Qalalyq ákimdiktiń jáne Halyqty jumyspen qamtý ortalyǵynyń qoldaýymen Almaty qalasynda bos jumys oryndarynyń jármeńkesi ótti.
Jármeńkede jastar men oqý oryndaryn támamdaǵan túlekterdi, sondaı-aq jumysshylardy kóptep kezdestirýge bolady. Olardyń deni ónerkásip, óndiris oryndary, saýda jelileri, azyq-túlik, medısına, bilim berýmen aınalysatyn kásiporyndar men uıymdardyń mamandary tarapynan qajetti aqparat alsa, endi biri saýaldamadan ótip, jańa jumys oryndarynyń múmkindigimen tanysty.
Halyqty jumyspen qamtý ortalyǵy dırektorynyń orynbasary Nurjan Aýtalıevtiń aıtýynsha, búginde qyzmet kórsetý salasynda mamandar jetispeıdi. Qalalyq deńgeıde uıymdastyrylǵan jármeńkege 160 jumys berýshi qatysyp, 3 myńnan asa bos jumys oryndary usynylǵan. Azamattardyń jekelegen sanattary boıynsha jumys izdep kelgen múgedekter, probasııalyq esepte turǵandar, bas bostandyǵynan aıyrý oryndarynan bosatylǵandar, alıment boıynsha boryshkerler jumyspen qamtý sharalarymen tanysty. Jármeńkege azamattardyń jekelegen sanattaryna arnalǵan jumys oryndary boıynsha kvotalary bar jumys berýshiler qatysty. Osy oraıda búginde qaryzy 3 mlrd teńgeden asatyn jumyssyz boryshkerlerdiń jármeńke alańynan bos jumys oryndaryn qarastyrýǵa múmkindigi de eskerilip otyr.
Almaty qalasynda turaqty tirkeýdegi jumyssyz azamattardyń qysqamerzimdi kýrstardan ótý múmkindigi bar. Halyqty jumyspen qamtý ortalyǵyna jumyssyzdyq boıynsha tirkelgennen keıin kásiptik baǵdar alýǵa joldama beriledi. Osy joly jármeńkege 3 myńnan asa adam jumys izdep kelse, myńnan astamy jumysqa ornalasýǵa joldama aldy. Resmı derek boıynsha qalada jumys izdep júrgenderdiń sany 50 myńnan asady.
«Kazlegprom» JShS maman jónindegi menedjeri Dına Iskakova kásiporynda tiginshiler, ásirese aıaqkıim tigetin er adamdardyń jetispeıtinin alǵa tartty. Mektep formasy, áskerı jáne arnaıy kıimder, aıaqkıim tigýge mamandanǵan kásiporyn jylyna 1,5 mln túrli tigin buıymdary men 500 myń jup aıaqkıim shyǵarady. Munda jumysshynyń aılyq jalaqysy – 250-350 myń teńge aralyǵynda. Jumysshy mamandaryn oqytatyn kolledjder Almaty tehnologııalyq ýnıversıtetimen kelisimshartqa turǵan. Alaıda oqý ornyn bitirgen túlekter kásiporynǵa jumysqa turýǵa asa qyzyǵýshylyq tanyta qoımaıdy eken. Qazirgi jaǵdaıda kásiporynǵa júzge jýyq jumysshy kerek. Osy oraıda kásiporyn basshylyǵy jumys isteýge kelisimi bolsa, arnaıy oqytyp, biliktilikten ótkizý múmkindikterin usynyp otyr.
Jármeńkede «Kazatomprom», «Qaztelekom», qalalyq Tótenshe jaǵdaılar departamenti, «Polıgrafkombınat», demalys oryndary, bankter, oqý oryndarynyń mamandary jumys izdeýshilermen suhbattasyp, suraqtaryna jaýap berdi. Mamandardyń pikirinshe, jumys berýshilermen tikeleı baılanys ornatyp, jumys tabýǵa septigin tıgizgen jármeńke eńbek naryǵyndaǵy ahýaldy zertteýge de yqpal etedi.
ALMATY