Apple kompanııasynyń brendke aınalǵan ónimi iPhone smartfondary úlken suranysqa ıe. Kópshilik ár kúz saıyn onyń kezekti nusqasyn asyǵa kútedi. Bıyl naryqqa iPhone 14 Pro kelip túspek. Osy oraıda sarapshylar ár eldegi ortasha jalaqy baǵasy men smartfon qunyn salystyryp kórip, qyzyq zertteý jasaǵan.
Picodi.com komandasy iPhone 14 Pro-nyń (128 GB) jergilikti baǵasyn ár eldegi jalaqy mólsherimen salystyra qarap, aıfonnyń ındeksin eseptep shyǵarǵan. Qazaqstanda bul smartfonnyń bazalyq komplektasııasy 699 990 teńge turady. Al AQSh-taǵy taza baǵasy – 999 dollar. Biraq bul baǵa satýdan túsken salyq 0 paıyz bolatyn tórt shtatta ǵana ózekti bolyp sanalady.
Sońǵy resmı derekter boıynsha Qazaqstanda ortasha statıstıkalyq jalaqy 312 011 teńgeni (qolǵa tıetini 251 401 teńge) quraıdy. Osylaısha, ortasha statıstıkaǵa ıe qazaqstandyq iPhone 14 Pro satyp alý úshin 58,5 kún jumys isteýi kerek eken. Iаǵnı búkil jıǵan-tergen aqshasyn túgel smartfon satyp alýǵa jumsaıdy degen sóz. Byltyrmen salystyrǵanda jumys isteıtin merzim 4,3 kúnge azaıǵan.
Sońǵy bes jyldaǵy Qazaqstandaǵy aıfon ındeksi kelesideı kórinis tabady: 2018 jyly – 86 kún; 2019 jyly – 76,5 kún; 2020 jyly – 74,6 kún; 2021 jyly – 62,8 kún; 2022 jyly – 58,5 kún. Sońǵy shyqqan aıfondy bárinen buryn eń jyldam satyp alýshy – Shveısarııa azamattary. Bul eldiń turǵyndaryna qajetti somany jınaý úshin nebári 4,6 kún kerek. Amerıkalyq azamat 5 kúnnen sál asyra jumys istep qajetti qarajatty taýyp alatyn bolsa, aýstralııalyq bir apta tynbaı eńbek etýi tıis.
Eń nashar kórsetkish Tájikstanǵa tıesili. Bul eldiń ortasha statıstıkalyq azamaty 179,5 kún jumys isteýi kerek. Sońynan sanaǵanda ekinshi jáne úshinshi oryndarda Túrkııa (146,7 kún) men Qyrǵyzstan (136,3 kún) ornalasqan.
«iPhone 2022 ındeksi jergilikti Apple dúkenderinde nemese ruqsat etilgen satýshylarda kórsetilgen iPhone 14 Pro (128 GB jady bar) resmı baǵalary negizinde esepteldi. Ortasha jalaqy týraly aqparat memlekettik statıstıka organdarynyń nemese tıisti
mınıstrlikterdiń veb-saıttarynan alyndy jáne belgili bir eldegi iPhone baǵasy jarııalanǵan sátte ózekti bolyp sanalady. Salyqty shegergendegi jalaqy mólsheri jergilikti jalaqy kalkýlıatory arqyly esepteldi. Aılyq jalaqyny biz bir aıdaǵy ortasha jumys kúni – 21 kúnge bóldik», delingen Picodi.com habarlamasynda.