Lız Trasstyń Ulybrıtanııa premer-mınıstri bolǵanyna týra bir aı boldy. Osy aralyqta onyń reıtıngi tómendep úlgerdi, dep habarlaıdy Egemen.kz Euronews saıtyna silteme jasap.
YouGov analıtıkalyq kompanııasy júrgizgen saýalnamaǵa sáıkes, SIM-niń burynǵy basshysyn brıtandyqtardyń tek 14%-y ǵana qoldaıdy. Bul kórsetkish, tipti, Borıs Djonsonnyń reıtınginen kem tústi.
Onyń úkimeti usynǵan salyq reformasy eń baı brıtandyqtar úshin tabys salyǵynyń mólsherlemesin 45%-dan 40%-ǵa deıin tómendetý boldy. Bul, tipti, konservatorlar tarapynan da qoldaý tappady, osynyń áserinen fýnt sterlıng te rekordtyq deńgeıde tómendedi.
«Osy qıyn kezeńderde biz jedel áreket etýimiz kerek. Men Ulybrıtanııany alasapyrannan aman-esen alyp shyǵyp, bizdi ult retinde nyǵaıtýǵa bel býdym. Bul mıssııada maǵan brıtandyqtarǵa degen berik senimim kómektesedi», dedi Lız Trass.
Bırmıngemdegi Konservatıvtik partııa konferensııasynda sóılegen sózinde Lız Trass nazardy ekonomıkalyq saıasattan basqa jaqqa aýystyrýǵa tyrysty. Alaıda onysy da sátti bola qoıǵan joq. Premer-mınıstrdiń sózin «Grınpıs» belsendileri bóldi. Ol Lız Trass klımattyń ózgerýimen kúresý boıynsha birqatar sharany alyp tastaıdy degen qaýipten týyndaǵan.
Búginde Brıtan úkimeti basshysynyń nazaryn talap etetin negizgi máselelerdiń biri – ınflıasııa men ómir súrý qunynyń ósýi. Senbi kúni Koroldikte sońǵy on jyldyqtardaǵy eń iri temirjolshylar ereýili bastaldy.
Jansaıa ÁNÝAR