Búginde Almaty qalasynda 25-ke jýyq áskerı-patrıottyq klýb tirkelgen. Solardyń biri – II Dúnıejúzilik soǵys jyldarynda Lenıngradty qorǵaýǵa qatysqan ataqty kreıserdiń atymen atalatyn «Kırov» áskerı-patrıottyq klýby.
Jaqynda klýb jetekshisi Baqytjan Perimbet О́ńirlik kommýnıkasııalar qyzmetiniń baspasóz ortalyǵynda jas patrıottardy tárbıeleýdiń qyr-syrymen bólisti. Onyń aıtýynsha, áskerı klýbtarǵa balalar tegin qatysa alady. Áskerı-patrıottyq klýbta 150-den astam tárbıelenýshi bolsa, onyń kópshiligi tolyq emes otbasynan shyqqan, qatarda jetim balalar da bar.
Klýb 2014 jyldan beri jumys istep keledi. Teńiz deńgeıinen 4 myń metr bıiktiktegi shyńdardy baǵyndyryp, áskerı daıyndyqty «Jas sarbaz» shatyrly lageri aıasynda júzege asyryp otyrǵan klýb músheleri qyraǵy kúzetke qaı kezde de daıyn bolý kerektigin aıtady.
Klýbta desantshylar, jas shekarashylar, teńizshiler jasaǵy bar. Úıirmege 7-18 jas aralyǵyndaǵy balalar qabyldanady.
Jas sarbazdar jetekshisiniń aıtýynsha, túlekterdiń 20 paıyzy 9-synyptan keıin «Arystan», B.Momyshuly atyndaǵy «Jas ulan» mektebine, al 11-synyptan keıin UQK Shekara akademııasyna nemese Áskerı baılanys ınstıtýtyna nemese Qurlyq áskerleriniń Áskerı ınstıtýtyna túsedi. Bıyl bolashaǵyn elimizdiń Qarýly Kúshterimen baılanystyrǵysy keletin 25 túlek daıyndyǵyn aıaqtaýǵa jaqyn.
«Kırov» áskerı-patrıottyq klýbynda taý týrızmi men alpınızm seksııalary jumys isteıdi. Jas patrıottar Qazaqstan men Qyrǵyzstan shekarasyndaǵy shyńdardy batyrlardyń esimimen ataýdy maqsat etken. Mysaly, ótken jyly jas sarbazdar ózderi baǵyndyrǵan shyńdy Álııa Moldaǵulovanyń esimimen atasa, kelesi bir shyńǵa qara maıor Borıs Kerimbaevtyń esimi berildi. Bul tizimde Qasym Qaısenov atyndaǵy shyń da bar. Bıyl jas sarbazdar 4 myń metrden asatyn shyńǵa shyǵyp, oǵan Raqymjan Qoshqarbaev pen Grıgorıı Býlatov esimin berdi. Sonymen qatar bul tizimde «Qazaqstan Respýblıkasy Qarýly Kúshterine – 30 jyl» degen shyń da bar. Búginde jas sarbazdar áskerı qyzmet salasy ardagerlerinen alǵan alǵashqy medaldaryn maqtan etedi.
«Jas sarbazdardyń dene tárbıesinde taý týrızminiń róli zor. «Shyǵys» shekara qyzmeti men Ulttyq qaýipsizdik komıtetiniń shekara akademııasymen jasalǵan memorandým aıasynda Úlken Almaty kóli mańyndaǵy Ozernoe shekara zastavasynda akademııanyń oqytýshylary jazǵy demalysta jas sarbazdardy taý daıyndyǵynan ótkizip, qaýipti aımaqtardy eńserýge, radıobaılanys, zardap shekkenderdi baǵdarlaý jáne evakýasııalaýdy úıretedi. Jas sarbazdar, sonymen birge qutqarý qyzmetiniń jattyǵýlaryna da mashyqtanýda. Taýda serýenge shyqqandar ishinde qıyn jaǵdaıǵa tap bolatyndar kóp kezdesedi», deıdi klýb jetekshisi.
Ádette, jas sarbazdar úshin taý ekspedısııalary jeti kúnge sozylady. Balalardyń arasynda 9 jastaǵy mektep oqýshylary da bar. Olar týǵan jerdiń taý-tasymen tanysyp qana qoımaı, kóptegen qıyndyqty eńserýge mashyqtanady. Sonymen qatar týǵan eline degen súıispenshiligi artady. «Sondyqtan 5-11 synyptar arasynda «Jas sarbazdyń» áskerı-patrıottyq sabaqtaryn barlyq bilim mekemesinde uıymdastyrý qajet. Áskerı-patrıottyq tárbıe sabaǵyn da jıi ótkizgen abzal. Japon elinde joǵary nátıjesin berip otyrǵan mundaı daǵdyny elimizdegi jastar men jasóspirimder arasynda nasıhattaý mańyzdy», deıdi klýb jetekshisi.
Jas sarbazdar óz kezeginde áskerı-patrıottyq klýbtaǵy jattyǵý tártipterimen tanystyryp, dombyrada qazaqtyń kúıi men «Katıýsha» kompozısııasyn oryndady.
ALMATY