Qazaqstan – forým tóraǵasy

Qazaqstan Respýblıkasy ornyqty damý jónindegi Azııa-Tynyq muhıty forýmynyń tóraǵasy bolyp taǵaıyndaldy. Bul sheshim 2014 jyldyń 19-21 mamyr kúnderi Pattaııa (Taıland) qalasynda ótken forýmnyń 5-shi sessııa barysynda qabyldandy, dep habarlady QR SIM-iniń baspasóz qyzmeti. Basty maqsattarynyń biri ekono­mıkalyq, áleýmettik, qarjy jáne qorsha­ǵan ortany qorǵaý salalaryn damytý máse­lelerine qatysýǵa álem elderin ynta­landyrý bolyp tabylatyn forým jumysyna óńir elderi, qyzyǵýshylyq tanytqan damý ınstıtýttary, ǵylymı jáne qarjylyq, sondaı-aq, ındýstrııa jáne bıznes uıymdarynyń ókilderi qatysty. Forýmǵa Qazaqstan Respýblıkasynyń Qorshaǵan orta jáne sý resýrstary vıse-mınıstri Bektas Muhamedjanov qatysty. Ol planetarlyq shektik kórsetkishter sheńberindegi birlesip damý máseleleri jónindegi sessııa men mınıstrlerdiń «dóńgelek ústel» otyrysyn ótkizdi. Atalǵan forýmdy BUU Azııa jáne Ty­nyq muhıt memleketteri úshin ekono­mıkalyq jáne áleýmettik komıssııasy damý máseleleri boıynsha aımaqtyq únqa­tysýdy qoldaý maqsatynda uıym­dastyrady. Shara barysynda Azııa-Tynyq mu­hı­ty mehanızminiń, sondaı-aq, osy aımaq­tyń damýy jónindegi BUU keńesiniń is-áreketteriniń nátıjeleri qarastyryldy. Sonymen qatar, joǵary deńgeıde ótetin dúnıejúzilik saıası forýmda 2015 jyldan keıingi merzimge arnalǵan myńjyldyq damý maqsattary aıasynda talqylanatyn máseleler pysyqtaldy.