Prezıdent saılaýyna az ýaqyt qaldy. Turǵyndar arasynda mańyzdy naýqan jaıly pikirler kóp. Bul rette, túrli qoǵamdyq uıymdar arnaıy saýaldama júrgizip, halyqtyń oıyn saralap kórdi.
«Qoǵamdyq pikir» ǵylymı-zertteý ınstıtýty júrgizgen áleýmettik saýaldamaǵa sáıkes, suraq-jaýapqa qatysqan qazaqstandyqtardyń 73,1 paıyzy «2022 jyldyń 20 qarashasynda ótetin prezıdent saılaýyna baramyn» dep jaýap bergen. Bir sheshimge kelmegen respondentterdiń úlesi 15,9 paıyzdy quraıdy. 9,7 paıyzynyń daýys berýge nıeti joq. Respondentterdiń 1,3 paıyzy suraqqa jaýap berýge qınalǵan.
Al qatysýshylardyń 76,1 paıyzy saılaýdyń ádil ótetinine senim bildirdi. Dálirek aıtsaq, 48,3 paıyzy «naqty ádil ótedi» dep jaýap berse, 27,8 paıyzy «ádil ótýge tıis» degen pikir bildirgen. Prezıdenttikke kandıdattyń boıynda qandaı qasıetter bolýy kerek degen suraqqa: «ádeptilik, adaldyq, joǵary bilimdilik, qazaqstandyqtar arasyndaǵy bedeli joǵary bolýǵa tıis» degen jaýaptar túsken.
«Qoǵamdyq pikir» ǵylymı-zertteý ınstıtýty áleýmettanýlyq zertteýdi bıyl 6-10 qazan aralyǵynda júrgizdi. Saýaldamaǵa 17 oblys pen respýblıkalyq mańyzy bar qalalardan (Astana, Almaty jáne Shymkent) 18 jastan asqan 1 200 respondent qatysty. Zertteýde telefon arqyly saýaldama ádisi qoldanyldy. Saýaldama Ortalyq saılaý komıssııasynyń 2022 jylǵy 30 qyrkúıektegi №OSK-08-18/1179 habarlamasyna sáıkes, OSK-niń resmı ruqsatymen ótkizildi.
Infografıkany jasaǵan Amangeldi Qııas, «EQ»