Memleket jáne qoǵam qaıratkeri, ádebıetimizdiń aıtýly tulǵasy, halyq jazýshysy Sherhan Murtazanyń 90 jyldyq torqaly toıy Jambyl oblysynda keń kólemde atalyp ótti. Is-sharalar aldymen jazýshynyń eńseli eskertkishiniń ashylýymen bastaldy. Saltanatty rásimde sóz sóılegen Aqparat jáne qoǵamdyq damý mınıstri Darhan Qydyráli Memleket basshysy Qasym-Jomart Toqaevtyń quttyqtaý hatyn oqydy.
«Aqıqattyń aldaspany, namystyń narkeskeni atanǵan ardaqty Sheraǵa sanaly ǵumyryn ult rýhanııatynyń damýyna arnaǵan qarymdy qalamger, qaıratker tulǵa edi.
Sóz zergeri Sherhan Murtaza jýrnalıstıkada tutas bir býyndy tárbıelep, talanttarǵa jol ashqan, ózindik mektebin qalyptastyrǵan qazaq baspasóziniń máýeli báıteregi boldy. Abyroıly azamat retinde bıik minberlerde eldik máselelerdi kóterip, ult múddesi jolynda aıanbaı kúresti.
Jazýshynyń qalamynan týǵan qundy týyndylar ýaqytpen birge jasap, óskeleń urpaqtyń jadynda jańǵyra bereri anyq. Onyń qazaq rýhanııatyndaǵy orny men jarqyn beınesi eshqashan umytylmaıdy», delingen Prezıdenttiń quttyqtaý hatynda.
Áýlıeata óńirinde jyl basynan beri daraboz qalamgerdiń 90 jyldyǵy aıasyndaǵy is-sharalar júıeli túrde ótip keledi. Osynaý is-sharalardyń qorytyndysy ispetti búgingi dúbirli jıynǵa elimizdiń ár qıyrynan mártebeli meımandar men Sheraǵańnyń «shekpeninen shyqqan» shákirtteri keldi.
Alqaly jıynda belgili aqyn, Memlekettik syılyqtyń laýreaty Nurlan Orazalın sóz alyp, qalamgerdiń ádebıet álemindegi orny, kisilik kelbeti, azamattyq bolmysy týraly tolǵandy. Ol óz sózinde aqıqattyń aldaspanyna aınalǵan Sheraǵanyń ózi ketkenimen, sózi ólmeıtinin aıtty.
Halyq qaharmany Baqytjan Ertaev, Memlekettik syılyqtyń laýreaty, aıtýly aqyn Aqushtap Baqtygereeva, memleket jáne qoǵam qaıratkeri Amalbek Tshanov, belgili ǵalym Janǵara Dádebaev tulǵa týraly estelikterimen bólisip, Sheraǵa juldyzy kókte máńgi sónbeıtinin atap ótti.
Budan soń torqaly toıǵa jınalǵan jurtshylyq «Sherhantanym: qazirgi qazaq ádebıeti men qazaq baspasóziniń damý tendensııalary» atty ǵylymı-tájirıbelik konferensııada bas qosty.
Jıyndy – Parlament Májilisiniń depýtaty Meırambek Tólepbergen júrgizip otyrdy.
Basqosýǵa memleket jáne qoǵam qaıratkerleri, ǵalymdar, joǵary oqý oryndarynyń professorlary men oqytýshylary, zııaly qaýym ókilderi qatysty.
Aldymen jıynǵa qatysýshylardy Jambyl oblysynyń ákimi Nurjan Nurjigitov quttyqtap, is-sharanyń mańyzdylyǵy men tulǵanyń ónegesi týraly aıtty.
«Bıyl elimiz dańqty jerlesimiz, Halyq jazýshysy, qazaq jýrnalıstıkasynyń kórnekti ókili Sherhan Murtazanyń 90 jyldyq mereıtoıyn atap ótýde.
«Kóne Taraz» tarıhı-mádenı kesheninde ornalasqan «Rýhanııat jáne tarıhtaný» ortalyǵy, Baspasóz úıi, tórt mektep pen Halyqaralyq Taraz ınnovasııalyq ınstıtýty Sherhan Murtaza esimimen atalady. Talaıǵy Taraz kósheleriniń birine de jazýshynyń esimi beriletin bolady. Bul – memleket jáne qoǵam qaıratkeriniń sińirgen eńbegine kórsetilgen qurmet. Sherhan Murtaza halyqtyń múddesi úshin ólsheýsiz eńbek etti. Halyq ony shynshyldyǵy men ádildigi, jazýshylyq sheberligi úshin qasterlep, «Sheraǵa» dep qurmetteıtin», dedi Nurjan Nurjigitov.
Sondaı-aq konferensııaǵa qatysýshylardyń atyna joldanǵan Parlament Senatynyń Tóraǵasy Máýlen Áshimbaevtyń, Parlament Májilisiniń Tóraǵasy Erlan Qoshanovtyń, Ǵylym jáne joǵary bilim mınıstri Saıasat Nurbektiń quttyqtaý hattary oqyldy.
Jıynda sóz alǵan Aqparat jáne qoǵamdyq damý mınıstri Darhan Qydyráli jazýshynyń ómiri jáne shyǵarmashylyq joly halyqqa aıanbaı qyzmet etýdiń úlgisi ekenin atap ótti.
«Sherhan Murtaza el rýhanııatynyń damýyna zor úles qosty. Elimizdiń saıası jáne qoǵamdyq ómirine belsene aralasyp, memleket múddesi úshin qyzmet etti», dedi ol.
