Taıaýda aǵaıyndardyń shaqyrýymen Taraz qalasyna jolymyz túsken-di. Anda-sanda Almatyǵa baryp kele jatyp, jolaı azdap aıaldaǵanymyz bolmasa, shahardy aralap kórmegen edik. Totydaı taranǵan ásem qala aıaǵymyz jerge tıisimen-aq kórgen kózdi kórikti kelbetimen birden baýrap aldy.
Qaladan taıaq tastam jerdegi «Aısha bıbi» anamyzdyń kesenesi urpaǵyn meıir-shapaǵatymen jelep-jebep turǵandaı áser beredi. Gúlzarlar men sýburqaqtar, saıabaqtar men túrli attraksıondar, demalys oryndary qalanyń ajaryn asha túsken. Buryn baıqamaıdy ekenbiz, aınalaǵa abaılap, zer sala qaraǵan adamǵa shahardyń qaryshtap, ósip kele jatqandyǵy birden baıqalady.
Úlken dańǵyldyń boıymen kele jatqanbyz. Kenet qarsy aldymyzdaǵy kópqabatty úılerdiń qas betine ornalastyrylǵan belgili qalamger, halyq jazýshysy, Memlekettik syılyqtyń laýreaty Sherhan Murtaza men Máskeý Olımpıadasynyń chempıony, Qazaqstannyń Eńbek Eri Jaqsylyq Úshkempirovtiń úlken etip salynǵan tanys beıneleri kózimizge ottaı basyldy. Esimizge qulager aqyn Ilııas Jansúgirovtiń: «О́z ulyn, óz erlerin eskermese, el tegi qaıdan alsyn kemeńgerdi?» degen sózi tústi. Ile-shala jalpyulttyq respýblıkalyq basylym – «Egemen Qazaqstan» gazetinen Sheraǵań jaıly materıaldardy tushyna oqyǵanymyz bar. «Jaqsynyń aty, ǵalymnyń haty ólmeıdi» degen osy emes pe?
Qazaq – qashannan-aq elim dep emirenip ótken asyldaryn ardaqtap, qurmetteı bilgen halyq. Onyń asyl tektiligi men bekzattyǵy da osy ulylyǵynda. Osynaý úrdistiń aldaǵy kezde de odan ári jalǵasa berýin qalaımyz.
Káribaı ÁMZEULY,
zeınetker
Túrkistan oblysy