Stýdent qaýymyn jataqhanamen qamtý keıingi jyldary jıi qozǵalǵan ózekti máseleniń birine aınalǵany anyq. Osydan 4 jyl buryn elimizdegi 75 myń stýdentti jataqhanaǵa ornalastyrý jospary qoıylsa, Ǵylym jáne joǵary bilim mınıstrliginiń dereginshe, 2018-2021 jyldar aralyǵynda 30 myńnan astam orny bar 124 jataqhana salynǵan.
Oǵan qosa, mınıstrlik bıyl joǵary oqý oryndaryn eń aldymen qabyldaǵan stýdentterine jataqhana berýge mindettedi. Bul máseleni Memleket basshysy Qasym-Jomart Toqaev halyqqa arnaǵan «Ádiletti memleket. Birtutas ult. Berekeli qoǵam» Joldaýynda taǵy bir márte atap kórsetip, arnaıy tapsyrmalar berdi. Qazirgi ýaqytta jer-jerde jataqhanalar qurylysy júrip jatyr.
«Kelesi mańyzdy másele – stýdentterdi jataqhanamen qamtamasyz etý. Bul túıtkildi sheshý úshin joǵary oqý oryndarymen jáne qurylys kompanııalarymen memleket-jekemenshik seriktestik ornatý tásilin barynsha engizý kerek. Sondaı-aq barlyq máseleniń sheshimin tabýdy memlekettiń moınyna ilý durys emes dep sanaımyn. Sol sebepti, memleketten qarajat alý úshin jekemenshik joǵary oqý oryndarynyń jataqhanasy bolýy shart. Árıne, muny oqý oryndarynan birtindep talap etken jón», dedi Prezıdent Joldaýynda. Búginde keıbir joǵary oqý oryndarynyń óz qarajattary esebinen jataqhana salýdy qolǵa alǵanyn atap ótken abzal.
Qaraǵandy medısına ýnıversıteti sý jańa jataqhanany jeltoqsan aıynda stýdentter ıgiligine tapsyrady. Toǵyz qabatty jataqhanany oqý orny óz qarajatyna turǵyzýda. Onda 400 oryn bar. Qaraǵandy qalasynyń ortalyǵynda ornalasqan jataqhanaǵa arnaıy jer telimi berilgen.
Stýdentterdiń bul úıi zamanaýı bolady dep kútilýde. Bir bólmede eki oryn. Ár bólmede jeke jýynatyn oryn qarastyrylǵan. Burynǵy jataqhanalardaı ortaq emes.
Basqalardan aýyz toltyryp aıtarlyq artyqshylyǵy da az emes. Máselen, tolyqtaı jaryqtandyrylǵan jataqhana aýlasy bar. Buǵan deıin jataqhanalarda aýla atymen oılastyrylmaǵanyn eskersek, muny bir basymdyq deýge turarlyq.
Jataqhana aýmaǵynda jattyǵý qural-jabdyqtarymen sport alańy da jasaqtalady. Ǵımarat ishindegi keń sport zaly jastar arasyndaǵy buqaralyq sporttyń damýyna yqpal ete túseri haq. Budan bólek jobada stýdentterdiń túrli is-shara ótkizýine arnalǵan májilis zaly eskerilipti. Oqý zaly, kompıýterlik synyp ta stýdentter ıgiligine qyzmet etpek.
Qurylys merdigeri «Kazstroıpodrıad» JShS kompanııasy jataqhananyń qabyrǵasy qalanýdan bastap, tabaldyryǵyna tóseler kilemshege deıin jaýapty. Iаǵnı bul kompanııa qurylysty salyp, túgeldeı jıhazben jabdyqtaýǵa deıingi mindetti moınyna alǵan. Jalpy, jataqhana qurylysynyń quny – 2 mlrd teńge.
«Jataqhana iske qosylǵanda oqý ornynyń turǵyn úı qory 3 myńnan aspaqshy. Jalpy, ýnıversıtette 7 myńnan astam stýdent bilim alsa, olardyń jaıly da alańsyz turmysyn oqý ornynyń 6 jataqhanasy qamtamasyz etedi. Bul jataqhanalardaǵy oryn sany – 2 761», deıdi Qaraǵandy medısına ýnıversıtetiniń baspasóz qyzmeti.
Qaraǵandy oblysy