Ortalyq saılaý komıssııasy 5-7 qazan aralyǵynda Elektoraldyq oqytý ortalyǵynyń bazasynda elimizde tirkelgen saıası partııalardyń ókilderi úshin «Qazaqstan Respýblıkasyndaǵy saılaý prosesi: teorııasy men tájirıbesi» atty oqytý kýrsyn ótkizip jatyr.
Ortsaılaýkom tarapynan kýrstyń spıkerleri tiziminde OSK tóraǵasynyń orynbasary Konstantın Petrov, komıssııa músheleri Sábıla Mustafına, Anastasııa Shegorsova, Asylbek Smaǵulov, sondaı-aq apparat qyzmetkerleri bar.
Oqytý kýrsy saıası partııalardyń ókilderine prezıdent saılaýyn ázirleý men ótkizý erekshelikterin túsindirýge baǵyttalǵan. Sonyń ishinde saılaý naýqanynyń negizgi kezeńderi, kandıdattardy usyný men tirkeýdiń uıymdastyrýshylyq-quqyqtyq rásimderi, memlekettik jáne memlekettik emes qarjylandyrýdy, atap aıtqanda, kandıdattardyń saılaý qorlarymen jumysy jáne saılaýaldy úgit-nasıhat jumystaryn júrgizý máseleleri jan-jaqty talqylanady.
Semınarda saıası partııalar ókilderi men saılaý prosesine qatysýshylarǵa elektoraldyq oqytý máseleleri, saılaýdy ulttyq baıqaýdy júzege asyrý, múgedektigi bar adamdardyń saılaý quqyqtaryn qamtamasyz etý, saılaý zańnamasyn buzǵany úshin quqyqtyq jaýapkershilik máseleleri jáne «Qazaqstan Respýblıkasyndaǵy saılaý týraly» Zańǵa engizilgen novellalar tanystyrylady. Sondaı-aq semınar barysynda partııalardyń saılaý prosesine qatysýy boıynsha trenıng ótedi.
20 qarashaǵa belgilengen kezekten tys prezıdent saılaýyn ótkizý kezeńinde elektoraldyq oqytý jónindegi josparǵa sáıkes budan buryn respýblıkalyq jáne oblystyq jastar uıymdary, BAQ ókilderi, oblystar ákimderi apparaty, sondaı-aq jergilikti atqarýshy organdar qarjylyq qyzmetteriniń qyzmetkerleri úshin semınarlar ótkizildi.
Saılaý naýqany sheńberindegi kelesi semınarlar óńirlerdiń saılaýshylarmen jumys jónindegi call-ortalyqtarynyń qyzmetkerleri, kandıdattardyń saılaýaldy shtabtarynyń, saılaý jónindegi zańgerler, saılaýdy uıymdastyrýǵa jáne ótkizýge jaýapty JAO qyzmetkerleri, quqyq qorǵaý jáne sot organdarynyń, prokýratýra organdarynyń qyzmetkerleri, Qazaqstannyń sheteldegi ókildikteriniń janynan qurylǵan ýchaskelik saılaý komıssııalarynyń músheleri úshin uıymdastyrylmaq.
Sondaı-aq osy jyldyń qazan jáne qarasha aılarynda Ortalyq saılaý komıssııasy men Aqparat jáne qoǵamdyq damý mınıstrligi prezıdenttikke kandıdattardyń úgit naýqanyn retteý máseleleri boıynsha buqaralyq aqparat quraldary úshin jáne saılaýdy ulttyq baıqaýdy júzege asyrý máseleleri boıynsha úkimettik emes uıymdar úshin birlesken semınarlar ótkizýdi josparlap otyr.