Qazaqstanda alǵash ret uıymdastyrylǵan ATP 500 Astana Open týrnırinde mereıli 90-shy júldesin jeńip alǵan serbııalyq tennısshi Novak Djokovıch jarystan keıin jýrnalıstermen tildesip, Qazaqstan týraly, týrnırdiń deńgeıi jóninde óz oıyn ortaǵa saldy. Sondaı-aq álemdik arenadaǵy qazaqstandyq tennısshilerdiń jetistikterin atap ótti.
– Eger menen osy týrnırdegi eń úzdik oıynyńyz qaısy boldy dep surasa, oılanbastan fınaldyq match dep jaýap berer edim. О́ıtkeni men fınalda oıyndy agressıvti túrde bastaǵan myqty qarsylaspen jolyqtym. Ol kortta meni yńǵaısyz sezindirý úshin baryn saldy. Ony sezdim de. Biraq men eshteńege qaramaı, óz oıynymdy oınaýǵa tyrystym. Keıingi eki apta men úshin óte tabysty ótti. Aldyńǵy aptada Tel-Avıvtegi týrnırde top jarsam, bul aptada Astanada oljaly boldym.
– Novak, Astana nemese Qazaqstan degende sizdiń oıyńyzǵa birinshi qandaı oı keledi? Bir sózben aıtyńyzshy.
– Bir sózben? Qıyndaý eken (kúlip). Bolat (О́temuratov). 2019 jyly men Astanaǵa alǵash ret kelgen edim. Sol kezden bastap Qazaqstan degende oıyma birinshi Bolat keletin. Biz óte jaqsy aralasamyz, ol meniń otbasymdy, komandamdy jaqsy biledi, aǵammen jaqyn aralasady. Sol kezde ol meni qaıyrymdylyq matchynda óner kórsetýge shaqyrdy. Osy joly da Qazaqstanǵa qaıta kelý múmkindigi buıyrǵanyna óte qýanyshtymyn. Qalany aralap kórýge ýaqytym bolmady. Degenmen astanalaryńyz ınfraqurylymy damyǵan, sán-saltanaty kelisken qala eken. 2019 jyly Qazaqstannyń Tuńǵysh Prezıdentimen kezdestim. Osy joly da Prezıdent Qasym-Jomart Toqaevpen onyń saraıynda júzdestik. Adamdardyń qonaqjaılyǵyna taǵy tańdandym. Munda tennısti shynynda da jaqsy kóredi eken. Jankúıerler de álemdik tennıs juldyzdarynyń ónerin únemi baqylap otyratyny ańǵarylady. El Prezıdentinen bastap qarapaıym sportsúıer qaýymǵa deıin. Bári tennısti qoldaıdy, oınaıdy. Elena Rybakına «Ýımbldonda» jeńimpaz atandy, Qazaqstannyń «Devıs kýbogindegi» komandasy da óte jaqsy óner kórsetip júr. Olar óz elinde osy sport túriniń damýy úshin bárin istep jatyr dep aıta alamyn.
– Siz birneshe ret qazaqstandyq jas tennısshi Beıbit Juqaevpen jattyǵyp úlgerdińiz. Onyń bolashaǵy týraly ne aıtar edińiz?
– Menińshe, ol – men kórgen jas tennısshilerdiń ishindegi soqqysy joıqyn sportshylardyń biri, ras aıtamyn. Biz komandamyzben onyń soqqysy myqty ekeni týraly pikirlesken bolatynbyz. Sondaı-aq biz ony Serbııaǵa shaqyryp, keıde ózimniń tennıs ortalyǵymda menimen birge jattyǵýy týraly sóılestik. Meniń ol týraly pikirim óte jaqsy. Onyń shynynda bolashaǵy zor, áleýeti myqty. Eger jattyǵýyn toqtatpaı, eńbektene berse, aldaǵy ýaqytta tabysty tennısshiniń biri bolady.
– Siz tennıs koroline aınalmaı turyp, bir kezderi tennıs mamandary, jankúıerleri sizdi hanzada dep ataıtyn. Qazir ózińizdiń izbasaryńyz retinde kimdi aıtar edińiz?
– Joǵary baǵańyzǵa rahmet (kúlip). Qazir tennıstiń bolashaq koroli kim ekenin boljaý qıyn. Meniń oıymsha, bizdiń sportty ǵajap deńgeıge kóterip jatqan jas oıynshylar az emes, solardyń biri – Stefanos Sısıpas (fınaldaǵy qarsylasy). Bıyl tamasha maýsym ótkizip jatqan álemniń birinshi raketkasy Karlos Alkarasty da atap ótpesem bolmaıdy. Búkil tennıs qaýymdastyǵyna «úlken úshtikpen», ıaǵnı – Federer, Nadal jáne menimen qoshtasý qıyn ekenin túsinemin. Bizdiń qatarǵa Endı Marreıdi de qosýǵa bolady. Biz 15 jyl boıy tennıstiń aldyńǵy qatarynda boldyq. Biraq qazir «Úlken dýlyǵany» jeńýge qabiletti jastar paıda bolyp jatyr. Biraq biz Rafa ekeýmiz burynǵysha myqtymyz jáne olarǵa úlken arenada áli de qarsylas bolýǵa tyrysyp baǵamyz. Bul sport úshin jaqsy.
– Eger Astana Open kelesi jylǵy ATR kúntizbesine enetin bolsa, Astanaǵa qaıta kelesiz be?
– Astanaǵa kelesi jyly keler-kelmesimdi naqty aıta almaımyn. Sebebi oǵan deıin bir jyl ýaqyt bar. Biraq elderińizge týrıst retinde nemese tennıs týrnıriniń qatysýshysy retinde qaıta oralǵym keledi. Mundaǵy adamdardyń meni jyly qarsy alǵany sonsha, bir kúni qaıtyp keletinime senimdimin.
Jazyp alǵan
Álı BITО́RE,
«Egemen Qazaqstan»