Álemge talpynǵan Álim

«Qazaqkon­sert­tiń» shy­ǵar­mashy­lyq ujymy Roza Tájibaıqyzy ­erek­­she jaq­sy kórgen Almaty qalasyn­da­ǵy birqatar mádenıet ujymdarynda aýqymdy merekelik sharalar ótkizý­di bastap ketti. Festıval shymyldy­ǵy 25 qyrkúıekte Qurmanǵazy atyndaǵy Qazaq ulttyq konservatorııasynyń Erke­ǵalı Rahmadıev atyndaǵy úlken kon­sert zalynda «Bizdiń jármeńke» atty dástúrli mýzyka konsertimen ashyl­ǵan-tyn. Konsertke Ulttyq óner ortalyǵy men Qurmanǵazy atyndaǵy ulttyq konservatorııanyń solısteri men ujymdary, «Astana sazy» folklorlyq ansambli men «Gúlder» ansambliniń jańa quramy qatysty.

«Qazaqkonsert» ánshileri men óner­pazdary tamyz aıynda Abaıdyń týǵan kúnine oraılastyra Semeı qalasynan ­bastap, jańadan ashylǵan Ulytaý, Almaty oblystaryna saparlap, Kýrcha­tov, Qaraýyl, Jıdebaı-Bórili, Rıd­der, Altaı, Ulytaý oblysynyń Jezqaz­ǵan, Ulytaý, Qarajal, Jetisý oblysynyń Tekeli óńirlerinde jáne kúmis kómeı ánshiniń týǵan jeri Qyzylorda obly­syn­da, Aral, Qarmaqshy, Qazaly, Baıqońyr ólkesinde óner kórsetti. Mekeme maıtal­mandarynyń kóshpeli konsert jaqynda Kentaý qalasynda, Jambyl oblysynda jalǵasyn tabady.

Sondaı-aq Abaı atyndaǵy Qazaq ult­tyq opera jáne balet teatrynda «Klas­sıkalyq mýzyka jaýharlary» atty klas­sıkalyq mýzyka konserti sátti ótti. Konsertte eń tanymal kamera­lyq-aspaptyq ansamblderdiń biri «Forte Trio» memlekettik trıosy, Qazaq­stannyń eńbek sińirgen qaıratkerleri Azamat Jyltyrgózov, Bıbigúl Jan­uzaq, Medet Shotabaev, Saltanat Ahme­tova, «Daryn» memlekettik jastar syı­ly­ǵy­nyń laýreaty Azat Málik, halyqaralyq jáne respýblıkalyq baıqaýlardyń laýreaty Aıgerim Altynbek óner kórsetti.

Osy jobalardyń jalǵasy ispetti «Almaty Theatre» ǵımaratynda pıanıst Álim Beısembaevtyń Memlekettik aka­demııalyq sımfonııalyq orkestrimen bir­lesken konserti bolyp ótti. Kon­sert bastalmas buryn memlekettik «Qa­zaq­konsert» ujymynyń dırektory Aq­toty Raıymqulova, dırıjer Qanat O­ma­rov jáne kesh qonaǵy Álim Beı­sem­­baev baspasóz máslıhatyn ótkizip, jas pıa­­nısti jete tanystyryp, shyǵar­ma­shy­lyǵy týraly jan-jaqty baıandap berdi.

Keıingi jas býyn talanttardyń kóp­shiligine tán ómirbaıan deregi: Qazaqstan­da týǵan, zııatkerlik mektepterdiń bi­rin­de bilim alǵan, shetelde shyńdalǵan. Qaǵazdaǵy ómirderek qysqa ári nusqa sóılegenimen, eńbekpen ǵana qol jete­tin jetistiktiń ońaı órilmeıtini belgili. Álemge aty máshhúr pıanıst Álim Beı­sembaevtyń da shyǵarmashylyq jetistigi shamamen osylaı tarqatylady: Almaty­da týǵan, 5 jasynan kúısandyqtan saz saýlatyp, bilimin jetildirý úshin Reseı­ge attanǵan, ári qaraı Londondaǵy Ko­rol­dik kolledjiniń stýdenti. 2008 jyly álemdegi eń myqty mýzykalyq mek­tepterdiń biri sanalatyn Máskeý­degi Ortalyq mýzykalyq mektepke qabyl­danǵanda, Álim oń-solyn tanyp úlger­megen on jastaǵy oıyn balasy edi. Osy jyly halyqaralyq «Shelkýnchık» televızııalyq baıqaýynda jeńimpaz atanyp, on eki jasynda belgili sımfonııa­lyq orkestrlermen, áıgili dırıjerlermen jumys isteý tájirıbesi qalyptasyp úlgerdi. P.Chaıkovskıı atyndaǵy Máskeý memlekettik konservatorııasy janyndaǵy Ortalyq mýzykalyq ýchılıshesi Álimge ushan teńiz bilim berip qana qoımaı, mýzykalyq mádenıet, estetıkalyq jan-jaqty ilim, rýhanı tereńdik sińirdi. Al 2010 jyly Anglııaǵa kóship baryp, Persell jas mýzykanttar mektebiniń oqytýshysy Tessa Nıkolsannan bilim alady. Álim 25-ke endi ǵana aıaq basty. Al ol bolsa Van Klaıbern atyndaǵy jas pıanısterge arnalǵan I halyqara­lyq baıqaýdyń jeńimpazy, Lıst jáne Veımar qalalaryndaǵy halyqaralyq jasóspirimder jáne Manchesterdegi pıa­nıster baıqaýynyń laýreaty atanǵan. Saýsaǵynan saz tamshylaǵan talantty pıanıst Ulybrıtanııanyń Lıds qala­syn­da ótetin asa bedeldi Halyqaralyq pıanıster baıqaýynyń tarıhyndaǵy birinshi syılyqty jeńip alǵan tuńǵysh qazaqstandyq-laýreat, Ýoterman Altyn medaliniń ıegeri, Royal College of Music magıstri.

