Kemedeginiń jany bir...

Dúnıe tynyshsyz...

Pandemııanyń quryǵynan endi shyq­­tyq pa degen jer shary ekige qaq aıyrylyp, esi – ekeý, túsi tórteý kúı ústinde tur.

Basy qazaqtyń Uly dalasyn dir etkizgen qańtardyń qandy qyr­ǵy­ny­men bastalǵan jıyrma birinshi ǵasyr­dyń jıyrma ekinshi jyly tamyryn ǵasyrlar qoınaýynan alatyn Batys pen Shyǵystyń jańa tur­patty surapyl teketiresine jal­ǵasty. Adamzat oıy men sanasyna sal­maǵyn batpandap salǵan osynaý jú­rek túrshiger ǵalamdyq arbasýlar aımaq­tyq qaqtyǵystar alańynan shyǵyp, Eýrazııanyń óri men tórin erkin kezýi, soǵys órtiniń ulǵaıa túsýi, Ýkraınanyń qalalary men orman-toǵaı­larynyń ajal alqabyna aınalýy adamzat balasyn alańdatyp otyr.

Túlegen sana men ózgergen qundy­lyqtar...

Alty qurlyqty álekke salyp, mıl­lıardtardyń júregin úreımen tum­shalaǵan qan-qyrǵynnyń shalyǵy tıgen elderdiń qatary kóbeıýde... Soǵys maıdany aqparat maıdanyna jal­ǵasyp, sanksııalar qyrqysynyń beti qaıtar emes. Kúni keshe ekpini eldi eseń­giret­ken Eýroodaqtyń jaly qulap, «qystan qa­laı shyǵamyz?» degen ýaıym qoryǵy­na qamala bastady... AQSh Ýkraınaǵa qarý-jaraq berýin doǵarar emes. Reseı shekteýli mobılı­zasııasyn jarııalady... Bas-kóz demeı Ýkraınanyń tórt oblysyn ózine qosty...

Geosaıası ahýaldardyń shamadan tys kúrdelenip, ýshyǵyp, tamyryn tereńge jibergeni, qanatyn keńge jaıǵany sonshama, saıasat deıtin sylqym minezdi kári qyzdyń ashpaıtyn esigi, baspaıtyn tóri, júrmeıtin jeri, shyqpaıtyn óri, aıt­paıtyn sózi qalmady... О́reskeldik pen órkókirektiktiń onsan úlgisi ósek pen esep­tiń qara kórigin kún-tún úrlep baǵýda...

Urpaq sanasy arsyzdyqtyń tut­qyny bolýǵa aınalǵandaı...

Adamzatqa tán ortaq ókinish – Osy!

Jer esimdi planetada turatyn jeti jarym mıllıard jumyrbas pende­niń taǵdyr-talaıyn oıynshyqqa aınal­dyrǵysy keletinderdiń jańa dáýiri, aıtýǵa aýyz barar emes, soǵysqumarlar dáýiri bastalǵan syńaıly?!.

Tumany men kúmáni qalyń dáýir!

Osyndaı asa kúrdeli, aýmaly-tókpeli kezeńde el Prezıdenti Qazaqstan halqyna óziniń kezekti dástúrli Joldaýyn arnaǵaly aıdan asty. Ádiletti Qazaqstannyń irgesin bekitip, maqsat-muratyn anyqtap, dáıek­teý baǵytynda, ári qalyptasyp otyrǵan álemdik qıyndyqtar men qaýip-qaterlerden elimizdi aman alyp ótý úshin Joldaýda atqarylar naqty sharalar men usynystar aıtyldy.

Bir aıdan astam ýaqyttan beri ha­lyq talqysyna túsip, jurtshylyq tara­pynan keń qoldaý tapqan tarıhı qu­jat­ta el erteńin anyqtar baǵyt-baǵ­darlar belgilendi. Prezıdent damý­dyń jańa ke­zeńine aıaq basqan Qazaq­stan­nyń bolashaǵy halqymyzdyń óz qo­lynda ekenine basa nazar aýdardy. «Hal­qymyz jalpyulttyq referendýmda saıası jańǵyrý baǵdaryn qoldady. Konstıtýsııalyq reforma Jańa, Ádiletti Qazaqstandy qurý jolyndaǵy asa ma­ńyzdy qadam boldy. Elimizdegi saıası jań­ǵyrý endi ekonomıkalyq ózgeristerge ulasýǵa tıis. 

