Senattyń Áleýmettik-mádenı damý jáne ǵylym komıtetiniń depýtattary Astana medısına ýnıversıtetine baryp, oqý ordasynyń ujymymen kezdesti. Kezdesýdiń maqsaty – bilim berý mekemesiniń qyzmetimen tanysý jáne otandyq densaýlyq saqtaý salasynyń damý barysyn zerdeleý.
Sapar barysynda senatorlarǵa radıobıologııa jáne radıasııalyq qorǵaý ınstıtýtyndaǵy jumystar kórsetildi, sondaı-aq stýdentterdiń alǵan bilimin is júzinde pysyqtaıtyn sımýlıasııalyq ortalyqtyń qyzmeti týraly aıtyldy.
Qazir joǵary oqý ornynda 10 myńnan asa jas oqıdy, onyń ishinde jaqyn jáne alys sheteldegi 20 elden kelgen 1 100 sheteldik stýdent bar.
Senat komıtetiniń tóraǵasy Narıman Tóreǵalıev ýnıversıtet joǵary bilikti qyzmetkerlerdi daıarlaýmen qatar salanyń damýyna eleýli úles qosyp kele jatqanyn atap ótti.
«Astana medısına ýnıversıtetine sapar Prezıdenttiń «Jańa Qazaqstan: jańarý men jańǵyrý joly» atty Qazaqstan halqyna Joldaýyn iske asyrý aıasynda «Densaýlyq saqtaýda ǵylymnyń, bilimniń jáne klınıkalyq praktıkanyń birtutastyǵy: jaı-kúıi, problemalary jáne sheshý joldary» taqyrybyndaǵy dóńgelek ústelge ázirlik barysyndaǵy sharalardyń bir bóligi bolyp sanalady. Osyndaı kezdesýlerde kóteriletin barlyq máseleler men problemalardy aldaǵy ýaqytta tıisti memlekettik organdardyń aldyna qoıatyn bolamyz», dedi depýtat.
Depýtattar kezdesýdi qorytyndylaı kelip, sapardyń mańyzdy ári nátıjeli bolǵanyn atap ótti. Olardyń pikirinshe, qatysýshylardyń árqaısysy zańnama erejelerin iske asyrý týraly jan-jaqty túsinik aldy.