О́z kezeginde memleket jáne qoǵam qaıratkerleri О́mirbek Baıgeldi, Ýálıhan Qalıjan, tarıh ǵylymdarynyń doktory Mámbet Qoıgeldi, Jazýshylar odaǵy tóraǵasynyń orynbasary Baýyrjan Jaqyp, L.Gýmılev atyndaǵy EUÝ professory Ǵarıfolla Esim, Parlament Májilisiniń depýtaty Darhan Myńbaı, jazýshy, pýblısıst, Halyqaralyq «Alash» syılyǵynyń laýreaty Ámirhan Meńdeke, qoǵam qaıratkeri Orazkúl Asanǵazy sóz sóılep, tulǵa týraly taǵylymdy oılarymen bólisti.
Alqaly jıynǵa qatysýshylar Sherhan Murtazanyń san qyrly qyzmeti, eldiń saıası jáne qoǵamdyq ómirindegi túbegeıli ózgeristerge atsalysýy, ádebıet pen jýrnalıstıkanyń damýyna qosqan zor úlesi týraly áńgimelep, onyń ádebı murasyndaǵy jastardyń rýhanı-adamgershilik tárbıesine qatysty taqyryptarǵa jan-jaqty toqtaldy.
Konferensııa barysynda Halyq jazýshysynyń bes tomdyq shyǵarmalar jınaǵy men onyń «Aýyldy, seni saǵynam...» atty kitabynyń tusaýkeseri ótti.
Osylaısha Qazaqstan Respýblıkasy Joǵarǵy Keńesi men Parlamenti Májilisiniń depýtaty, respýblıkalyq «Qazaq ádebıeti», «Jas Alash» («Lenınshil jas»), «Egemen Qazaqstan» gazetteriniń bas redaktory, «Qazaqstan» memlekettik teleradıo korporasııasynyń tóraǵasy bolyp eleýli eńbek etip, Memlekettik syılyqtyń laýreaty, Jambyl oblysynyń Qurmetti azamaty jáne taǵy da basqa túrli nagradalarmen marapattalǵan tarlanboz tulǵa rýhyna arnalǵan is-shara joǵary deńgeıde uıymdastyryldy.
Halyq jazýshysynyń qalamynan týǵan «Qara marjan», «Qyzyl jebe», «Aı men Aısha» romandary, «Stalınge hat» jáne «Beseýdiń haty» pesalary, «Tabylǵan teńiz», «Bultsyz naızaǵaı», «Belgisiz soldattyń balasy», «Myltyqsyz maıdan» povesteri sekildi kóptegen shyǵarmasy qalyń oqyrmannyń oljasyna aınalǵany sózsiz.
Qazaqtyń kórnekti jazýshysynyń shyǵarmalary álemniń kóptegen tiline aýdarylǵany onyń murasynyń qundy ekenin aıǵaqtaı tússe kerek.
Mereıtoıǵa arnaıy kelgen mártebeli meımandar qalamgerdiń týǵan aýyly, Jýaly aýdanyndaǵy Talapty eldi mekenine at basyn burdy. Is-sharalar legi budan ári qalamgerdiń týǵan aýylynda jalǵasyn tapty.
Aldymen jınalǵan jurt abyz tulǵanyń aýylynda, qasıetti Táńirtaýdyń etegindegi Myńbulaq jaılaýynda ornalasqan Talapty aýylyndaǵy ózi turǵan úıdiń ádebı-memorıaldy mýzeıge aınalýynyń kýási boldy. Bul úı óskeleń urpaqqa ult rýhanııatyn nasıhattaıtyn ortalyq retinde qyzmet etetini sózsiz.
Ádebı-memorıaldy mýzeı-úıdiń alqyzyl lentasyn qııý saltanatyna Aqparat jáne qoǵamdyq damý mınıstri Darhan Qydyráli, Halyq Qaharmany Baqytjan Ertaev, Qazaqstannyń Eńbek erleri Muhtar Shahanov, Aıagúl Mırazova, Parlament Senatynyń depýtaty Abdaly Nuralıev jáne Parlament Májilisiniń depýtattary Darhan Myńbaı, Janarbek Áshimjan, Gúldara Nurymova, Ilııas Bularov, Meırambek Tólepbergen arnaıy qatysty.
Qadirli qonaqtar ádebı-memorıaldyq mýzeı-úıge kirip, ondaǵy qundy muralarmen tanysty. Sh.Murtaza atyndaǵy «Rýhanııat jáne tarıhtaný» ortalyǵynyń dırektory Saýran Qalıev qalamgerdiń balalyq kezi men bilim alǵan shaǵy, stýdenttik jyldary, jýrnalıstıka jáne jazýshylyq qyzmeti, saıası qyzmetke aralasýy, jumys kabıneti men ınstalıasııasy ornalasqan ádebı-memorıaldyq úıdi tanystyrdy.
Jıyn sońynda respýblıkalyq deńgeıde uıymdastyrylǵan «Aqıqattyń aq týy» atty jýrnalıster arasyndaǵy baıqaý men «Shynnyń júzi – Sheraǵa» atty respýblıkalyq aqyndar músháırasynyń qorytyndysy shyǵarylyp, jeńimpazdar men júldegerler marapattaldy. Budan soń elimizdiń ár qıyrynan kelgen qonaqtarǵa arnalyp as berildi.
Jambyl oblysy,
Taraz qalasy,
Jýaly aýdany.