Qostanaıda óńir jastarynyń sport lıgasy óz máresine jetti. Bıyl oblystyń áýesqoı sport komandalary arasynda fýtbol, basketbol jáne voleıbol oıyndarynan tuńǵysh ret ótken «Jasliga» oıyndarynyń fınalyna jarty jylǵa sozylǵan jarystardan súrinbeı ótken tańdaýly 12 komanda qatysty.
Halyqaralyq erejelerge saı ótken fınaldyq jarystarǵa óńirge belgili kásibı sportshylar men jattyqtyrýshylar tórelik etti.
Týrnır tóreshileriniń biri, «Tobyl» basketbol klýbynyń burynǵy oıynshysy Leonıd Adamovıchtiń aıtýynsha, «Jasliga» jarysynyń óńir sportynyń damýyna, jastardyń salamatty ómir saltyna beıimdelýine yqpaly mol. Sondaı-aq áýesqoı sport týrnırlerin damytý talantty jastardyń kásibı klýbtarǵa iligýine múmkindik beredi.
– Mundaı jarystar, eń aldymen, áýesqoı sportshylardyń basyn biriktirip, jastardy bos ýaqytyn paıdaly iske jumsaýǵa úıretedi. Búgin synǵa túsip jatqan komandalardyń osaly joq. Qaı-qaısysy da alańǵa jeńis úshin shyqqanyn dáleldep baǵýda. «Jasliga» endi jyl saıyn turaqty túrde ótip turatyn dástúrli sport sharalarynyń qataryna enetinine senimdimin. Bul – jańa joba, sondyqtan kelesi jyly jarysqa qatysatyn áýesqoı komandalardyń sany kóbeıe túsetini sózsiz, – dedi L.Adamovıch.
«Jasliga»-nyń fýtzaldan ótken fınaldyq oıyndarynda Start» komandasyn 2:1 esebimen utqan Rýdnyıdyń «Qasqyr» komandasy úshinshi orynǵa ıe boldy. Bas júlde úshin ótken tartysty básekede «Astyqjan» komandasynan 1 upaı esep aıyrmashylyǵymen basym túsken «Salavat» týrnır jeńimpazy atanyp, qostanaılyq jankúıerlerdiń mereıin ústem etti.
Basketboldan ótken kezdesýlerde sheber oıyn kórsetip, eshkimge des bermegen Qostanaıdyń «Shans» komandasy jeńis tuǵyryna kóterildi. «Rýdnyı» komandasy ekinshi oryndy enshilese, «Brawl Stars» úshinshi orynǵa ıe boldy.
Voleıbol týrnıriniń bas júldesi «Namys» komandasynyń qanjyǵasynda ketti. Jeńimpazǵa 1 upaı ese jibergen «Qyzbel» komandasy – ekinshi orynda. «KPVK»-ny aıqyn basymdyqpen utqan «Lokomotıv» júldeli úshinshi oryndy qanaǵat tutty.
«Jasliga» oıyndarynyń júlde qory shamamen 2 mln teńgege jetip jyǵylady. Buqaralyq sportty damytý maqsatynda «Deni sau urpak – ult bolashagy» uranymen qolǵa alynǵan jańa jobany oblystyq jastar resýrsy ortalyǵy men qoǵamdyq damý basqarmasy uıymdastyryp otyrǵanyn aıta ketken jón.
Qostanaı oblysy