Jetisý oblysy Eskeldi aýdanyna qarasty Shymyr aýylynda Keńes Odaǵynyń Batyry Mánshúk Mámetovanyń 100 jyldyǵyna arnalǵan rýhanı is-shara ótti.
Sol alaqandaı aýylda qaısar qyzdyń atyndaǵy orta mektep bar. Bıyl ashylǵanyna 90 jyl, al batyrdyń atyn ıemdengenine 60 jyl tolyp otyr. Aıtýly merekeni joǵary dárejede atap ótken bilim ordasy qan maıdanda erlikpen qaza tapqan babalardyń rýhyna taǵzym jasap, máńgilik alaýǵa gúl shoǵyn qoıýdan bastady. Áskerı kıim kıgen jas sarbazdar Memlekettik Týdy ákelip, Gımn shyrqaldy. Batyr qyzdyń esimin asqaqtatý arqyly ózderiniń de týǵan el men ósken jerge qyzmet etýge daıyn ekendikterin baıqatty.
Shara barysynda Eskeldi aýdandyq máslıhatynyń hatshysy Qanat Satanov, Shymyr aýyly aqsaqaldar alqasynyń tóraǵasy Ernazar Aıtqalıuly, aýdandyq bilim bóliminiń sektor meńgerýshisi Sholpan Jaqanova júrekjardy tilekterin arnap, óskeleń urpaqqa Mánshúk Mámetovanyń erligi jaıly aıtyp berdi.
Qadirmendi qonaqtardyń tileginen keıin mektep oqýshylary shaǵyn kórinis qoıdy. Qan maıdanda fashıstik Germanııaǵa qarsy turǵan otandas- tarynyń qatarynda bolǵan jáne óshpes erlikpen daralanǵan Mánshúk Mámetovanyń rólin beınelegen oqýshylar kópshilikti tánti etti. Naǵyz qazaq qyzynyń boıyndaǵy qaısarlyq pen batyrlyqty tap basyp kórsetken oqýshylardyń óneri júrekti syzdatyp, tula boıymyzdy shymyrlatty. Úsh birdeı ataýly kúnge oraılastyrylyp ótken merekede mektep oqýshylary belsendilikterimen kózge tústi. Patrıottyq ánder oryndalyp, keshti tamashalaǵan qonaqtarǵa úlken áser syılady. Sonymen qatar Mánshúk Mámetovanyń týǵan ólkesi Oral óńirimen beınebaılanys ornatylyp, batyr qyzdyń ómirin zerttep júrgen murajaı qyzmetkerleri quttyqtaý joldady. Kesh qonaqtaryna tarıhı derekterden syr shertti.
Mektep dırektory Raýshan Meıirbekova saltanatty jıynnan keıin kelgen qonaqtardy foıede qoıylǵan sýret kórmesimen tanystyrdy. Birneshe taqyrypqa bólingen mádenı keshte «Qazaqtyń qaharman qyzy» atty taqyrypta uıymdastyrylǵan kitap kórmesi de kóptiń kóńilinen shyqty. Mektepishilik mereke aıasynda «Mánshúk Mámetova – qazaqtan shyqqan áıgili pýlemetshi», «Qazaqtyń qaısar qyzy» taqyrybynda ashyq tárbıe saǵattary ótip, «Erlik eshqashan umytylmaıdy» atty patrıottyq ánder baıqaýymen jalǵasty. Bir kúnde birneshe is-sharany qolǵa alǵan mektep ujymy «Mánshúk – halqymyzdyń batyr qyzy» taqyrybynda aýdandyq áskerı-sporttyq spartakıada da ótkizdi. Oǵan aýdannyń 7 mektebinen oqýshylar qatysyp, áskerı-sporttyq jattyǵýdyń 6 túrinen synǵa tústi.
1932 jyly qurylǵan shaǵyn ǵana mektep búginde zaman talabyna saı úlken bilim ordasyna aınalyp otyr. Munda 70 ustaz qyzmet atqarsa, 500 oqýshy bilim alady. Batyr qyzdyń esimin arqalaǵan bilim ordasynyń kórsetkishi jaman emes. О́tken jyly 3 túlegi úzdik attestat alyp, UBT-dan jaqsy nátıje kórsetken. Al jalpy aýdan UBT deńgeıi boıynsha 74,3 paıyzǵa qol jetkizgen.
Orta mektepten túlep ushqan túlekter búginde respýblıkanyń ár túkpirinde túrli qyzmetter atqaryp júr. Mektep ujymy zań, bilim, medısına, sport salasynda ózindik qoltańbasy bar shákirtterimen maqtanady. Sondaı úzdik oqýshylarynyń biri – Qarjy mınıstriniń orynbasary Danııar Janalınov.
Mánshúk Mámetovanyń 100 jyldyǵyna oraı ótken patrıottyq-mádenı sharaǵa mektepti bitirip ketken túlekter demeýshilik jasaǵan. Kesh sońynda batyr qyzdyń rýhyna arnalyp as berildi. Otan úshin ot keshken jannyń erligi men órligin, eli men jerin súıetinin pash etken, jas urpaqty da soǵan úndeıtin basqosý patrıottyq notada aıaqtaldy.
Jetisý oblysy