Biz «Azamat-bıznes-memleket» ara­syn­daǵy qatynasty túbegeıli ózgerte­miz. Memleket, eń aldymen, bárine bir­deı múmkindik berip, ádildik ornata­dy... Memleket ekonomıkalyq erkindikti qol­­daıdy. Biraq halyqty naryq turaq­syz­dyǵynyń yqpalynan barynsha qor­ǵaıdy. Shaǵyn jáne orta bıznesti meıi­linshe ­damytady...» deı otyryp, ol osy baǵyt­ta júrgiziler reformalardyń naq­ty bes baǵdaryn usyndy.

Olar mynalar:

Birinshi: Jańa ekonomıkalyq saıasat.

Ekinshi: Naqty sektorlardy damytý.

Úshinshi: El bolashaǵyna arnalǵan strategııalyq ınvestısııa.

Tórtinshi: Memlekettik basqarý isin qaıta jańǵyrtý.

Besinshi: Zań jáne tártip.

Qasym-Jomart Toqaev usynyp otyr­ǵan ár baǵdar tórkininde, saıyp kelgen­­de, el ómiri men taǵdyryn oń jolǵa salý­dyń, halyq oıyn mazalaǵan áleýmettik, turmystyq qıyndyqtar men saıasatta ketken aqaýlyqtardy, teńsizdikter men júgensizdikterdi sheshýdiń joldary men jospary tur. Prezıdent osyǵan deıingi álemdik tájirıbede óz ómirsheńdigin dá­leldegen, júıeli túrde júrgizilip, onsan elder­diń áleýetin kúsheıtken, áleýmettik qıyn­dyqtardy sheshýge múm­kindik bergen ómir súrý men turmys-tir­shilikti ońaı­latýdyń oń úlgilerin eskere otyryp, Qazaqstandy qalyptasqan kúrdeli, tarıhı ahýaldar qoryǵynan alyp shyǵýdyń saıası-ekonomıkalyq joldaryn usynyp otyr. О́tkenniń ashy sabaqtaryn eskerý – el ­damýyna yqpal eter birden-bir ómirlik faktor ekenin umytpaýymyz kerek.

О́ıtkeni...

Ol jady – máńgilik aınasy.

Halyq óz basynan ótken tarıhtyń taǵdyrly syn saǵattaryn esinen shyǵar­maıdy. Jaqsysyn da, jamanyn da, aýyryn da, jeńilin de umytpaıdy. Ár urpaq ózi ómir súrip, ózegin órtegen ómir, aqıqaty men ýaqyt shyndyǵyn kókireginde tumardaı túıip, keıingige jetkizedi. Bizdiń urpaq búgingi eki ǵasyr toǵysynda ǵumyr keship, ultty saqtaý men qorǵaýdyń uly mindeti ıyǵyna túsken, el bolyp qalýdyń aýyr syndaryn ótkerip jatqan urpaq!

Biz – Táýelsizdiktiń qadiri men qasıe­tin biletin urpaqpyz!

Táýelsizdik arqaýy – halyq.

Halqynyń taǵdyr-talaıyn mansap pen baılyqqa jetýdiń kópiri etýden asqan qaýipti nárse joq. Jahandaný dáýiri keńester odaǵynyń ornynda paıda bolǵan táýelsiz elderge osy psıhologııany kúndiz-túni tyqpalaýmen keledi... Bul – bir ulttyń ekinshi bir ultty qarýdyń kúshimen baǵyndyrýdan da qaýipti, ekspansııanyń aılaly, qaterli úlgisi! «Myltyqsyz maıdan» ashqandardyń kishi ulttardyń aqyly men sanasyn, jany men júregin jaýlaýdyń joly! «Jahandaný zamanynda aıdaı álem alaqandaǵydaı bolyp qalǵan» (Qasym-Jomart Toqaev) jıyrma birinshi ǵasyrda ultty, ulttyq qundylyqtardy «kózdiń qarashyǵyndaı» saqtaýdyń asa qajet ekenin Memleket basshysy jańa ǵasyr órindegi Abaı murasy men iliminiń máni men maǵynasy týraly jazǵan maqalasynda barynsha taratyp, tereń ashqan. Prezıdenttiń ulttyq sana men oıdy «pyshaqtyń júzimen alyp ótkendeı» alyp ótip, tildi óristetý, dildi saqtaý, Batys pen Shyǵystyń óliara tusynda jaıǵasqan Uly Dalanyń ótkeni – búgini – bolashaǵy jaıly tolǵaýlary – urpaq sanasyn tárbıeleýdiń ustyny taza ustanymdar ekeni shúbásiz.

