Zeınep Taǵaıqyzy 1956 jyly 8 naýryzda Saryaǵash aýdanyndaǵy Yntymaq aýylynda dúnıege keldi. 1978 jyly Tashkent farmasevtıkalyq ınstıtýtyn «provızor» mamandyǵy boıynsha bitirgen soń eńbek jolyn Abaı ortalyq dárihanasynda bastady. Osy jerde taban aýdarmastan 1993 jylǵa deıin tabysty jumys istedi. Osy aralyqta ózin bilikti maman, sheber uıymdastyrýshy retinde kórsete bildi.
1994 jyly jeke kásipkerlikke oıysyp, aýdannan jeke dárihana jelilerin iske qosty. Halyqqa qajetti dári-dármekterdi ýaqtyly jetkizip, aýyldyq, aýdandyq aýrýhanalar men dárihanalardy sapaly medısınalyq buıymdarmen qamtamasyz etti. Al arada bes jyl ótkende kópsalaly «Nurbolat» óndiristik kooperatıvin quryp, aýyl sharýashylyǵy, qurylys, halyqqa qyzmet kórsetý salalarynda irgeli isterge iz saldy.
Z.Ospanova munymen toqtap qalǵan joq. 2004 jyly Abaı aýylynda dári-dármek saqtaıtyn qoıma salsa, 2011 jyly osy aýylda medısınalyq ortalyq ashty. Úsh jyldan soń Saryaǵash qalasynda «Nurbolat» emdeý ortalyǵyn iske qosty. Búginde ortalyqtyń 115 adamdy jumyspen qamtyp otyrǵanyn atap ótken jón.
Zeınep Taǵaıqyzy 2003-2007 jáne 2007-2011 jyldar aralyǵynda Saryaǵash aýdandyq máslıhatynyń eki shaqyrylymyna depýtat bolyp saılandy. Saılaýshylar amanatyn arqalaı júrip, aýdan aýmaǵyndaǵy qaıyrymdylyq is-sharalaryna belsene atsalysty. Osy eńbekteri úshin aýdan basshylyǵy tarapynan kóptegen marapatqa ıe boldy.
О́kinishke qaraı, alty ul-qyz tárbıelep ósirgen, 19 nemerege súıikti áje bolǵan aıaýly ana, adal jar 67 jasqa qaraǵan shaǵynda ómirden ozdy. Biraq artynda kóptegen ıgi de izgi isteri qaldy. Syrtqy sulýlyǵy men ishki jan dúnıesi qatar qabysqan tájirıbeli de isker maman Zeınep Taǵaıqyzynyń jarqyn beınesi áriptesteriniń júreginde árdaıym saqtalady.
«Damý» Ońtústik Qazaqstan oblysynyń farmasevtıkalyq jáne
medısınalyq uıymdar qaýymdastyǵy