Astana Qazaqstan Team velokomandasynda tórt jyl ter tógip, Qazaqstanda kenjelep qalǵan osy bir sport túriniń damýyna Olımpıada chempıony Aleksandr Vınokýrovtan keıin qaltqysyz úles qosqan áıgili Vınchenso Nıbalı resmı túrde sporttyq karerasyn aıaqtady. Jıyrma jylǵa jýyq «shaıtanarbany» janyna serik etip, talaı dúbirli dodalarda oza shapqan ıtalııalyq sańlaqtyń karerasyndaǵy sońǵy jarysy – óz elinde uıymdastyrylǵan Giro di Lombardia birkúndik velobáıgesi boldy.
Velosport áleminde «Akýla» laqap atymen áıgili bolǵan Vınchenso Nıbalı sporttyq mansabyn aıaqtaıtynyn jyldyń belortasynda-aq málimdegen edi. Qarasha aıynda 38 jasqa tolatyn ardager veloshabandoz Vınchenso Nıbalı sporttyq karerasyn 2003 jyly jergilikti Mastromarco-Chianti Sensi áýesqoı veloklýbynda bastap, 2005 jyly kásipqoılar arasynda baq synaı bastady. Bir jyldan keıin ol ataǵy dúrkirep turǵan AQSh-tyń Liquigas klýbyna aýysty. Alty jyldyń ishinde Nıbalı qajyrly eńbeginiń arqasynda velosporttaǵy iri jetistikterine qol jetkize bastady. Degenmen, onyń álemdik arenadaǵy ataǵy qazaqstandyq «Astana» klýbynyń qataryna qosylǵannan keıin shyǵa bastady. Otyz jasyna deıin eń iri úsh grand-týrdyń tek bireýinde ǵana («Ispanııa Výeltasy») top jaryp, ordasyn buza almaı júrgen Nıbalıdiń qazaq topyraǵyna tabany tıgen sátten bastap ekinshi tynysy ashyldy. Qazaqtyń qazysyn jep, qymyzyn ishken ıtalııalyq veloshabandoz amerıkalyq klýbta alty jyl júrip shyǵa almaǵan bıigin Qazaqstandaǵy nebári úsh jylynda-aq baǵyndyrdy.
Italııalyq veloshabandozdyń «Astanada» júrip qol jetkizgen tabystaryna toqtalar bolsaq, Nıbalı Qazaqstanǵa kele sala árbir ıtalııalyq veloshabandozdyń armany bolǵan «Djıro d’Italııa» jarysynda bas júldeni jeńip aldy. Araǵa úsh jyl salyp ekinshi márte jeńis tuǵyrynan kórindi. Sondaı-aq kelesi jyly velosportshylardyń beıresmı álem chempıonaty sanalatyn ataqty «Týr de Frans» dodasynda daralandy. Sonymen qatar Halyqaralyq velosıpedshiler odaǵynyń (UCI) kúntizbesine engen kópkúndik «Tırreno – Adrıatıko» (2013), «Djıro del Trentıno» (2013), «Oman týry» (2016), birkúndik «Djıro dı Lombardııa» (2019), «Mılan-San-Remo» jáne taǵy basqa dúbirli dodanyń jeńimpazy atandy.
Vınchenso 2016 jyly «Astanadan» ketip, baǵyn AQSh pen Bahreın klýbtarynda synap kórýge sheshim qabyldady. Biraq onyń bul qadamy sátti bola qoımady. Sóıtip ol alty jyldan keıin bıyl Qazaqstanǵa qaıta oraldy. О́kinishke qaraı, Nıbalı bıyl «Astana» sapynda birqatar jarysqa qatysqanymen, eshbirinde úzdikter qatarynan kórine almady.
О́tken aptada jyldyń jáne óziniń eń sońǵy jarysy – «Djıro dı Lombardııa» týryna qatysyp, máre syzyǵyn nebári 18-bolyp kesti. Aıtpaqshy, Vınchenso Nıbalımen birge bıyl 40 jastaǵy ıspanııalyq ataqty veloshabandoz Alehandro Valverde de tas jolmen qoshtasty. Keıingi 10 jylda ol tek Movistar Team (Ispanııa) velokomandasynda óner kórsetti.