Biz tańǵy aqparat keshke jetkenshe «qartaıyńqyrap» qalatyn qadamy, oıy júırik, jedel zamanda ómir súrip otyrmyz.

Oı, sóz, is deıtin úsh uǵymnyń bir­tutas birligin birinen-birin ajyratpaı teń ustaǵan jaǵdaıda ǵana jeńis týy qolymyzda jelbiremek. Keshegi sózińiz ben búgingi oıyńyz erteń atqa­rylar isińizben sabaqtasyp jatýǵa tıis. Bul saıasattaǵy mádenıet pen taban­dy­lyqtyń aıqyn kórinisi! Qasym-Jomart Kemelulynyń arǵy-bergi qoǵam, zaman shyndyqtaryn jasyryp-búkpeı, el tarıhyna «qańtar­dyń qasireti» bolyp engen qandy qyrǵyn­nyń kezinde qıyndyqpen qalaı betpe-bet turysqany, ótkenniń «aǵyn aq, qarasyn qara» dep jańylmaı, jazǵyrmaı baǵala­ǵany el jadynda. «Týra bıde týǵan joq, týǵandy bıde ıman joq» deıtin qazaqtyń tóbe bıi – Tóle babamyzdyń sózi osyn­daı­da eriksiz eske túsedi.

Iá...

Ýaqyt – synshy...

Ýaqyt – emshi...

Ýaqyt – el ómiri men qoǵam ómirin tarazy talqyǵa sala otyryp, ár tulǵanyń, árbir adamnyń sózi men isine túbi adal, ádil baǵasyn beretin qatal, qatygez tóreshi!

El Prezıdentiniń Joldaýyn oqyp otyryp, dápter betine sol kúnderde túsken tómendegi jazbalaryma qaıyra kóz júgirttim. Kúıingen tusym da, qaı­ǵyrǵan kezim de, júregim atsha týlap, bozdaǵan sát-saǵattarym da, qysqasy, bári-bári bolǵan eken...

«Qadirli Qasym-Jomart Kemeluly! Siz el basyna syn túskende О́zińizge tán sabyr men ustamdylyqtyń tabandy úlgisin tanyttyńyz. Búgingi halyqqa qaratyp aıtqan eki sózińizdiń ekeýi de estir qulaqqa jeterdeı qanatty sóz boldy. Týǵan eliniń taǵdyryn oılaǵan naǵyz el basshysynyń sózi! Tarıhı sóz! Halyqtyń Sizden kútkeni de osyndaı baǵyty durys, baǵdarly sóz edi! Dál osy sát-saǵattarda týǵan halqyńyz ǵana emes, Sizdiń bul sheshimińizdi adamzat álemi aqylǵa salyp, oń qabyldaǵany kúmánsiz. «Jaýdy aıaǵan jaraly» deıdi bizdiń halyq! Dál qazir el birligi men amandyǵyn qamtamasyz etýden artyq maqsat joq! Táýelsiz memleketimizdi aman saqtap qalý úshin Siz qandaı sheshimge barsańyz da halyq túsinedi degen senimdemiz! Qaýyrt qımyl kerek! Alla jar bolsyn! «Kemedeginiń jany bir» degen... Búgingi kún men búgingi tún el taǵdyryn uly synǵa salyp otyr. Qazaq eliniń saǵy synbasyn! Baǵy súrinbesin! Alla sáttilik bersin! Nurlan Orazalın. 05 qańtar, 2022 jyl. 21 saǵat 37 mınýt» degen sózderdi asyǵys vatsap arqyly sol kezdegi Prezıdent Ákimshiliginiń basshysy Erlan Qoshanovqa jiberippin. Ertesi inimizden «Hatyńyzdy Prezıdentke jetkizdim» degen habar aldym.

Shynyn aıtý kerek, aqparattyq baılanys úzilip, alty qurlyq Alash jurtynda bolyp jatqan qaterli qan-qyrǵyn oqıǵa­ny «Habar-24», «Rossııa-24», Euronews «RBK», «Habar» sekildi sanaýly arna ar­qyly ǵana qalt jibermeı qadaǵalap otyrǵan asa qıyn da kúrdeli kúnderde, men sekildi jan-júrekteri kúızelip, Qazaq eliniń tileýin tilep, Jaratqanǵa jalbarynyp, kúńirengenderdiń esebin eshkim bilmeıdi... О́ıtkeni olar kóp boldy... О́te kóp!

