Qystyń qamy qazirden

О́ńirde qalyptasqan dástúr ol jylý berý maýsymynda apattyq jaǵdaılarǵa jol bermeý, turǵyndarǵa qajetti jylý men ystyq sýdan kidiris boldyrmaý bolyp tabylady. Bul árıne, ońaı sharýa emes. Sondyqtan oblys basshylyǵy bul máseleni eń birinshi kezekte, qatań baqylaýda ustaıdy. Jylý berý maýsymy aıaqtalmaı jatyp-aq aldaǵy qysqa daıyndyq bastalyp ta ketti. Ony osy másele kún tártibine shyǵarylǵan oblystyq jıynda oblys ákiminiń birinshi orynbasary Nurmuhambet Ábdibekov jetkizdi. Onyń aıtýynsha, bul baǵyt­ta atqarylǵan júıeli jumys­tardyń nátıjesinde oblysta jy­lý berý maýsymy oıda­ǵy­daı aıaqtalǵan. Turǵyn úı-kom­mýnaldyq sharýashylyq nysandaryndaǵy jumystardy oryndaý úshin qarjylandyrýdyń barlyq kózderi esebinen 8,6 mlrd. teńge bólindi, onyń ishinde 2,1 mlrd. teńge otynnyń normatıvti qoryn jasaqtaýǵa jumsalǵan. 2013 jyly jylytý maýsymynyń oıdaǵydaı ótýi úshin 127 qazandyq, 281,7 shaqyrym jylý júıesi, 216 shaqyrym sý jelisi-káriz qubyrlary jóndeýden ótkizildi. 1905,2 shaqyrym elektr jelisiniń, sondaı-aq, 9 densaýlyq saqtaý, 161 bilim berý nysandarynyń, 1014 turǵyn úıdiń qalypty tir­shilik qyzmeti qamtamasyz etil­di. Bıýdjettik uıymdarǵa 51,4 myń tonna qatty otyn jáne 10,7 myń tonna dızel otyny jet­kizildi. Byltyr Aqtóbe, Alǵa qalalarynda, Shubarqudyq poselkesinde jylý jelileri qaıta qurylymdaldy. «Transenergo» AQ-ta jóndeý jumystaryn júr­gizýge bıýdjetten qarjy bólý sharalary qabyldandy, sonyń nátıjesinde 12,6 shaqyrym jylý jelisi jańǵyrtyldy. Qazirgi ýaqytta jergilikti bılik organdary keler qystyń qamyn oılastyrýda. Atqa­rylatyn sharýalar az emes. Onyń ishinde kúrdeli jumystar da jetkilikti. Ústimizdegi jyly 153 bý qazany, 237,8 shaqyrym jylý jelisi, 114,3 shaqyrym sý-káriz qubyry, 557,5 shaqyrym elektr jelisi , 194 bilim, 56 densaýlyq saqtaý jáne 64 basqa da áleýmettik nysan, 51 kóp qabatty turǵyn úı jóndelýi tıis. Bul rette «Energosıstema» JShS, «QazTransGaz Aımaq» AQ oblystyq fılıaly, «Aqtóbe jylý-elektr ortalyǵy», «Aqbulaq», «Transenergo» aksıonerlik qoǵam­darynyń aldaǵy qysqy merzimde qalypty jumys isteýiniń naqty sharalary alynýda. Qajetti qarjy bólinip, jóndeý jumystary áne-mine bas­talady dep kútilýde. Satybaldy SÁÝIRBAI, «Egemen Qazaqstan». Aqtóbe oblysy.