Fýtzaldan Qazaqstan ulttyq quramasy 2024 jyly ótetin álem birinshiliginiń irikteý kezeńin jeńispen bastady. Jaqsylyq Úshkempirov atyndaǵy «Jekpe-jek» sport kesheninde uıymdastyrylǵan toptyq kezeńniń birinshi týrynda Rıkardo Kaka shákirtteri Slovenııa fýtzalshylaryn qabyldap, 2:0 esebimen basym tústi.
Osy jazdyń shilde aıynda tartylǵan jerebe qorytyndysy boıynsha, Qazaqstan quramasy álem chempıonatynyń negizgi irikteý kezeńinde Slovenııa jáne Chernogorııa quramalarymen besinshi topta oınaıtyny belgili boldy. Jalpy, Qazaqstan men Slovenııa fýtzalshylary búginge deıin halyqaralyq oıyndarda úsh márte kezdesip, sonyń tek bireýinde ǵana jerlesterimizdiń mereıi ústem bolǵan edi. Qalǵan eki kezdesýde quramalar teń nátıjemen tarqasqan bolatyn. Al Chernogorııa quramasymen bıyl birinshi ret kezdespek.
Besinshi toptaǵy alǵashqy irikteý oıyny qyrkúıekte Slovenııada ótip, jergilikti fýtzalshylar Chernogorııadan kelgen qarsylastaryn 3:1 esebimen tize búktirdi. Sóıtip, birinshi jeńisine jáne alǵashqy úsh upaıyna qol jetkizgen slovenııalyqtar Qazaqstanǵa besinshi toptyń kóshbasshysy retinde keldi.
Elordadaǵy eski qarsylastardyń tórtinshi oıyny teń dárejede ótti deýge bolady. Sebebi eki quramada da gol soǵyp, esepte alǵa shyǵatyn birneshe múmkindik boldy. Tek Slovenııaǵa qaraǵanda gol soǵatyn ońtaıly sátti múlt jibermegen bizdiń jigitter jeńiske jetip, «Jekpe-jek» sport keshenine jınalǵan jankúıerlerdi qýanyshqa bóledi. Kezdesýdiń jetinshi mınýtynda Dýglastyń buryshtamadan qosqan dobynan keıin Albert Aqbalyqov oıynnyń esebin ashty – 1:0.
Qazaqstan quramasynyń fýtzalshylary ekinshi taımda da óte belsendi oınaǵanymen, Slovenııa qaqpasyna bir doptan artyq gol soǵa almady. Jerlesterimiz esepti eseleýge qansha tyryssa da, kózdegen maqsatyna jete almaı biraz ábigerge tústi. Matchtyń aıaqtalýyna bes mınýt qalǵanda Slovenııa quramasynyń bas bapkeri táýekelge bel býyp, qaqpashynyń ornyna alańǵa besinshi oıynshyny shyǵardy. Qarsylastyń kezekti bir shabýyly nátıjesiz aıaqtalyp, olar dopsyz qalǵanda Dýglas bos qalǵan qaqpany dál kózdep, oıynnyń núktesin qoıdy – 2:0.
Osylaısha, Qazaqstan quramasy alǵashqy oıynda Slovenııany jeńip, úsh upaımen besinshi topta kósh bastady. Al eki match ótkizgen slovenııalyqtarda da úsh upaı bar, biraq jeke kezdesýde jerlesterimizdiń mereıi ústem bolǵandyqtan olar ázirge ekinshi orynǵa túsip qaldy. Qazaqstan quramasy kelesi oıynyn erteń, ıaǵnı 12 qazanda syrt alańda Chernogorııamen ótkizedi.
Eýropa fýtbol qaýymdastyqtary odaǵynyń (ÝEFA) erejesi boıynsha, Kári qurlyqtaǵy álem chempıonatynyń irikteý básekeleri bes satydan turady. Bul – ekinshi irikteý kezeńi. Negizgi irikteý satysynda Eýropanyń 36 ulttyq quramasy úsh-úshten 12 topqa bólinip, oınap jatyr. Toptyq kezeńniń oıyndary 2022 jyldyń 12-21 qyrkúıegi, 3-12 qazany, 6-9 qarashasy jáne 2023 jyldyń 27 aqpany men 8 naýryzy aralyǵyna josparlanǵan.
Toptyq kezeńde baq synaıtyn quramalar bir-birimen úıde jáne syrt alańda bir-bir oıyn ótkizedi. Nátıjesinde, ár toptyń jeńimpazdary men ekinshi oryn alǵan tórt úzdik komanda elıtaly kezeńge tikeleı joldama alady. Al ekinshi oryn ıelengen qalǵan segiz komanda 2023 jyldyń 10-19 sáýir aralyǵynda ótpeli oıyndar arqyly taǵy tórt joldamany sarapqa salady. Sóıtip, irikteýdiń elıtaly kezeńine 20 qurama qatysyp, olar tórt-tórtten bes topqa bólinip oınaıdy. Ár topta jeńimpaz atanǵan qurama álem chempıonatyna joldama alsa, ekinshi oryn alǵan quramalar bir-birimen oınap, qosymsha eki joldamaǵa talasatyn bolady.