Qazaqstan Respýblıkasy Prezıdentiniń janyndaǵy Adam quqyqtary jónindegi komıssııanyń músheleri Komıssııa tóraǵasy Qýanysh Sultanovtyń basshylyǵymen elordadaǵy №4 emhanada bolyp qaıtty.
Astana turǵyndary ambýlatorlyq túrde em qabyldaıtyn emhanaǵa barýdyń negizgi maqsaty jalpy emdeý mekemesiniń jaǵdaıymen, azamattardyń Qazaqstan Respýblıkasynyń Konstıtýsııasy men «Halyqtyń densaýlyǵy jáne densaýlyq saqtaý júıesi týraly» Kodeksinde, Qazaqstan ratıfıkasııalaǵan Ekonomıkalyq, áleýmettik jáne mádenı quqyqtar týraly halyqaralyq paktide kepildik berilgen quqyqtarynyń saqtalýymen tanysý bolatyn.
Elbasy janyndaǵy Adam quqyqtary jónindegi komıssııa músheleri dárigerlermen jáne pasıenttermen áńgimelesý barysynda azamattardyń densaýlyǵyn qorǵaýǵa jáne bilikti ári qoljetimdi medısınalyq kómek alýǵa konstıtýsııalyq quqyqtaryn qamtamasyz etý, dárigerler men basqa da medısınalyq qyzmetkerlerdiń áleýmettik-quqyqtyq qorǵalýy, olardyń Eýropalyq Odaq elderinde jáne álemniń basqa da damyǵan elderinde biliktilikterin kóterý máselelerine erekshe kóńil bóldi.
Sapar barysynda Komıssııa músheleri Astana qalalyq Densaýlyq saqtaý basqarmasyna atalǵan emhananyń oń jumys tájirıbesin elordanyń jáne elimizdiń basqa da emdeý mekemelerine taratýdy usyndy.
Emdeý mekemesinde bolǵan saparda jınalǵan materıaldar Komıssııanyń Elbasynyń qaraýyna usynatyn «Qazaqstan Respýblıkasyndaǵy adam quqyqtarynyń ahýaly týraly» baıandamasynyń «Azamattardyń densaýlyǵyn qorǵaýǵa jáne bilikti medısınalyq kómek alýǵa konstıtýsııalyq quqyqtary» bólimine engiziletin bolady.
Bul is-shara Qazaqstan Respýblıkasy Prezıdentiniń janyndaǵy Adam quqyqtary jónindegi komıssııanyń 2014 jylǵa arnalǵan jumys josparyna sáıkes júrgizildi.
«Egemen-aqparat».