Taraptardyń talaptary

Nurlan Ábdirovtiń tóraǵalyǵymen ótken Ortalyq saılaý komıssııasynyń kezekti otyrysynda Qazaqstan Prezı­denttigine kandıdat Qasym-Jomart Toqaevtyń sáıkestigin anyqtaý máse­lesi qaraldy.

Kún tártibindegi másele boıynsha Ortalyq saılaý komıssııasynyń hatshysy Muhtar Erman baıandama jasady. Ol Qazaqstan Respýblıkasynyń Prezı­denttigine kandıdat Qasym-Jomart Toqaevqa qatysty saılaý týraly Konstıtýsııalyq zańnyń 59-babynyń talap­taryna sáıkes Ortalyq saılaý komıs­sııasy ýákiletti memlekettik organ­darǵa tıisti suraý jibe­rgenin habarlady. Quzyretti mem­le­kettik organdardan kelgen málimet­terge saı azamat Qasym-Jomart Kemel­uly Toqaevqa qatysty Qazaqstan Respýb­lı­kasy Prezıdenttigine kandıdat re­tinde tirkelýge kedergi joq ekeni anyq­taldy. Máselen, Bas pro­ký­rat­ýranyń quqyqtyq statıstıka jáne arnaıy esepke alý jónindegi komıtetiniń málimeti boıynsha Qasym-Jomart Toqaev Qazaqstan Res­pýb­lıkasynyń Prezıdenttigine kandı­dattarǵa qoıy­latyn Konstıtýsııa men «Qazaqstan Res­pýb­lıkasyndaǵy saılaý týraly»  Konstıtýsııalyq zańy­nyń talaptary­na sáıkes keledi. Ishki ister mınıstrliginiń málimetine saı Qasym-Jomart Toqaev týmysynan Qazaqstan Respýblıkasynyń azamaty, Qazaqstanda sońǵy 69 jyl boıy turady.

«Qazaqstan Respýblıkasyndaǵy saılaý týraly» Konstıtýsııalyq zań­nyń 54-babynyń 2-tarmaǵyna sáıkes mem­lekettik tildi erkin meńger­genin anyqtaý rásimi kandıdatýrasy óki­lettikterdiń kelesi merzimine qaıta usy­nylǵan, jumys istep júrgen Res­pýb­lıka Prezıdentine qoldanylmaıdy.

Usynylǵan dıplomnyń kóshirmesine saı joǵary bilimi bar (dıplomnyń túpnusqasymen salystyryp tekserý júrgizildi). Qazaqstan Memlekettik qyz­met isteri agenttiginen usynylǵan máli­met­terge saı memlekettik qyzmet­tegi jáne saılanbaly memlekettik laýazym­dardaǵy jumys tájirıbesi – 43 jyl 1 aı.

Ádilet mınıstrligi usynǵan máli­met­ter boıynsha prezıdenttikke kandıdat usynǵan respýblıkalyq qoǵamdyq birlestikterdiń Ádilet mınıstrliginde tirkelgeni týraly qujattary bar.