Malaızııada ótip jatqan «Langkavı týrynyń» altynshy kezeńinde Astana Qazaqstan Team komandasynyń shabandozy Gleb Sırısa máre syzyǵyn ekinshi bolyp kesti.
Jarystyń altynshy kezeńi Malaızııadaǵy Pınang shtatynyń astanasy – Djordjtaýn qalasynan bastalyp, Alor-Setarda óz máresine jetti. 120,4 shaqyrymdyq jazyq aımaqta ótken básekede norvegııalyq veloshabandoz Erlend Blıkra (Uno-X Pro Cycling Team) top jardy. Ol máre syzyǵyn 2 saǵat 49 mınýt 49 sekýnd ishinde kesti. Odan sál ǵana qalyp qoıǵan Gleb Sırısa ekinshi satyǵa jaıǵasty. Bul – «Astana» sapyndaǵy reseılik legıonerdiń osy jarystaǵy úshinshi iri jetistigi. Buǵan deıin ol velokópkúndiktiń birinshi kezeńinde jeńimpaz atansa, ekinshi jarys kúninde márege ekinshi bolyp jetken edi. Altynshy kezeńde germanııalyq Rıýdıger Zelıg (Lotto Soudal) úshinshi satyǵa turaqtady.
Jalpy esepte 24 jastaǵy kolýmbııalyq Ivan Sosa (Movistar Team) tórt kezeńnen beri eshkimge jetkizbeı keledi. Onyń ýaqyty – 21:06:03. Ekinshi oryndaǵy brıtanııalyq Hıý Kartı (Ef Education – Easypost) kóshbasshydan 22 sekýndqa qalyp tur. Úzdik úshtikke taǵy bir kolýmbııalyq veloshabandoz Eıner Aýgýsto Rýbıo Reıes (Movistar) jaıǵasty.