«Aq kımeshek kórinse, seni kórem,Aq kımeshek joǵalsa...Neni kórem?». Qaıran, Muqaǵalı osylaı jyrlap edi-aý. Sahnaǵa shyqqan ájelerdi kórgen de, aqıyq aqynnyń sol óleńi oıymyzǵa orala berdi. Osylaısha, Kóksý aýdanyna qarasty Muqyry aýylynda ótken «Aq kımeshek» ájeler baıqaýynan bir mereılenip qaıttyq.
Sáni men saltanaty jarasqan 10 áje synaqqa qatysyp, kelgen jurtty súısindirdi. Ár aýyldyq okrýgtiń namysyn qorǵaǵan ájeler baıqaý sharty boıynsha bes synnan ótip, bar ónerin ortaǵa saldy. Qazylar alqasy synǵa túsken ár ájeniń ónerine tamsanyp, laıyqty baǵalady.
Qarqara kımeshek kıip, kóneniń kózindeı bolǵan ájelerimiz tarıhtan syr shertip, ulttyń ulylyǵyn kóz aldymyzǵa ákelip, júrektiń qylyn shertti. Biri qara óleńnen aǵytsa, ekinshisi kıeli dombyrany qolǵa alyp, tebirene tolǵady.
Sonaý kelin bolyp túsken shaqtan aq ájege jetkenshe ǵumyr-tarıhyn áńgime etip ánge syıǵyzǵan ájelerdiń ónerine tańdaı qaqtyq. Baıqaýdyń ár satysynan upaı jınap, shynaıy yqylaspen qatysqan ónerpazdardyń daıyndyǵy óte joǵary eken. Nemeresiniń qulaq quryshyn qandyryp, kóńil saraıyn ashyp, tereń oıǵa batyratyn qıssany oqyǵanda kelgen jurttyń ózin elitip áketti. «Qolóner» atalymy boıynsha ákelgen buıymdaryn qorǵap, kórgen jannyń kóńilin qýanyshqa toltyrdy.
Muqyry aýylyna kún nuryndaı shýaq shashyp, kóńil kúı syılaǵan «Aq kımeshek» baıqaýynyń túıinin qoıýǵa Kóksý aýdanynyń ákimi Márlen Kólbaev, Jetisý oblysy analar keńesiniń tóraıymy Jamal Baımadıeva shyǵyp, júrekjardy sózin arnady. Ár qatysýshynyń ónerin jiktep, talanttary men talabyna bas ıgen qazylar alqasy aq jaýlyqty ájelerge rızashylyǵyn bildirdi.
«Bul synda barlyǵyńyz da jeńimpazsyzdar, jeńilgen eshkim joq. Bárińizge ártúrli atalym boıynsha báıge beriledi», degen aýdan basshysy Márlen Kólbaev 10 okrýgten kelgen ájelerdiń ıyǵyna kamzol, basyna aq jaýlyq jaýyp, arnaıy syılyqtar tabys etti.
Jetisý oblysy