Nıderland pen Polshanyń birneshe qalasynda ótip jatqan voleıboldan áıelder arasyndaǵy álem chempıonaty óz máresine taıap keledi. Erteń FIVB (halyqaralyq voleıbol federasııasy) men Volley World 4 jylda bir ret uıymdastyratyn jahandyq dodanyń shırek fınal oıyndary bastalady.
23 qyrkúıekte jalaýy jelbiregen álem chempıonatynyń alǵashqy aınalymyna 24 qurama qatysyp, alty-altydan tórt topqa bólinip oınady. Sóıtip, ár topta úzdik nátıje kórsetken tórt qurama ekinshi aınalymǵa joldama aldy. Máselen, ekinshi kezeńde A jáne D tobyndaǵy komandalar (Italııa, Brazılııa, Japonııa, Qytaı, Belgııa, Nıderland, Pýerto-Rıko jáne Argentına) E tobyna jaıǵasyp, Nıderlandta synǵa tústi. Al V men S-daǵy úzdikter (Serbııa, AQSh, Túrkııa, Polsha, Kanada, Domınıkan Respýblıkasy, Taıland jáne Germanııa) F sebetine túsip, Polshada sheberlik baıqasty.
Ekinshi aınalymnyń qorytyndysy boıynsha, taǵy da ár toptan úzdik shyqqan 4 ujym shırek fınalǵa joldama aldy. Endi olar olımpıadalyq júıe boıynsha kim myqtyny anyqtaıdy. Jeńilgen qurama jarys jolynan shyǵyp otyrady.
Atap aıtar bolsaq, E tobynan shırek fınalǵa Italııa (25 upaı) jáne Brazılııa (23) quramalary tikeleı joldama aldy. Sondaı-aq toptyq kezeńniń sońǵy týr oıyndaryna deıin upaılary shamalas bolǵan Japonııa, Qytaı, Belgııa jáne Nıderland quramalary keshe sońǵy eki joldamany sarapqa saldy.
Al F sebetindegi komandalardan qazirgi álem chempıondary – Serbııa, Olımpıada chempıony – AQSh, 2015 jylǵy Eýropa oıyndarynyń jeńimpazy – Túrkııa jáne Olımpııa oıyndarynyń eki dúrkin qola júldegeri – Polsha quramalary shırek fınalǵa shyqty.
О́kinishke qaraı, álem chempıonatynyń alǵashqy aınalymynda AQSh, Serbııa, Germanııa, Bolgarııa jáne Kanada voleıbolshylarymen bir topta baq synaǵan Darko Dobreskov jattyqtyratyn Qazaqstannyń áıelder quramasy barlyq oıynda qarsylasyna jol berip, sońǵy orynda qalyp qoıdy. Sóıtip, bıylǵy álem chempıonaty jerlesterimiz úshin alǵashqy aınalymnan-aq aıaqtaldy. Voleıboldan áıelder arasyndaǵy álem chempıonaty 15 qazanda máresine jetedi.