«Jańylǵandy jazǵyrý – ońaı. Adas­qandy aıyrý, oń jolǵa salý, jónge sha­qyrý – qıyn! Janǵa batqany – jańylǵan da qazaq! Jańyldyrǵan da – qazaq! Jy­lat­qan da – qazaq! Jylaǵan da – qazaq! О́lgen de – qazaq! О́ltirgen de – qazaq! О́kinishti!.. Oılasań, sana muzdap, júrek syzdaıdy... О́rt qushaǵynda qalǵan Alma­tynyń ásem ǵımarattaryn kórip, qa­byr­ǵań qaıysady... Osydan tup-týra 30 jyl buryn qalyń el Táýelsizdik aldyq dep, bórkin aspanǵa atyp jatqanda dúnıe esigin ashqan besiktegi qyzylshaqa bala osydan tup-týra 30 jyl 20 kún buryn júz myńdaı qaraly jurt qar aralas jańbyr jaýǵan jeltoqsannyń 16-sy kúni Táýelsizdik jarııalanǵan qasıetti tórde – Respýblıka alańynda oıyna kelgenin istep jatyr... Atylǵan oq, órt shomylǵan ǵımarattar... Keshegi jıyrmasynshy ǵasyrdyń kózindeı bolǵan, sán-saltanaty jarasqan shahar tórindegi qala ákimshiligi men Prezıdent Rezıdensııasynyń qyzyl jalyn órtine oranǵan vıdeosyn kórgende ne isterimdi bilmeı qınaldym... Táýelsiz eldiń taǵdyry ustara júzinde turǵanyn janymmen, júregimmen sezindim. «E, Alla, kedeıshilik pen joqshylyq aıdap, adasqan ulǵa aqyl bere gór! Adas­tyr­ǵandardyń aıybyn tart­qyza kór! Eldigimizdi saqtaı kór!» degen jazbalar túsipti kúndelik betine. 

Sodan beri... Toǵyz aıǵa tarta ýaqyt ótti.

El esin jıdy, eńsesin kóterdi. Ult tarıhyna «Qańtar qasireti» bolyp engen sol bir qaraly kúnder bizden alystaǵanymen, taqsyretti, taǵdyrsheshti sát-saǵattardyń taby sanadan keter emes, jadydan shyǵar emes...

Búgin de, mine, Prezıdent Toqaevtyń ha­lyqqa arnaǵan joldaýyn kemel memlekettiń irgesin bekitip, ádiletti  Qazaqstan qurýǵa bet alǵan eldiń bola­shaǵyn anyqtar baǵdarly Joldaýyn oqyp otyryp, sol kúnderdi esime aldym... Qańtardan bergi toǵyz aı kúlli jer beti turǵyndarynyń shaqshadaı basyn sharadaı etip, adamzat balasyn buryn-sońdy bola qoımaǵan surapyl kollızııalar qoryǵyna aıdap tyqty... El basqarý men saıası ómirdiń bilim-biligin ıgerip, úlken mektebinen ótken, dáýir tolqynynda júrip, qabyrǵasy qataıyp, oıy shyńdalǵan, kózqarasy bekigen, halyqaralyq qatynas­tar men dıplomatııanyń qyr-syryn tolyq meńgergen, jaratylysynan halyqshyl, qoǵamshyl, memleketshil Qazaqstan bas­shysy qysqa ýaqyt ishinde álemdik saıasattyń qubylǵan qursaýyna tústi. Bir syn­nan shyǵyp, ekinshi bir synnyń emtıhanynan ótti. Sózinen súrinbedi. Oıynan jańylmady... Saıası tulǵanyń sabyrly minezi men salmaqty kózqarasy qalyń eldiń senimin bekite tústi. Qazaqstan Prezıdentiniń irgeli maqsat jolynda qıyndyq ataýlydan yqpaıtyn saıasatkerlik ustanymyna eldiń de, álemniń de kózi jete tústi. El tizginin ustaǵan kúnnen bastap «halyq sózine qulaq asatyn memleket» qurý isin qolǵa alǵan saıasatker Q.Toqaevtyń tabandy beınesi osy qysqa ýaqyt ishinde qalyptasty.  Neni aıtsa da, neni istese de aspaı-saspaı, alyp-ushpaı, júıeli túrde atqarýǵa daǵdylanǵan Memleket basshysynyń portreti, jurt sanasynda bekidi. Joldaýdyń kirispesinde aıtyl­ǵandaı áýeli, jalpyulttyq referendýmda memlekettiń saıası jańǵyrý baǵ­daryn anyqtaǵan ol – ulttyń áleý­met­tik ómirindegi aqaýlyqtardyń astary saıasattaǵy boıkúıez samarqaýlyq pen el ishin indete jaýlaǵan korrýpsııada jat­qanyn ashyp aıtty. Qoǵamdaǵy teń­sizdiktiń aqyry «áleýmettik ashý men ashynýǵa» qalaı alyp kelgenine halyq nazaryn burdy. «Memleket ıgiliginiń 50 paıyzy 162 adamnyń qolynda tur­ǵandyǵy» týraly sózi men ofshorlarda jasyrynǵan qısapsyz qarajatty elge qaıtarý haqyndaǵy úkimetke bergen naqty tapsyrmalary halyq kóńilinen shyqty...