Bes jasynan kúısandyqta oınap, jıyrmaǵa jeter-jetpes jasynda daq­pyrty jer jarǵan dýaly aýyz bilgir­ler tarapynan «álem klassıkalyq mýzy­kasynyń qubylysy» dep baǵalanǵan jas daryn Á.Beısembaevtyń bul kúni ár konserti jyl buryn josparlanyp, ár sapary mınýtyna deıin eseptelip, aldyn-ala kelisiledi. Álim tanymal mýzy­kanttarmen yntymaqtasa jumys istep ke­ledi jáne Londonnyń kameralyq ansam­blderiniń quramynda konsertterge jıi shyǵady. Erte tanylǵan erek­she talant ıesi ýaqytynyń tyǵyzdy­ǵyna qaramastan Roza Baǵlanova atyn­daǵy Qazaqkonsert memleketttik fılar­mo­nııa­synyń usynysyn qabyl alyp, Ońtús­tik Koreıadaǵy konsertinen ke­ıin «Almatydaǵy Altyn kúz Qazaq­kon­sertpen birge» atty óner festıvaline tike­leı ushyp kelgen eken. Aqtoty Rahme­tol­laqyzy dúnıejúzilik deńgeıde jarq etip tanylǵan jańa esimniń qoldaýǵa daıar óz táýelsiz eli bar ekenin jáne Qazaqstanǵa kerek ekenin bildirip, ár shyǵarmashylyq jetistigin baǵalap, rýhanı demeý bolyp otyrý úshin Álimdi «Qazaqkonserttiń» solısi bolýǵa shaqyryp, usynys bildir­genin jetkizdi. Qoǵammen qarym-qaty­nasyn aǵylshyn tilinde atqaryp júrgen azamat altyn qazyǵy, túp-tamyry qa­zaq topyraǵyna baılaýly ekenin bir sát esi­nen shyǵarmaıtyndyqtan, bul usy­nysqa qýana kelisimin bergen. Kish­kentaı kúninen týǵan jerinen jy­raq­­ta júrgen jas pıanıst árdaıym Alma­tyny kórgenshe asyq. Sebebi bul qa­lada onyń ájesi, ata-anasy, baýyrlary turady. Bul – Á.Beısembaevtyń Qazaqstandaǵy alǵashqy jeke konserti. Álimniń konserti KSRO halyq ártisi Erkeǵalı Rahmadıevtiń «Qudasha-dýman» sımfonııalyq shyǵarmasymen bastaldy. Qanat Omarovtyń dırıjerligimen Qazaq memlekettik sımfonııalyq orkestrimen birge Á.Beısembaev Bethovenniń «№3 sımfonııasyn», S.Rahmanınovtyń «Paganını taqyrybyna Rapsodııa» atty shyǵarmasyn oryndady.

Mýzykaǵa mahabbaty bala kúninen búr jaryp, búginde sheberliktiń shyńy­na shyǵyp, shartaraptyń aldynda Qazaq­stannyń atyn asqaqtatyp júrgen Álim Beısembaevtyń klassıkalyq mýzykadaǵy qadamy erte bastalǵanymen, qanatyn kerip, zeńgir kókte baýyryn jazyp ush­qany osy kezeń. Álim álemdik deńgeıdegi osy zamannyń eń ozyq on pıanısiniń qatarynan nyq ornyn alǵan. Mańdaı termen jetken aıtýly jeńis pen jetis­tiktiń bári jas talantty kemel jolǵa endi bastap keledi.

ALMATY