Teatrǵa adam jany tazarý úshin barady. Syrly ónerdiń qoǵamǵa berer ıntellektýaldyq ıgiligi ushan-teńiz. Jetisý jurty bul erekshe áserdi Bıken Rımova atyndaǵy Taldyqorǵan drama teatrynan alady. Bıyl óner ordasy 47-shi maýsymyn uly jazýshy Muhtar Áýezovtiń «Qorǵansyzdyń kúni» tragedııasymen ashty. Maýsymashar qoıylym kórermenniń kóńilin bir tolqytty.
Saltanatty jıynǵa arnaıy kelgen oblys ákimi Beıbit Isabaev áýeli teatr mýzeıindegi jádigerlermen tanysty. Jarty ǵasyrǵa jýyq tarıh túzgen óner oshaǵynda osynda qyzmet etken tanymal tulǵalardyń portreti, sahnada oınaǵan rólderi bederlengen sýretter, sahnalyq kıimder, teatrdyń jetistigin pash etetin basqa da arnaıy buıymdar qoıylǵan.
Zamannyń zańǵar jazýshysy Muhtar Áýezovtiń qalamynan týǵan «Qorǵansyzdyń kúni» tragedııasy qaı ýaqytta bolsyn ózektiligin joǵaltpaq emes. О́ıtkeni senim men nanymnan attaǵan, jaqyn tutqan adamynan opyq jep júrgen keıipkerler qazirgi ómirde de jeterlik. Keshegi taıǵaq keshken zamanda ákesi Jaqyptyń súzekten ketip, artynan aı ótpeı baýyrynan aıyrylǵan, kárilik meńdegen ájesi men zaǵıp anasyna qaraılaǵan Ǵazızanyń taǵdyry júrek basyna ý quıyp, kórermendi tereń oıǵa qaldyrady. Jazyqsyz qyzǵaldaqtyń jábir tartqany ashkózdik pen toıymsyzdyqtyń, nápsiniń kesirinen ekenin uǵyndyrady.
Búginde de mundaı azǵyndar jetip-artylady. Baldyrǵandarǵa kóz qadaıtyn aram nıettiler zań aldynda óz jazasyn tartsa da, adam shoshyrlyq qylmys áli toqtaǵan joq. Keshegi men búginginiń arasyna osylaısha oı jeteletken Áýezovtiń sherli shyǵarmasy Taldyqorǵan tórinde sátti sahnalandy. Maýsymashar qoıylymda akterlik sheberlikterimen tánti etken teatr maıtalmandary jurt qoshemetine bólendi. О́ner ıeleri oblys ákiminiń yqylas gúlin aldy.
Oblys basshysy spektaklden soń mádenıet oshaǵynyń shyǵarmashylyq ujymymen tildesti.
«Oblys ortalyǵynda osyndaı akademııalyq aýrasy bar, klassıkalyq úlgide salynǵan keremet ǵımarattyń bolýy qýantady. Halyqqa rýhanı qyzmet jasaıtyn I.Jansúgirov atyndaǵy Mádenıet saraıy da bar. Endi osyǵan ishki mazmunymyz da saı bolýy kerek. Búgin Muhtar Áýezovtiń klassıkalyq týyndysyn áserli qoıdyńyzdar. Mýzykamen kórkemdeýdiń, tehnıkalyq múmkindikterdiń sheber qoldanylǵany baıqalyp tur. Klassıkalyq shyǵarma qaı dáýirde de jańǵyryp turatyn ólmeıtin týyndy. Degenmen qazirgi zamannyń tynysyn tap basatyn, adamnyń ishki qaltarystaryndaǵy ózgeristerdi, jańǵyrýlardy ashatyndaı dúnıelerdi de jaryqqa shyǵarý kerek. Sizder izdenispen jańa shyǵarmalar jazyp, usynsańyzdar, men árdaıym qoldaımyn», dedi B.Isabaev.
Kezdesý barysynda Qazaqstannyń halyq ártisi Almahan Kenjebekova, Qazaqstannyń eńbek sińirgen qaıratkeri Álıhan Ydyrysheva bastaǵan teatr ártisteri has sulýdyń kóz jasyndaı móldir ónerdi órkendetý baǵytynda pikir bólisti.
Jetisý oblysy