Ádiletti Qazaqstandy qurý úshin jańa saıasattyń eń mańyzdy bastamasy – aldaǵy kezekten tys prezıdent saılaýynyń máni zor. Bul saılaý eldiń bolashaq damý jolyn kóp jaǵynan aıqyndaıdy.
Bul – «Qazaqstan Respýblıkasynyń Ulttyq ınjenerlik akademııasy» respýblıkalyq qoǵamdyq birlestiginiń jalpy jınalysyna qatysqan ǵalymdar men ınjenerlerdiń ortaq tujyrymy. Oqý ordasynyń otyrysynda «Qazaqstan Respýblıkasyndaǵy saılaý týraly» Konstıtýsııalyq zańynyń 55-babyna sáıkes Qasym-Jomart Toqaevty Qazaqstan Prezıdenttigine kandıdat retinde usyný týraly sheshim biraýyzdan qabyldandy.
Jınalys tóraǵasy, akademık Baqytjan Jumaǵulov elimizdiń ǵylymı-ınjenerlik qaýymdastyǵy kezekten tys saılaý týraly habardy úlken jaýapkershilikpen qabyldaǵanyn atap ótti. «Biz bul sheshimdi tolyqtaı qoldaımyz. Aldaǵy saıası naýqan álemdik ekonomıkalyq daǵdarystyń kúsheıýi men shıelenisken geosaıası jaǵdaıda Qazaqstan damýynyń jańa kezeńiniń talaptaryna jaýap beredi», dedi B.Jumaǵulov.
Jıynǵa qatysýshylar osy asa mańyzdy másele boıynsha óz ustanymdaryn bildirýdi ózderiniń azamattyq boryshy dep sanaıdy. Otyrysta akademııanyń vıse-prezıdentteri, akademıkter Nurlan Temirbekov pen Amandyq Tóleshev, mashına jasaý jáne taý-ken, geologııa bólimsheleriniń tóraǵalary Meıirbek Moldabekov pen Bolat Ýjkenov, UIA Batys Qazaqstan jáne Jambyl fılıaldarynyń tóraǵalary Aqserik Áıtimov pen Saǵat Júnisbekov, akademık Aısultan Qalybaev jáne basqa da akademııa músheleri sóz sóılep, saıası mańyzy mol naýqanǵa qatysty oı-pikirlerin ortaǵa saldy.
Ǵalymdar men ınjenerler Memleket basshysy Q.Toqaevtyń Qazaqstannyń túbegeıli reformasy jáne «halyq únine qulaq asatyn memleket» tujyrymdamasy, saılaý júıesiniń formatyn damytý, memlekettik basqarý júıesiniń kásibıligi men jaýapkershiligin arttyrý sııaqty mańyzdy memlekettik bastamalardy ázirleý jáne júzege asyrýdaǵy róli erekshe ekenin atap ótti. Sondaı-aq jıynǵa qatysýshylar qazirgi zamanǵy joǵary bilikti ǵylymı jáne ınjenerlik kadrlardy daıarlaýdaǵy jańa tásilder, ǵylymdy damytý jáne ony ekonomıkalyq prosesterge belsendi túrde engizý, sybaılas jemqorlyq olıgarhııalyq modelinen dáıekti túrde kete otyryp, ekonomıkany ıntensıfıkasııalaýǵa qatysty oılaryn ashyq aıtyp, naqty usynystaryn jetkizdi.
«Kúrdeli kezeńdegi asa mańyzdy maqsat – qazaqstandyqtardyń bastamasy men shyǵarmashylyǵynyń ósýine, qazirgi zamanǵy tehnologııalyq jáne ınnovasııalyq damýǵa negizdelgen Ádiletti Qazaqstandy qurý. Qazaqstannyń damý strategııasynyń prınsıpti jańa irgetasy is júzinde qalandy», dep atap ótti akademık N.Temirbekov.
«Mundaı saıası baǵyt otandastardyń kútkeni men úmitine tolyq sáıkes keledi. Ǵalymdar men ınjenerler Qazaqstandy aldaǵy synaqtardan abyroımen alyp shyǵatyn qazirgi Memleket basshysy ekenine senimdi. Qasym-Jomart Kemelulynyń halyqaralyq kóshbasshy, BUU joǵary basshylyǵynyń múshesi, Qazaqstannyń kórnekti memleket qaıratkeri retindegi mol tájirıbesi – osynyń kepili. Árıne, buǵan qosa óte qıyn jaǵdaıda da halyqtyń senimine jáne qazaqstandyqtardyń ómirin jaqsartýǵa baǵyttalǵan Prezıdenttiń jınaqtaǵan tájirıbesi mol.
Elimizdiń myńdaǵan ǵylymı jáne ınjenerlik korpýsy Prezıdent Q.Toqaevtyń janyna toptasqan jáne Qazaqstannyń jańa belesterge túbegeıli serpilisin qamtamasyz etetin mindetterdi oryndaýǵa bar kúsh-jigerin salady. Sondyqtan akademııa Q.Toqaevtyń kandıdatýrasyn biraýyzdan qoldaıdy», dedi UIA prezıdenti B.Jumaǵulov.