Qylyshyn súıretip qys keledi. Jaqynda Jetisý óńirinde de jylý berý maýsymy bastalady. Áıtse de oblysta kómir qory jetkilikti me? Halyq qatty otynnan qaǵylmaı ma? Osy ispetti máseleler týǵan jaǵdaıda Jetisý oblystyq jáne Taldyqorǵan qalalyq energetıka jáne turǵyn úı-kommýnaldyq sharýashylyq mekemesi qaıtpek? Bul saýaldar ár turǵynnyń kókeıinde saırap turǵany anyq. Al mamandar kómirden tarshylyq kórmeımiz dep sendirýde.
Basqarma ókilderiniń aıtýynsha, turǵyndardyń suranysyn qanaǵattandyrý maqsatynda kómir qory tolyqtyrylýda. Jalpy, oblys boıynsha 34 kómir tuıyǵy men 4 qoıma bar. Turǵyndar qysqy maýsym kezinde ortasha eseppen 487,8 myń tonna kómir tutynsa, búginde onyń jartysynan kóbi (315,9 myń tonna) jetkizilgen. Tuıyqtar men qoımalarda 15,5 myń tonna qatty otyn qory bar. Bıyl Qarajyra razezinen kómir jetkizý jospary – 229,8 myń tonna, Shubarkól razezinen – 258 myń tonna. Sondyqtan mamandar kómir tapshylyǵy bolmaıtynyn aıtady.
«Qystyń qamyn jaz oıla» demekshi, qaqaǵan aıazdan qysylmaı shyǵý úshin halyqtyń basym bóligi erte bastan qamdanady. Máselen, mamyr-tamyz aılarynda 130 myń tonnadan astam kómir satylypty. Al qazan aıyna jetkizý jospary 64,5 myń tonnany qurasa, ázirge jetkizilgeni – 6,5 myń tonna.
Oblysqa táýligine ortasha eseppen 23 vagon, naqtyraq aıtsaq, 1 587 tonna qatty otyn kelip túsýde. Jolda kele jatqan 124 vagon (8 556 tonna) kómir bar. Onyń 66 vagony – «Shubarkól», 58 vagony – «Qarajyra» kómiri. Aýdan jáne qala ákimdikteriniń aqparaty boıynsha qoımalar men tuıyqtarda bir tonna kómirdiń ortasha baǵasy 14 800-23 myń teńge aralyǵynda bolmaq.
Al Taldyqorǵan qalasy boıynsha 11 tuıyq jumys istep tur. Búginge deıin qala boıynsha 30 myń tonnadan astam qatty otyn satylypty. Jolda 3 795 tonna bar.
«Turǵyndardy kómirmen qamtý máselesi árkez bizdiń nazarymyzda», degen jaýapty mamandar qazir tuıyqtarda qatty otynnyń qory jetkilikti ekenin aıtady. Qarapaıym halyq jetpeı qalǵan kómirdi qysta da alýy múmkin. Sondyqtan tuıyqtarda kómir qory únemi qadaǵalaýda bolady.
Jetisý oblysy