Elordanyń «Barysy» Qurlyqtyq hokkeı lıgasyndaǵy (QHL) kezekti týr oıynyn Tatarstannyń bas shahary – Qazan qalasynda ótkizip, jergilikti «Ak Bars» klýbynan basym tústi.
Qazandaǵy «Tatneft Arena» muz saraıynda jeti myńǵa jýyq jankúıerdiń qatysýymen ótken oıynda elordalyqtar match taǵdyryn nebári ekinshi kezeńniń ózinde sheship tastady. Birinshi kezeńniń 18-mınýtynda «Barys» sapynan qazaqstandyq qorǵaýshy Samat Danııar mergendigimen kózge túsip, osy maýsymdaǵy alǵashqy golyn soqty. Úzilisten keıin aıdyn ıeleri san basymdyǵyn paıdalanyp, 22-mınýtta tarazy basyn teńestirdi. Goldyń avtory – Kırıll Petrov. Degenmen jergilikti jankúıerlerdiń qýanyshy uzaqqa sozylmady. Arada bes mınýt ótkende Ádil Beketaev nysanany dál kózdep, oıyndaǵy jáne óziniń osy maýsymdaǵy ekinshi shaıbasyn soqty.
Keıinnen 32-mınýtta «Barystyń» kanadalyq shabýylshysy Lınden Veı san basymdyǵyn júzege asyryp, tablodaǵy kórsetkishti 1:3-ke jetkizdi. Ekinshi kezeńniń aıaqtalýyna tórt mınýt qalǵanda Artıom Galımov esep aıyrmasyn qysqartqanymen, qalǵan ýaqytta «Barys» eseptegi basymdyǵyn saqtap qaldy – 2:3. Munyń aldynda jerlesterimiz Nıjnıı Novgorodta «Torpedodan» 3:1 esebimen jeńilip qalǵan bolatyn. 17 upaımen «Shyǵys» konferensııasynda altynshy turǵan «Barys» aldaǵy bes oıyndy endi elordada ótkizedi. Erteń Qytaıdyń «Kýnlýn Red Star» klýbyn qabyldaıdy.