Qorqyt ata atyndaǵy Qyzylorda ýnıversıtetiniń stýdenti Jansaıa Mırambekqyzy sıtrýstyq jemis aǵashtary men qulpynaı ósirýdi qolǵa aldy. Stýdent «Bıznestiń jol kartasy-2025» bıznesti qoldaý men damytýdyń memlekettik baǵdarlamasy aıasynda joba usynyp, jeńimpaz atandy.
Ol Qyzylordada sıtrýs jemisterin patenttep, jersindirýdi bastaǵan alǵashqy kásipkerler qatarynda. Osyǵan deıin óz tájirıbesinde lımondy jersindirý maqsatynda eksperıment jasap kórgen.
– Eń aldymen jylyjaıda qulpynaı ósirip kórdik. Jańa jemis túrin egip kórýdegi alǵashqy maqsat – jersindirý. Ony zerttep, qala ishinde egip kórdik te, ósetinine kóz jetkizdik. Jylyjaıda qajetti tehnologııany saqtaı otyryp, ártúrli ónimdi ósirýge bolady. Temperatýrasyn, ylǵaldylyǵyn baqylap, qajetti dárýmender men qoregin ýaqtyly óz mólsherimen berip, zańdylyqtaryn saqtasa, nátıje berýi múmkin. Árıne, buryn egilmegen jańa jemis túrlerin ekkende, Qyzylorda oblysynyń topyraǵy boıynsha tájirıbe bolmaǵandyqtan túrli qıyndyq kezdesti. Alaıda qıyndyqtyń bári – tájirıbe, bilim. Búginde jylyjaıda lımon túınek salyp tur.
Eki jemisti qatar egýdi jón kórýimizdiń ózindik sebebi bar. Lımon aǵashy alǵashqy 2 jylynda ónim bermeıdi, birden túınektemeıdi. Olardy kútý kerek. Osy oraıda maǵan jetekshilik jasaǵan ýnıversıtettegi ǵalymdardyń eńbegi zor. Sıtrýstyq jemister ylǵalsúıgish bop keledi, shydamdylyqty talap etedi. Sondyqtan ýaqytty bosqa jiberip almaý úshin qosymsha qulpynaı egýdi josparladyq. Qulpynaı ekkennen soń 1 aıda-aq jemis beredi. Buıyrsa, lımonnyń alǵashqy ónimin jınaǵanǵa deıin jergilikti jerge qulpynaı satyp, kásip bastaımyz, – dedi stýdent.
Jansaıa Mırambekqyzy – Qorqyt ata atyndaǵy Qyzylorda ýnıversıteti, «Bıologııa» mamandyǵynyń 4-kýrs stýdenti, «Prezıdenttik stıpendııa» ıegeri. Jas kásipker konkýrsqa «Qyzylorda óńirinde jylyjaıda sıtrýstyq jemis aǵashtaryn jáne qulpynaı ósirý» taqyrybyndaǵy jobasyn usynyp, 5 mln teńgege deıingi qarjylaı qoldaý tapty. Aldaǵy ýaqytta Jansaıa sıtrýstyq jemis aǵashtary men qulpynaı kóshetterin ósirip, jylyjaı jabdyqtaryn alýdy josparlap otyr.
Ǵylym jáne joǵary bilim mınıstrliginiń baspasóz qyzmetiniń habarlaýynsha, qaıtarymsyz grant konkýrsyna Qyzylorda oblysy boıynsha 700 úmitker qatysyp, onyń 25-i jeńimpaz atandy. Jansaıanyń ata-anasy da atalǵan ýnıversıtettiń jylyjaıynda jumys istegen agronomdar. Búginde bul joba otbasylyq kásiptiń jalǵasy bolmaq.