Ádil sóz! Adal uǵym!

Saıasat arenasynan aýlaqtańqy­rap  ketken osy bir kıeli sóz ben qasıetti uǵymnyń qadirin ketirgen ýaqytqa ren­jirińdi, álde aqsha men altynǵa satyl­ǵan arzanqol saıasatshylarǵa ren­jirińdi bilmeısiń?!. Kóringen kók atty­nyń qorjynyna baı­lanǵan toptar men alpaýyt elderdiń «jobasyna» aınalǵan «tulǵasymaqtardyń» aıqaı-súreńi bel alǵan zaman?! «Qara qyl­dy qaq jaryp aıtqan» ádil bıler «kózden bulbul bop ushqan» dáýirge ne dersiń?! Janǵa batady... Ásirese zamana úrdisi qalyptastyrǵan búgingi jeli betin kezip júrgen «bet tyrnaǵysh», «shańqyldaǵysh», «japtym jala, jaqtym kúıege» negizdelgen aıqaıshyldardyń qatary esepsiz kóbeıip  bara jatqanyna qynjylasyń... Taǵdyry talaýǵa túsip, ókinishke qaraı, úshinshi elder qatarynan uzap shyǵa almaı júrgen Alash jurtynyń áleýmettik jeli jetegine essiz baılanýy bizdi qatty oılantady. Qazaqstan Prezıdentiniń: «Álem jyldam ózgerip jatyr. Biraq kóbine jaqsy jaǵyna emes...» dep, osy jylǵy maýsym aıynda ótken Peterbor forýmyndaǵy sózi eriksiz eske túsedi.

Bul sózdiń astarynda sóz ben oıdyń qadiri júdeńkiregen jıyrma birinshi ǵasyrdyń rýhanı keskini jatqany aıdan anyq... Tarıhı shyndyq pen saıası baǵa týra berilip, ári saýatty, ári ádil aıtylǵan sát-saǵat qaz-qalpy jadymyz­da. Ásirese el Prezıdentiniń Birikken Ult­tar Uıymynyń jarǵylyq qaıshy­lyq­tary men uıymnyń qaýqarsyz­dy­ǵy týraly aıtqan syny álem jurty­nyń oıynan shyqty... Qıt etse, Qazaqstan­ǵa «soqtyǵýdy» kásip kóretin qaısybir Reseı saıasatkerleri men jýrnalıste­rine de sol joly Qasym-Jomart Kemel­uly ashyq, aıqyn jaýap bere otyryp, álem­niń aldynda turǵan eń basty kúreta­myr saýaldardyń biri – DNR men LNR týraly oıyn búkpesiz taratyp, úzildi-kesildi kesip aıtqany esimizde. Sol kúni Qazaq Prezıdentiniń saıası, tulǵalyq jaratylysy men ustanymyn aıdaı álem tanydy! Sol brıfıngten soń alty qurlyqtyń saıasatkerleri men basshylarynyń nazary birden Qazaqstan Prezıdentine buryldy. Tulǵa tuǵyry bıikteı tústi.

Iá...

Bul – el tizginin ustaǵan  tulǵamen qosa,  ýaqyt kóldeneń tartqan qıyndyqtardy ıgerýge bet alǵan Qazaq eliniń de bıigi edi...

