Qyzylordada qala kúni aıasynda túrli is-sharalar, mádenı keshter uıymdastyrylyp, Syrdaǵy shahardyń ár kúni jańalyqqa toly bolyp tur. Bıyl astana bolǵan Aqmeshittiń merekesi aıasynda tuńǵysh ret «Bala barysy» baıraqty básekesi ótti. Otyz sportshy qatysqan jas balýandar dodasyna birqatar kompanııa demeýshilik jasady.
«Bala barysy» aıǵa sozylǵan qala kúni merekesi aıasyndaǵy «Jastar karnavaly», «Syrdyń qyryq qazany» jobasy, «Kitap FEST» kitap festıvali, «Nege maǵan jyrlamasqa, Syrda týǵan elimdi» atty poezııa keshi, «Jastyq shaǵymnyń kýási – Qyzylorda» retro ánder festıvali sekildi túrli mádenı kópshilik shara legin túıindegen jarys boldy. Balalar arasynda ulttyq sportty nasıhattaý baǵytyndaǵy bastamaǵa «Abaı-Dáýlet», «Er-Arý», «Shaǵan qurylys zattary» kompanııalary qoldaý tanytty.
Balalar beldesýi ótken «Evrazııa» sport kesheni jankúıerge toly boldy. Jalpy, bul aımaq osy ýaqytqa deıin sporttyń qaı túrinen de jaqsy nátıje kórsetip kele jatyr.
О́tken ǵasyrdyń sekseninshi jyldary Syr velosportshylarynyń ataǵy alysqa ketkeni belgili. Toqsanynshy jyldary gandbolshy qyzdarymyz talaı jarystan júldemen oralyp júrdi. Qatarynan birneshe chempıon shyǵarǵan aımaq aýyr atletıkasy týraly da aıtarymyz bir bólek. Qazir kógaldaǵy hokkeıden Syr sportshylary el namysyn qorǵap júr.
Ulttyq sport túrlerinen de aımaq sportshylarynyń mereıi ústem shyǵady. Ásirese, toǵyzqumalaqtan top basynda keledi.
«Qazaqstan barysy» saıysy alǵash uıymdastyrylǵan 2011 jyly qyzylordalyq Ulan Rysqulov top jardy. Ulannyń jeńisti jolyn jalǵaǵan Elaman Erǵalıev, Nurym Sálimgereev, Maqsat Isaǵabylovtar búginde úlken arenalarda el namysyn abyroımen qorǵap júr.
Osyndaı aǵalarynyń jolyn jalǵamaqqa talpynǵan «Bala barysy» týrnırine qatysýshylarǵa Qyzylorda qalasynyń ákimi Asylbek Shámenov sáttilik tiledi.
– Osyndaı órender barda qazaq kúresiniń keleshegi kemel, bolashaǵy jarqyn bolaryna senemin. Aldaǵy ýaqytta «Bala barysy» týrnıriniń dástúrli sıpat alýyna júıeli jumystar jasalyp, bul baıraqty básekede tanylǵan jas túlekter kóptegen dúbirli dodada Alashqa olja salady dep oılaımyn, – dedi qala ákimi.
Jas balýandar bozkilemge sport kesheniniń ishine bir-birine qarama-qarsy tigilgen qos kıiz úıden shyǵyp, óz qarsylastaryn jerebe arqyly anyqtady. Sportshylardyń árbir qımyly joǵary tehnologııaly VAR júıesi arqyly baqylanyp, ıýtýb arnasynda tikeleı efır júrgizildi.
Tartysty básekeni talantty aqyn Aqjol Túmenbaı júrgizip, rýhty sózderimen balýandarǵa dem berip otyrdy. Ár beldesýi tartysty ótken týrnırdiń aqtyq synynda keshen ishin jankúıerlerdiń qıqýy kernep turdy.
Týrnır nátıjesinde qarmaqshylyq Baqytjan Arqar «Kórermen kózaıymy» atansa, 50 myń teńge jáne «Qola belbeý» Qyzylorda qalasynyń balýany Islambek Baımoldaevqa buıyrdy. Jartylaı jeńis upaıymen alda turyp, sońǵy sátte ǵana qarsylasyna ese jibergen jańaqorǵandyq Dinmuhamed Erjanov 100 myń teńge men «Kúmis belbeýdi» qanaǵat tutsa, 150 myń teńge jáne «Altyn belbeýdi» qarmaqshylyq Álıhan Álıasqarov jeńip alyp, arnaıy jasalǵan aýyspaly «Taıtuıaqty» ıelendi.
Qala ákimdiginiń uıymdastyrýymen bul báseke jyl saıyn ótkiziletin dástúrli dodaǵa aınalmaq.
QYZYLORDA