Almatyda 2022 jylǵy 20 qarashaǵa belgilengen Qazaqstan Respýblıkasy Prezıdentiniń kezekten tys saılaýyna daıyndyq bastaldy, dep habarlaıdy Egemen.kz.
О́ńirlik kommýnıkasııalar qyzmetinde ótken brıfıngte Almaty qalasy aýmaqtyq saılaý komıssııasynyń tóraıymy Janna Asanova qalada 5 myńǵa jýyq músheden turatyn 600 ýchaskelik saılaý komıssııasy bar ekenin aıtty.
«Bizde segiz aýdandyq jáne bir qalalyq komıssııa bar. Halyq sany 5 myńnan asty, ıaǵnı bizde ýchaskelik komıssııalarda 4696, aýdandyq, qalalyq saılaý komıssııalarynda 63 adam bar. Qazirgi tańda saılaýshylar tizimi aýdan ákimdikterimen kelisilip jatyr. Árbir azamat saılaýshylar tiziminde joq bolsa nemese basqa qalada tirkelgen bolsa, ótinish berip, ózin tizimge qosa alady. Shara 30 qazanǵa deıin jalǵasady. Odan keıin ózińizdi tizimge qosý múmkin bolmaıdy. Osyny eskerý kerek», dedi Janna Asanova.
Onyń aıtýynsha, aldyn ala málimet boıynsha, qalada 1,1 mıllıonnan astam saılaýshy tirkelgen.
Almaty qalasy aýmaqtyq saılaý komıssııasy tóraǵasynyń orynbasary Aıgúl Qalyqova qazirgi tańda jergilikti atqarýshy organdarda saılaýshylar tizimin naqtylaý jumystary júrgizilip jatqanyn aıtty.
«Bizdiń zańda mynadaı tarmaq bar. Eger azamat daýys berýge 30 kún qalǵanda saılaý ýchaskesine kele almaıtynyn bilse, onda ol saılaý kúni naqty turǵylyqty jeri boıynsha saılaýshylar tizimine engizý týraly ákimdikke ótinish berýge quqyly», dep túsindirdi ol.
Saılaý ýchaskeleriniń ózi saılaý kúnine 20 kún qalǵanda ashylady. Olardyń ornalasqan jeri keıinirek jarııalanady.