Atyraýda bir otbasynyń alty adamy, onyń ishinde tórt bala gazdan ýlanyp, 90 jastaǵy áje qaıtys boldy. Bul týraly TJD qalalyq departamenti basshysynyń orynbasary Magomed Ahrıev aıtty, dep habarlaıdy Egemen.kz.
«Tótenshe jaǵdaılar departamentiniń kezekshi qyzmetine jedel járdem stansııasynan qońyraý tústi. Dárigerler Atyraý qalasynyń aýrýhanalaryna tabıǵı gazdan ýlanǵan alty adamnyń túskenin habarlady. Úsh bala men bir jasóspirim balalar aýrýhanasyna, eki eresek oblystyq emhanaǵa jetkizildi. 90 jastaǵy áje gazdan ýlanyp qaıtys boldy, ony qutqarý múmkin bolmady. Medısınalyq kómek kórsetilgennen keıin zardap shekkender ózderin jaqsy sezindi», dedi Magomed Ahrıev.
Ýlanýǵa sebep, gazdyń janý ónimderi syrtqa aǵyzylatyn gaz qazandyǵynyń qubyry tot pen qoqysqa tolyp qalǵan. Nátıjesinde gaz bólmelerge taraı bastaǵan.
«Toǵyz aıdyń ishinde oblysta tabıǵı gazdan ýlanýdyń toǵyz jaǵdaıy tirkeldi. О́tken jyly dál osy merzimde jeti oqıǵa tirkelgen edi», dedi Magomed Ahrıev.