Atyraý oblysynda bıe baılap, saýmal men qymyz sapyrýǵa bet burýshylar qatary kóbeıdi. Mahambet aýdanynyń Sarytoǵaı aýylynda turatyn Talap Qajımov pen Zámzagúl Jańabaeva bes jyldan beri saýmal men qymyz daıyndaýdy otbasylyq kásipke aınaldyryp otyr.
– Men 1998-2008 jyldary Jylyoı aýdanyndaǵy Teńiz ken ornynda montajdaýshy bolyp jumys istedim. Keıin vahtalyq jumysty qoıyp, jylqy sharýashylyǵyn damytýdy qolǵa aldym. Bastapqyda bir úıir jylqym bar edi. Qazir eki úıirge jetti. Úsh bıeni saýamyz. Jylqyǵa qandaı azyq berýdi bilmeı, júırik baptaý, sanyn kóbeıtý múmkin emes. Bir qaraǵanda, shóp berýmen is bitkendeı kórinýi múmkin. Jylqynyń aldyna úıip-tókpeı, qajetti azyqty ólshep, eseptep berý kerek eken. Eń tabıǵı azyq – dala shóbi. Jańa orylǵan shóp bolsa, tipti nárlene túsedi. Janýar baptaýyńa qaraı sút beredi, – deıdi Talap Qajımov.
Erli-zaıyptylar saýmal men qymyz satýdy 2017 jyly bastaǵan. Otanasy Zámzagúl Jańabaeva aýyldaǵy Q.Qalybekov atyndaǵy orta mektepte bıologııa páninen dáris beredi. Alǵashynda saýmal satý týraly oıy bolmaǵan.
– Enemniń asqazany aýyryp, sol kisiniń densaýlyǵy úshin bıe saýýdy bastadym. Saýmaldy kúndelikti úzbeı ishkennen keıin enemniń densaýlyǵy jaqsardy. Sodan beri bıeni úzbeı saýyp kelemin. Júzge jýyq turaqty tutynýshymyz bar. Bıe saýýdy mamyr aıynan qazanǵa deıin jalǵastyramyn. Bir bıe kúnine 6-7 ret saýylady. Bir saýǵanda 1 lıtr sút beredi. Saýmaldy ár adam dıagnozy men tábetine qaraı ártúrli mólsherde ishedi. Qazir suranystyń kóbi Atyraý qalasynan bolyp tur, –deıdi Zámzagúl Jańabaeva.
Endi erli-zaıyptylar memleket tarapynan beriletin qoldaýdy paıdalanýǵa nıet etip otyr. Sóıtip otbasylyq kásipti keńeıtpek.
Atyraý oblysy