Bizge eń aldymen shynaıylyq pen ashyqtyq qajet. Qaraly qańtardan keıin memlekettik saıasatta úlken betburys boldy. О́tkenniń qateligin qaıtalamaýdy maqsat tutqan Memleket basshysy Qasym-Jomart Toqaevtyń bastamasymen Ata Zańymyzǵa ózgerister men tolyqtyrýlar engizilip, bul normalardyń barlyǵy halyq turmysyn jaqsartý men memlekettiń órkendeýine baǵyttaldy.
Memleket basshysy halyqqa eki ret Joldaý arnap, saıası jáne ekonomıkalyq saıasatymyzdy túbegeıli ózgertý arqyly ádiletti Qazaqstan qurý jolyna túsetinimizdi aıtty. Joldaýda «Ulttyq tabystyń ıgiligin jurttyń barlyǵy kórip otyrǵan joq, árıne, munyń barlyǵy kúrdeli máseleler, ony sheshýdiń naqty joldary bar» deı kelip, halyq turmysyn jaqsartýdyń baǵyt-baǵdaryn aıqyndady. Áleýmettik ádildikti ornatyp, Ulttyq qordyń ınvestısııalyq tabysynyń 50 paıyzyn balalardyń arnaýly esep shotyna, 7 paıyzyn «Qazaqstan halqyna» qoryna aýdarýdy uıǵardy. Kelesi jyly 100 myń jasty jumyspen qamtý, jas kásipkerler men stýdentterge 2,5 paıyzdyq nesıeler berý jáne bilim-ǵylym, densaýlyq saqtaý jáne taǵy basqa da salalarǵa reforma jasaý jóninde tapsyrmalar berdi.
«Sóz túzeldi, tyńdaýshy, sen de túzel» dep Abaı atamyz aıtqandaı, Memleket basshysy Ádiletti Qazaqstan qurýdyń baǵytyn aıqyndady. О́z múmkindigin tolyqtaı kórsete almaı kelgen aýyl sharýashylyǵy men turalap turǵan aýyldardyń tamyryna qan júgirtý máselesi qaıta qozǵaldy.
Kóp ákimniń jumysyna halyqtyń kóńili tolmaǵany shyndyq, oǵan bizdiń de jaýapkershiligimiz bar ekenin umytpaǵanymyz jón. Ákimderdiń jumysyn qadaǵalap, olarǵa baǵyt-baǵdar beredi degen keıbir aqsaqalymyzdyń kadr ósirýmen aınalysyp, tender alýshylardyń soıylyn soǵyp ketkeni belgili. Qaraly qańtarda áleýmettik ádiletsizdikke narazy bolǵan jastar kimge senerin bilmeı seńdeı soǵylysqanda keıbir oblystar men qalalarda jastarǵa basý aıtyp, arandap qalmaýǵa shaqyratyn aqsaqaldar men zııaly qaýymnyń bolmaǵany eldigimizge syn.
О́sip kele jatqan jas urpaq sózimizge emes isimizge qaraıtyny belgili. «Uıada ne kórseń ushqanda sony ilersiń», degen támsil bekerge aıtylmaǵan. Sondyqtan aǵa býyn jastarǵa isi, eńbegi, adaldyǵymen úlgi bolǵany jón.
Memleket basshysy Q.Toqaev aldaǵy ýaqytta barlyq deńgeıdegi ákimderdi kezeń-kezeńimen halyqtyń tańdaýy arqyly saılanýǵa jol ashatynyn eskertti, qazirdiń ózinde aýyl ákimderi jergilikti halyqtyń saılaýy arqyly bılikke kelip jatyr. Osy múmkindikti paıdalana otyryp naǵyz isker, otanshyl azamattar keńese otyryp, jumyla jumys isteýi kerek. Atam qazaq «Keńesip pishken ton kelte bolmas» degendi osyndaı berekeli elge qaratyp aıtqan. Ardagerler, basqa da qoǵamdyq uıymdar barlyq salanyń jumysynyń nátıjeli bolýyn talap etetin ınstıtýtqa aınalýy qajet.