El damýyn álemdik órkenıettiń da­mýymen úılestire otyryp, jańa dáýir qa­lyp­­tastyrǵan demokratııalyq qundy­lyq­tardy Uly dala jurtynyń minez-qul­qyna saı óristetý,  el taǵdyryn óz taǵ­­dyry sanaıtyn otanshyl, halyqshyl, qoǵam­shyl tulǵalardy barynsha  memleket isine tartý, ǵalamdyq tehnologııany urshyq­taı ıirgen bilimdi, minezdi jastardy tár­bıeleý sekildi izgi qasıetterge keń jol ashý – Memleket basshysynyń qazir­gi tań­daǵy basty saıası, adamı, tulǵa­lyq usta­nymy! Bul aıtqandarymyzdy túbe­geıli ózgeristerge túsken Ata Zańy­myz­dan da, sońǵy Joldaýdan da, Birik­ken Ult­tar Uıymynyń kezekti sessııasy men ShYU-daǵy sóılegen sózderinen de anyq ańǵaramyz.

El búgini men erteńin qamtamasyz  eter damý men óristeýdiń bul aıtýly prınsıpteri men ustanymdary memleket ómiriniń uzaq merzimin qamtıtyny sózsiz. Qasym-Jomart Toqaev ár sózi men ár baby quqyqtyq súz­giden ótken, saıası, ekonomıkalyq qazyq-baýy berik reformalardy júzege asyrý úshin ýaqyt qajet ekenin ashyp aıtty. Ol: «Qazir­gi geosaıası jaǵdaıda biz memleketimizdi bir­tin­dep nyǵaıtyp, reformalar men jańarý baǵdaryn nyq ustanýymyz qajet! Baryn­­sha muqııat áreket jasap, elimizdiń uzaq mer­zim­di múddesine saı jumys júrgizýimiz kerek! Reformalardyń qazirgi qarqynyn saqtaý, saıası máselelerdiń bárin keıinge qaldyr­maı sheshý asa mańyzdy» deı kelip, kezekten ­tys prezıdent saılaýyn ótkizýdi usyndy. ­Pre­zıdent mandatynyń uzaqty­ǵyn 7 jyl­men shektep, qaıta saılanýǵa tyıym salý normalaryn jalpyhalyq­tyq tal­qyǵa saldy. Qos palatadan qoldaý ­tap­­qan konstıtýsııalyq ózgeristi óz Jar­­ly­ǵymen bekitti. Saılaý merzimin bıyl­ǵy 20 qarashaǵa belgiledi. О́ziniń saılaýǵa túsetinin málimdedi.

Sonymen...

«Endigi jeti jyl ishinde el tizginin kim ustaıdy? Qalaı ustaıdy?» degen saýaldar Uly dalanyń endik-boılyǵyn ersili-qarsyly keze bastady. Bul zańdy. Demokratııalyq el basqarý úlgisin «Kúshti Prezıdent – yqpaldy Parlament – esep beretin Úkimet» deıtin qurylymǵa negizdegen Jańa Qazaqstanda saıası bılikti anyqtaýdyń alamany bastaldy.

Qazaqta el men erdiń oıy men sózi, isi men áreketi, maqsaty men mindeti synǵa túskende til ushyna oralar Táýekel deıtin bir kıeli sóz bar. «Táýekel deıtin jel qaıyq. Minesiń! Minesiń de ótesiń... Muratyńa jetesiń!» deıdi sol maǵynasy men máni tereń uǵymǵa bizdiń ondaǵan ǵasyrdy úkilep ustap, úrgen jelge tıgizbeı, úmit pen senimniń shyraǵyn sóndirmeı alyp kele jatqan Alash oıly adal jurtymyz.

Búgin de, mine, Alash muratynyń úmiti men senimin, oıy men mindetin arqalaǵan Qazaq eli óziniń erteńine  alyp barar jańa, taǵdyrly joldy taǵy da Táýekel deıtin sol alyp kemeniń jelkenine tapsyryp otyr.

Alty qurlyq alasapyran...

Adamzat alańdaýly...

Toǵyz valdy daýyldyń ókirgen úni qulaǵymyzǵa jetip tur...

«Kemedeginiń jany bir...» degen eskiden qalǵan esti sóz eske túsedi. «Syrtyńdy – jaýǵa, ishińdi daýǵa aldyrma!» degen babalarymyz. Eldik týyn kóterip, eline jol usynyp, Ádiletti  Qazaqstannyń kóshin bastaǵan  Tulǵa aınalasyna shoǵyrlanar, Táýekel aıtyp toptasar kezdiń kelgenin oı-sanamyzben, jan-júregimizben seziner kezeńniń qyr astynda turǵanyn umytpaýymyz kerek!

 

Nurlan ORAZALIN,

aqyn, Memlekettik syılyqtyń laýreaty