Kók munarly Kókshetaý men úzilip túsken monshaqtaı kógildir kóldi Qorǵaljynnyń arasyndaǵy keń kósilgen dalada myńnan astam kól bar. Ǵalymdardyń saraptaýyna úńilseńiz, 531 kólde balyq ósirýge ábden bolady eken.
Áıtse de, Kókshetaý kólderindegi balyqtyń basym bóligi baǵaly balyq túrine jata qoımaıdy. Aldaǵy ýaqytta osy bir olqylyqtyń ornyn toltyrý múmkindigi týyp turǵandaı. Taıaýda Býrabaı aýdanyna qarasty Aqylbaı aýylynda forel ósirýge arnalǵan jabyq oryn paıdalanýǵa berildi. Osy bir táýekeldi isti qolǵa alǵan «Biosphere-fish» JShS dırektory Rýslan Qýatov aldymen naryqty, keıin osy óńirde baǵaly balyqty ósirý jaıyn zerttegen. Nesi bar, myqtap qolǵa alsa, ońynan ońǵarylatyn tárizdi. Qabyrǵasymen keńese kele, aınalysýǵa sheshim qabyldaǵan. Baǵaly balyqty ósirý úshin kóp jumys isteý kerek eken. Eń bastysy, ekologııalyq taza ónim. Búgingi tutynýshynyń izdeıtini de osy.
– Syıymdylyǵy 25 tekshe metr bolatyn arnaıy basseınder daıyndaldy. Oǵan Fransııadan jetkizilgen foreldiń alǵashqy legi, ıaǵnı 70 myńǵa jýyq shabaq jiberildi, – deıdi R.Qýatov. – Syry beımálim baǵaly balyq bizdiń móldir sýǵa úırenip, óse bastaǵan ýaqytta sanyn da kóbeıtýdi mejelep otyrmyz.
Kásiporynnyń jobalyq qýaty jylyna 40-50 tonna balyq óndirýge tolyq jetedi. Shyntýaıtynda, bul – eleń etkizerlik jańalyq. Buǵan deıin dál osyndaı bastama Qorǵaljyn, Selınograd aýdandarynda qolǵa alynǵan bolatyn.
Aqmola oblysy,
Býrabaı aýdany