Ol úshin bizge aýyzbirshilik aýadaı qajet. Qazir álemdik geosaıası jaǵdaı kúnnen-kúnge ýshyǵyp barady. Qudaı qosqan kórshilerimiz óz jaqyndarymen jaýlasyp, aıaǵy qantógiske ulasyp otyr. Reseı men Ýkraına, Qyrǵyzstan men Tájikstan, Qytaı men Taıvan ejelden aǵaıyndy elder bolǵanymen aralaryna syzat túsip, bir-birin ańdysyp otyr. Bul teketirestiń salqyny osy memleketterdiń ortasynda otyrǵan elimizdiń ekonomıkasy men turaqtylyǵyna áser etpeı qoımasy anyq. Jappaı qymbatshylyqtyń salqyny el azamattaryn qınap otyrǵany taǵy bar. Osyndaı urymtal tusty paıdalanyp, aırandaı uıyǵan tynyshtyǵymyzdy buzǵysy keletin syrtqy kúshtermen birge aramyzda júrgen jat nıettilerdiń de bar ekenin baǵamdap bilgenimiz jón. Berekemizdi buzǵysy keletinderdiń bary anyq, olardyń maqsaty – memlekettiligimizdiń tamyryna balta shabý.
Memleket basshysy Joldaýynda aıtqan kezekten tys prezıdent saılaýy 20 qarashada ótetini belgili boldy. Osyǵan oraı árbir respýblıkalyq qoǵamdyq birlestik óz kandıdattaryn dodaǵa qosty.
Elimizdegi eń yqpaldy saıası kúshke aınalǵan «Amanat» partııasynyń XXIV sezinde el prezıdenttigine úmitker retinde Q.Toqaevtyń kandıdatýrasyn usynyp, naýryz aıynan beri talqyǵa shyǵarylyp, halyqtyń qajetine beıimdelip qaıta jazylǵan partııanyń jańa saıası tuǵyrnamasy bekitildi.
«Aq jol» men Halyq partııasy jáne birneshe respýblıkalyq qoǵamdyq birlestik «Amanat» partııasynyń tańdaýyna qosylyp, halyqtyq koalısııa atynan el prezıdenttigine úmitker retinde Qasym-Jomart Toqaevty qoldaıtynyn jetkizdi.
Halyqtyq koalısııa forýmynda sóz alǵan árbir azamat, Memleket basshysy Q.Toqaevtyń júrgizip otyrǵan reformalarynyń halyq turmysyn jaqsartýǵa, jastardy qajetti bilim-ǵylymmen qamtamasyz etýge, sapaly medısınalyq kómekterdiń qoljetimdiligine, jemqorlyqty túbegeıli joıyp ashyq úkimet ornatýǵa, sondaı-aq «kúshti Prezıdent – yqpaldy Parlament – esep beretin Úkimet» qaǵıdatyn ornatýǵa baǵyttalǵanyn basa aıtty. Sonymen birge «О́zi bastaǵan reformalaryn aıaǵyna deıin jetkizýge múmkindik berýimiz kerek» degen sheshimge keldi.
Álemdi turaqsyzdyq jaılaǵan tusta Qazaqstandaǵy birliktiń burynǵydan da nyǵaıa túsýi «Túrli kózqaras – birtutas ult» qaǵıdatynyń kórinisine aınalyp, saıası mádenıeti qalyptasqan el ekenimizdi dáleldedi. Halyqtyń ál-aýqatyn arttyrý men memlekettiligimizdi odan ári nyǵaıtýdyń kepili bolatyn Ádiletti Qazaqstan qurý úshin bizge otanshyldyq ıdeıasyn ustanǵan, eńbekqorlyq pen aýyzbirshilik aýadaı qajet.
Ábdiǵanı BÁZILHANULY,
«Amanat» partııasy Astana qalalyq fılıaly saıası jumys bóliminiń konsýltanty