Almaty oblysy ekige bólingennen keıin, jalpy Jetisýda kúrish ósiretin jalǵyz aýdan qaldy. Bul – Qaratal aýdany. Bıyl aýa raıy dıqandar úshin qolaıly boldy, dándi daqyldar da bitik shyqty.
Qaratal aýdany ákimdiginiń málimetine súıensek, aýdanda 24 800 gektar sýarmaly egistik bolsa, sonyń 8 myń gektary – dándi daqyl. Byltyr kúrish 800 gektarǵa egilse, bıyl 950 gektardan ónim jınaldy. Jer yńǵaıy men klımattyq ereksheligine qaraı dándi daqyldyń osy túrimen munda 3 iri sharýashylyq jáne onǵa jýyq shaǵyn sharýa qojalyǵy aınalysady.
Qarataldaǵy kúrish ósirýmen aınalysatyn iri fermerlerdiń biri – «Úshtóbe» JShS. Onyń dırektory – Arman Ahmetbaev. Jıyrma jyldan astam ýaqyttan beri eginshilikti kásip etken sharýashylyqtyń 1 351 gektar jeri bar. Onda maıburshaq, dándi daqyldar men mal azyǵy egiledi. Bıyl kúrishti 260 gektarǵa seýip, odan 1 100 tonnadan astam dán jınady. О́nimniń ortasha shyǵymy gektaryna 40 sentnerdi qurap otyr.
«Burnaǵy jyldarǵa qaraǵanda, bıyl sý jetkilikti, aýa raıy da qolaıly boldy. Soǵan qaraı ónim jaqsy shyqty. Qazir jıyn-terin naýqany aıaqtalyp qaldy. Daqyldy sabaǵynan kesemiz, bir aptadaı alqapta kún astynda jatyp qýraǵan soń kúrish dáni jınalady. Sosyn qoımaǵa aparyp bastyramyz. Seriktestiktiń sehynda qaptap, naryqqa jóneltemiz. О́nimimiz negizinen jergilikti turǵyndarǵa saýdalanady, Jetisý men Almaty oblysynyń saýda oryndaryna jiberiledi», deıdi seriktestik dırektory A.Ahmetbaev.
Onyń aıtýynsha, kúrish alqabynda aýyspaly egis talaby qatań saqtalady. Osy maqsatta kúrish byltyrǵa qaraǵanda bıyl azaıtylyp, 260 gektarǵa egilse, kelesi jyly onyń kólemi qaıtadan 500 gektarǵa jetkiziledi.
Aýdandaǵy kúrish baǵytyndaǵy servıstik daıyndaý ortalyǵy osy sharýashylyq bazasynda, ıaǵnı onda jańa 11 aýyl sharýashylyǵy tehnıkasy shoǵyrlanǵan. Al jalpy, seriktestiktiń ózinde 6 kombaın, 23 traktor bar. Sharýashylyqta 18 adam jumys isteıdi.
«Bizde kúrishtiń qyzylordalyq «Iаntar» jáne ırandyq «Kýsar» suryptary egiledi. Bul eki sortqa belgili sebeppen toqtaldyq. Aýdanymyz salystyrmaly alǵanda soltústik aımaqta ornalasqandyqtan jáne Qaratal ózeniniń basynda otyrǵandyqtan, alqap sýaratyn sý jylyp úlgermeıdi. Bizdiń osyndaı ereksheligi bar klımatymyzǵa osy eki sort qolaıly. О́nim sapasyn tómendetip almaý úshin eki jylda bir ret tuqymdy jańartyp otyramyz. О́zim zeınetke shyqqanmyn, biraq sharýashylyqqa kómektesip, tájirıbemdi jastarǵa úıretip kelemin», deıdi seriktestiktiń agronomy Vılorıı Soı.
Jetisý oblysy ákiminiń baspasóz qyzmetiniń málimetinshe, memleketten tuqymǵa, tyńaıtqyshtarǵa, gerbısıdke beriletin sýbsıdııa sharýalarǵa edáýir kómek bolǵan. Oǵan qosa aýdanǵa kóktemgi jáne kúzgi jıyn-teringe 800 tonna arzandatylǵan dızel otyny bólinse, sonyń 80 tonnasyn osy «Úshtóbe» JShS kádesine jaratqan. Osy rette bıyl oblysta aýyl sharýashylyǵyn qoldaýǵa 27,9 mlrd teńge bıýdjet qarajaty bólingenin, onyń 23,2 mlrd teńgesi sýbsıdııaǵa jumsalǵanyn atap ótýge bolady.
Aıta keteıik, Qaratal aýdanynda 1 183 aýyl sharýashylyǵy taýar óndirýshisi bar, sonyń 400-i eginmen, 450-i mal ósirýmen aınalysady. Oǵan qosa 333 aralas sharýashylyq pen 12 jaýapkershiligi shekteýli seriktestik tirkelgen.
Jetisý oblysy,
Qaratal aýdany