Búgin Ázerbaıjannyń Shýsha qalasynda Túrki memleketteri uıymy Múftıler keńesiniń erejesi bekitilip, din basshylary qol qoıý rásimin ótkizdi, dep habarlaıdy Egemen.kz.
Osylaısha keńes aıasynda birlesken deklarasııa qabyldandy. Jıynda sóz alǵan QMDB Tóraǵasy, Bas múftı Shýshadaǵy tarıhı basqosýdyń mańyzyna toqtaldy.
«Qadirli baýyrlar! Búgin ózderińizben birge Túrki memleketteri uıymyna múshe elderdiń musylmandar basqarmalarynyń basshylary osy qalada erejeni bekitip, qol qoıyldy. Endi Túrki memleketteri múftıleri osy ereje aıasynda birigip is qylady. Biz buǵan deıin Túrkııanyń Stambul, Qazaqstannyń rýhanı astanasy Túrkistan qalasynda bas qostyq. Jıynda Túrki elderiniń jumys jospary talqylandy.
Búgingi Ázerbaıjan jerindegi úshinshi otyrysta Keńestiń Erejesi tolyq bekitildi. Bastamaǵa qoldaý kórsetken barshańyzǵa Alla razy bolsyn! Ereje aıasynda aldaǵy ýaqytta birqatar iri jobalar, dinı teris aǵymmen kúres, tarıhı qundylyqtardy túgendeý, Ǵulamalar keńesiniń jıynyn ótkizý, babalar jolyn jańǵyrtý jumystary kútip tur. Sondyqtan keńes jumysyna tabys tileımin», dedi Bas múftı.
Aıta keteıik, keńes erejesinde negizinen túrki dúnıesine ortaq qundylyqtardy dáripteý, otbasy, salt-dástúr, túrki elderinen shyqqan din qaıratkerlerin nasıhattaý, jat aǵymmen kúres, birlese sımpozıým men konferensııalar uıymdastyrý, dinı ádebıetter men túrki tilderinde taraǵan shyǵarmalardy tanytý, Ǵulamalar keńesiniń jumysyn ótkizý syndy máseleler qamtyldy.