Senat Tóraǵasy Máýlen Áshimbaev Ulybrıtanııa Koroldigi men Soltústik Irlandııanyń Qazaqstan Respýblıkasyndaǵy Elshisi Ketrın Djeın Lıchpen kezdesti, dep habarlaıdy Egemen.kz.
Kezdesýdi ashqan Máýlen Áshimbaev uzaq jyldar boıy týǵan halqyna adal qyzmet etýdiń ozyq úlgisin kórsetken Ulybrıtanııa Patshaıymy II Elızavetanyń qazasyna baılanysty taǵy da kóńil aıtty.
Senat Spıkeri Álemdik jáne dástúrli dinder lıderleriniń VII Sezine anglıkan shirkeýiniń birqatar epıskopy qatysqanyn nazarǵa alyp, forýmǵa qoldaý kórsetkeni úshin Ulybrıtanııaǵa alǵysyn bildirdi.
Odan bólek, kezdesý barysynda Senat Tóraǵasy Qazaqstan men Ulybrıtanııa arasynda dıplomatııalyq qatynastyń ornaǵanyna 30 jyl tolǵanyn, osy ýaqyt ishinde túrli salalarda ekijaqty yntymaqtastyqty nyǵaıtýǵa baǵyttalǵan birlesken jobalar men baǵdarlamalar tabysty iske asyrylǵanyn atap ótti.
«Bıyl bizde Qazaqstan men Ulybrıtanııa arasyndaǵy dıplomatııalyq baılanystyń ornaǵanyna 30 jyl tolady. Bul – mańyzdy kezeń. Osy jyldar ishinde ekijaqty yntymaqtastyǵymyz strategııalyq seriktestik deńgeıine kóterildi. О́zara qarym-qatynastyń tıimdi tetigi qalyptasty. Aldaǵy ýaqytta biz parlamentaralyq baılanysymyzdy arttyrýǵa jáne ony tereńdetýge múddelimiz», dedi Máýlen Áshimbaev.
Senat Tóraǵasy Memleket basshysynyń bastamasymen Qazaqstanda júrgizilip jatqan saıası, áleýmettik-ekonomıkalyq reformalar týraly aıtty. Máýlen Áshimbaev elimizdiń saıası júıesin demokratııalandyrýǵa jáne Prezıdent Joldaýyndaǵy jańa bastamalarǵa keńinen toqtalyp, qolǵa alynǵan ózgeristerdiń strategııalyq sıpatyna nazar aýdardy.
О́z kezeginde Ketrın Lıch Qazaqstanda júrgizilip jatqan reformalardyń mańyzdylyǵyn, el Prezıdentiniń olardy iske asyrýdaǵy júıeli tásilin atap ótti. Sondaı-aq elshi Parlament Senatymen ekijaqty yntymaqtastyqtyń keń aýqymdy máseleleri boıynsha ózara baılanysty keńeıtýge erekshe qyzyǵýshylyq tanytty.