Oblystyq ishki saıasat basqarmasynyń uıymdastyrýymen qoǵamdyq sanany jańǵyrtý baǵdarlamasynyń basymdyqtaryn júzege asyrý maqsatynda óńirimizdiń bir top jastary elimizdiń ejelgi qalalarynyń biri sanatyndaǵy – Tarazdyń tarıhı nysandarymen tanysyp qaıtty.
Jas kókirektegi rýhanı baılyqtyń eselengeni, kókjıeginiń keńigeni qandaı tamasha. Bilmekke qumar toptyń quramynda jastar uıymdarynyń kóshbasshylary, belsendiler men eriktiler, jastarmen jumys isteıtin árqıly mekemelerdiń qyzmetkerleri boldy. Olar eki myń jyldyq tarıhy bar kóne Taraz qalasynyń ýaqyt shymyldyǵy kólegeılegen qısapsyz mádenı eskertkishterimen tanysyp, este joq eski kezeńniń san-salaly sorabyn aralap, zamananyń jarqyn beınesin kóńilderine toqyp oraldy. Qazir erekshe esterinde qalǵan Aısha bıbi kesenesi týraly aýyzdarynyń sýy quryp áńgimelep júr. Aısha bıbi kesenesi – Orta Azııa aýmaǵynda ǵana emes, IýNESKO-nyń adamzattyń asa qundy jáne sáýlet eskertkishiniń tizimine engen jalǵyz eskertkish.
Joba barysynda Aqmola oblysynyń delegasııalary «Aqyrtas», «Tekturmas» etno-tarıhı keshenderi men «Shahrıstan» tarıhı-mádenı kesheninde, Áýlıe ata meshiti men Qarahan kesenesinde bolypty. Ǵashyqtar alleıasyn aralap, Jeńis saıabaǵynda tynystaǵan. Qazaq handyǵynyń 550 jyldyǵy qurmetine ornatylǵan monýment túbinde oıǵa shomyp, el erteńin túısingen. Jalǵyz ótkenniń ónegesin ǵana emes, bolashaqtyń baǵdaryn da baǵamdaǵan. Qalaı bolǵan kúnde de ıgi sapardan tarıhı tanymdaryn keńeıtip, kókirekterinde týǵan jerge degen súıispenshilikti molaıtyp oralǵandary anyq. Bul bir rýhanı álemimizdi nurlandyrǵan, jan-dúnıemizdi elimizdiń ótken tarıhymen kemeldendirgen sátti sapar boldy desedi olar.
Aqmola oblysy