, eriktiler qyzmetin órkendetýge óris ashady.
Jastar úıiniń ashylý saltanatynda aýdan ákimi Muhtar Orazbaev jastarǵa jyly lebizin jetkizdi.
– Aýdanymyzdyń mereıin asqaqtatyp, ózderiniń bilimi, shyǵarmashylyq jumystary jáne sporttaǵy jetistikterimen oblys, respýblıka, qala berdi halyqaralyq deńgeıde tanylyp júrgen jastarymyz jeterlik. Bizdiń tarapymyzdan talantty jastarǵa árdaıym qoldaý kórsetilip keledi. Eldiń erteńi bolatyn táýelsiz memleketimizdiń tizginin ustar keıingi býyn ókilderine jasalǵan qamqorlyq jalǵasa beredi. Byltyr Qazalyda Jastar resýrstyq ortalyǵy ashylsa, bıyl qala jastary jańa ǵımaratqa kóshti. Bizdiń mindet – talapty jastyń taýanyn jyqpaı, talabyn ushtaý. Sondyqtan da oqıtyn jasqa baǵyt berip, joǵary bilim ala almaı qalǵandardy qatardan qaldyrmaı jumysqa ornalastyrýǵa nemese kásip ashýǵa kómek kórsetilýi qajet, – dedi aýdan ákimi Muhtar Orazbaev.
Jastar úıiniń ashylýynda aýdannyń qurmetti azamaty Bolatbek Pusyrmanov da quttyqtaý sóz sóılep, keıingi tolqyn ókilderine tilegin jetkizdi.
Aýdan ortalyǵynda ótken «Án áleminiń padıshasy» atty respýblıkalyq tanymdyq konferensııaǵa qatysýshylar osy kúni Jalańtós batyr men Áıteke bı eskertkishterine taǵzym etip, gúl shoqtaryn qoıdy, Janqoja batyr kesenesinde boldy. Syr bulbulynyń esimin ıelengen aýdandyq mádenıet ortalyǵy aýlasyndaǵy bıýstin gúlmen kómkerip, ánshi rýhyna qurmet tanytty.
Mádenıet ortalyǵynda ótken konferensııada aýdan ákimi Muhtar Orazbaev Roza Tájibaıqyzynyń óneri qazaq án áleminiń tutas bir dáýirine aınalǵanyn atap ótti. Konferensııada tarıh ǵylymynyń kandıdaty, oblystyq Ábdilda Tájibaev atyndaǵy ámbebap ǵylymı kitaphanasynyń dırektory Nurlybek Myńjas «Baǵlanova bolmysynyń ereksheligi» taqyrybynda baıandama jasady. Qoǵam qaıratkeri Nájmadın Musabaev, Qazaqstannyń qurmetti jýrnalısi Ermek Záńgirov, Qazaly aýdanynyń qurmetti azamaty Qýanysh Tólebaev, «Alash» ádebı syılyǵynyń laýreaty Qarshyǵa Esimseıitova jáne Qazaly aýdanynyń qurmetti azamaty Berik Bısembaev, Qazaqstannyń eńbek sińirgen qaıratkeri Murat Sydyqov talant ıesi jaıly tebireniske toly estelikter aıtty.
Tanymdyq konferensııada aýdan ákimi Muhtar Orazbaev, aýdandyq ardagerler keńesiniń tóraǵasy Orazǵalı Bekbanov, Qazaly aýdanynyń qurmetti azamaty, ekonomıka ǵylymynyń doktory, professor Oraq Álıev, ardager Bıbaısha Tileýbergenova ánshi mereıtoıyna oraı baspa júzin kórip jatqan «Án áleminiń padıshasy» atty kitaptyń tusaýyn kesip, jańa týyndy oqyrmandarǵa jol tartty.
Bulbul ánshiniń 100 jyldyǵyna oraı uıymdastyrylǵan tolymdy sharalardyń biri «Shyǵystyń bulbuly» atty respýblıkalyq aqyndar aıtysy boldy. E.Bozǵulov atyndaǵy №249 mektep-lıseıde ótken aıtysqa Pavlodar, Shymkent, Qyzylorda qalasy, Túrkistan, Aqtóbe oblysy jáne Qazaly, Aral, Qarmaqshy aýdandarynyń aqyndary qatysty.
Aıtysty aýdan ákimi Muhtar Orazbaev quttyqtaý sózben ashyp, aqyndarǵa sáttilik tiledi. Aqyndar alamanyn «Altyn dombyranyń» úsh dúrkin jeńimpazy Muhtar Nııazov júrgizip, sóz saıysyna shyqqandardy kópshilikke tanystyrdy.
Ǵasyrlyq toıy ótip jatqan Baǵlanovanyń qazaqtyń án ónerindegi bıigin, búgingi qoǵamdaǵy túrli qubylystardy jyrlaǵan aqyndar arasynan qazylar alqasynyń sheshimimen bas júlde araldyq Erjeńis Ábdıevke buıyryp, aqynǵa 700 myń teńge tabystaldy.
Birinshi orynǵa shymkenttik Birjan Baıtýov laıyq dep tanylsa, Atyraý qalasynan kelgen Farıza Jetpisbaı men qazalylyq aqyn Elnur Nurqasym ekinshi oryndy, pavlodarlyq Raýan Qaıdarov pen Túrkistan oblysynan kelgen aqyn Dáýren Aqsaqal úshinshi oryndy ıelendi. О́zge aqyndarǵa yntalandyrý syılyqtary tabystaldy.
Jeńimpaz ben júldegerlerdi aýdan ákimi Muhtar Orazbaev, qazylar alqasynyń tóraǵasy Ábilqaıyr Syzdyqov, halyqaralyq «Alash» ádebı syılyǵynyń laýreaty Qarshyǵa Esimseıitova, aıtysker aqyn Nurmat Mansurov marapattady.
Mereıtoılyq sharalardy Roza Baǵlanova atyndaǵy «Qazaqkonsert» memlekettik konserttik uıymynyń «Qazaq degen halyqtyń erkesimin» atty konserttik baǵdarlamasy túıindedi.
Osydan bir kún buryn ǵana óner ujymy Qyzylorda qalasynda bolyp, N.Bekejanov atyndaǵy drama teatrynda konsert qoıǵan bolatyn. Sol keshte R.Baǵlanova atyndaǵy «Qazaqkonsert» memlekettik konserttik uıymynyń dırektory Aqtoty Raıymqulova Syr sandýǵashynyń ǵasyrlyq mereıtoıyna arnalǵan gastroldik sapar Soltústik Qazaqstan oblysynan bastaý alyp, Pavlodar, Aqmola, Qaraǵandy, Ulytaý, Abaı, Jetisý oblystarynda jalǵasqanyn aıtqan bolatyn. Syrǵa jetken óner kerýeniniń Qazalydaǵy konsertinde aýdan basshysy ánshilerge alǵysyn jetkizdi.
– «Qazaqkonsert» óziniń baıyrǵy gastroldik saparlaryn jańǵyrtyp, eldi mekenderdi aralaýy ónerge sýsyndaǵan eldi serpiltkenin aıta ketken abzal. Aýdan halqyn rýhanı jigerlendirgen óner ujymyna qazalylyqtardyń atynan alǵysymdy aıtamyn, – dedi ol.
Osy keshte Maqpal Júnisova, Baǵdat Sámedınova, Aıjan Nurmaǵanbetova, Qurmash Mahan men «Azııa» toby jáne basqa da ánshiler óner kórsetip, Qazaly aspanyn ánge bóledi.
QYZYLORDA